Vishnudharmottara Purana · Chapter 1.105

// mārkaṇḍeya uvāca // //
haviṣyāśī tatastiṣṭhedbrahmacārī ca tāṃ niśām //
grahaśāntiriyaṃ proktā mayā kalmaṣanāśinī

anāvṛṣṭyāṃ prayoktavyā vṛṣṭikāmena bhūbhujā //
ativṛṣṭyāṃ prayoktavyā vṛṣṭiṃ śamayatā tathā

yātrākāle tathā kāryyā ripūṇāṃ kṣayamicchatā //
raṇakāle tathā kāryyā saṃgrāme jayamicchatā

kartavyā cābhicārārthaṃ śatrūṇāṃ manujeśvara //
puṣṭikāmairnaraiḥ kāryyā vidyākāmaistathaiva ca

lābhārthaṃ ca tathā vaiśyaiḥ śūdrairdharmmaphalepsubhiḥ //
rājyakāmena kartavyā rājaputreṇa pārthiva

tathā vandhanamokṣārthaṃ baddhena ca mahīpate //
sthānacyutena kartavyā sthānalabdhimathecchatā

vyādhitena ca kartavyā vyādheḥ praśamamicchatā //
mārake ca tathā kāryā mārakakṣayamicchatā

parābhicāraśaṅkāyāṃ grahaśāntiṃ prayojayet //
divyāntarikṣabhaumānāmutpātānāṃ tathodbhave

grahādhīnāṃ narendrāṇāmucchrāyāḥ patanāni ca //
bhāvābhāvau ca jagatāṃ grahāyattau narādhipa

brahmaṇaiṣāṃ varo dattaḥ pūjitāḥ pūjayiṣyatha //
tasmātsarvaprayatnena nṛṇāṃ pūjyatamā grahāḥ

gurubhaktasya dāntasya dharmārjitadhanasya ca //
pūjakasya grahendrāṇāṃ sadā sānugrahā grahāḥ

mānavasyāsvatantrasya gobrāhmaṇahitasya ca //
māṃsabhakṣaṇahīnasya sadā sānugrahā grahāḥ

ye bhaktāḥ puṇḍarīkākṣaṃ devadevaṃ janārdanam //
nāsti teṣāṃ jagatyasmindoṣo grahakṛto nṛṇām

yathā bāṇaprahārāṇāṃ kavacaṃ vāraṇaṃ bhaveta //
tathā daivopaghātānāṃ śāntirbhavati vāraṇam

grahayāgavidhiṃ samyagyaścādhīte narādhipa //
grahapākitaṃ caiva tasyāpi na bhaviṣyati

atīva vistareṇeyaṃ grahaśāṃtirudāhṛtā //
dhanyā yaśasyā cāyuṣyā sarvakilbiṣanāśinī

prayuñjataḥ samyagimāṃ narendra na jātu loke bhayamasti kiñcit //
ārogyamāsādya ciraṃ ca jīvetprāpnoti lakṣmīṃ sakalām̐śca bhogān

iti śrīviṣṇudharmmottare prathamakhaṇḍe mārkaṇḍeyavajrasaṃvāde grahaśāntiphalavarṇano nāma pañcādhika śatatamo'dhyāyaḥ