વિષ્ણુધર્મોત્તરપુરાણમ્ · અધ્યાય 1.118

॥ માર્કણ્ડેય ઉવાચ ॥
અતઃ પરમગસ્ત્યસ્ય વક્ષ્યે વંશોદ્ભવાન્દ્વિજાન્ ॥
આગસ્ત્યેયઃ કરમ્ભો યઃ કૌસલ્યાકુલજાસ્તથા

સ્વમેધસો મયોભુવસ્તથા ગાન્ધારકાયનિઃ॥
પૌલસ્ત્યાઃ પુલહાશ્ચૈવ ક્રતુવંશભવાસ્તથા

વાર્ષ્ણેયોઽપિ મતશ્ચૈષાં સર્વેષાં પ્રવરાઃ શુભાઃ ॥
અગસ્ત્યશ્ચ મહેન્દ્રશ્ચ ઋષિશ્ચૈવ મયોભુવઃ

પરસ્પરમવૈવાહ્યા ઋષયઃ પરિકીર્તિતાઃ ॥
પૌર્ણમાસાઃ પારણાશ્ચ ત્ર્યાર્ષ્ણેયાઃ પરિકીર્તિતાઃ

અગસ્ત્યઃ પૌર્ણમાસશ્ચ પારણશ્ચ મહાતપાઃ ॥
પરસ્પરમવૈવાહ્યા પૌર્ણમાસાશ્ચ પારણમ્

એતદુક્તમૃષીણાં તે વંશમુક્તમપૂરુષમ્ ॥
અતઃ પરં પ્રવક્ષ્યામિ કિં તવાનઘ કથ્યતામ્

વજ્ર ઉવાચ ॥
પુલહસ્ય પુલસ્ત્યસ્ય ક્રતોશ્ચૈવ મહાત્મનઃ ॥
અગસ્ત્યસ્ય તથા ચૈકં કથં વંશં તદુચ્યતે

માર્કણ્ડેય ઉવાચ ॥
ક્રતુઃ ખલ્વનપત્યોઽસ્તિ રાજન્વૈવસ્વતેન્તરે ॥
ઇધ્મવાહં સ પુત્રત્વે જગ્રાહ નૃપસત્તમ

અગસ્ત્યપુત્રં ધર્મજ્ઞ આગસ્ત્યાત્ક્રતવસ્તથા ॥
પુલહસ્ય તથા પુત્રઃ તિરશ્ચઃ પૃથિવીપતે

તેષાં તે જન્મ વક્ષ્યામિ ઉત્તરત્ર યથા વિધિ ॥
પુલહસ્ત્વપ્રજાં દૃષ્ટ્વા નાતિપ્રીતમના હ્યભૂત્

અગસ્ત્યજં દૃઢસ્યું તં પુત્રત્વે કૃતવાંસ્તદા ॥
પૌલહાશ્ચ તથા રાજન્નાગસ્ત્યાઃ પરિકીર્તિતાઃ

એતે તવોક્તાઃ પ્રવરા દ્વિજાનાં મહાનુભાવા નૃપ ગોત્રકારાઃ ॥
યેષાં ચ નામ્નાં પરિકીર્તનેન પાપં સમગ્રં પુરુષો જહાતિ

ઇતિ શ્રીવિષ્ણુધર્મોત્તરે પ્રથમખણ્ડે માર્કણ્ડેયવજ્રસંવાદે અગસ્ત્યવંશાનુકીર્તનં નામાષ્ટાદશાધિકશતતમોઽધ્યાયઃ