Vishnudharmottara Purana · Chapter 1.104

// mārkaṇḍeya uvāca // //
evaṃ śāntyavasāne tu yajamānasya yājakaḥ //
hṛdi vinyasya darbhāgrānsthitānsve dakṣiṇe kare

kuryātpratisarābandhaṃ tanme nigadataḥ śṛṇu //
baddhapratisarasyāsya sarve naśyantu rākṣasāḥ

dhruvastvāmūrdhvataḥ pātu pūrvataḥ pātu bhāskaraḥ //
bhaumo dakṣiṇataḥ pātu paścātpātu śanaiścaraḥ

uttareṇa budhaḥ pātu ketuḥ pātu tathā hyadhaḥ //
pūrvadakṣiṇataḥ śukro dakṣiṇāparatastamaḥ

paścimottarataścandro jīvaḥ prāguttareṇa tu //
uktasandhiṣu sarvāṇi nakṣatrāṇi tavānagha

svāṃsvāṃ diśamadhiṣṭhāya tava nityaṃ digīśvarāḥ //
rakṣantu sarvaduṣṭebhyaḥ śakravahnipurogamāḥ

śātravāṇāṃ ca corāṇāṃ vyādhīnāṃ pātakasya ca //
amaṅgalānāṃ ghorāṇāmariṣṭānāṃ tathaiva ca

dussvapnānāṃ ca ghorāṇāṃ cintitānāṃ tathā mṛṣā//
vajreṇa nāśanaṃ śakraḥ karotu balasūdanaḥ

daṇḍena nāśanaṃ nityaṃ vidadhātu yamontakaḥ //
pāśena varuṇo devo gadayā ca dhaneśvaraḥ

grahasannāhasannaddho grahapañjaramadhyagaḥ //
adṛśyaḥ sarvabhūtānāṃ sarvaduḥkhavivarjitaḥ

sarvavyādhivihīnaśca kālakarṇīvivarjitaḥ //
tathā tvaṃ bhava dīrghāyurgrahendrāṇāṃ prasādataḥ

rakṣantu te devagaṇāḥ samantrāḥ dharme matiṃ cāpi sadā diśantu //
nāśaṃ tathā śatrugaṇasya cograṃ bhogānmanojñānvipulāśca lakṣmīm

iti śrīviṣṇudharmottare prathamakhaṇḍe mārkaṇḍeyavajrasaṃvāde śāntyavasāne pratisarabandhāśīrvādonāma caturadhikaśatatamo'dhyāyaḥ