Vishnudharmottara Purana · Chapter 1.103

mārkaṇḍeya uvāca //
dhruvasthānaniviṣṭānāṃ devatānāṃ pṛthakpṛthak //
dakṣiṇārthe pradātavyaṃ sarveṣāmeva kāñcanam

raktāṃ vatsayutāṃ dhenuṃ dadyādarkāya pārthiva //
śaṅkhaṃ dadyānnarendreṇa dakṣiṇārthaṃ niśābhṛtaḥ

raktavarṇohyanaḍvām̐śca dātavyaḥ kṣitijasya tu //
kāñcanīṃ svāṃ pratikṛtiṃ bālakrīḍanakāni ca

budhāya rājandeyāni dakṣiṇārthe viśeṣataḥ //
kṣaumaṃ dukūlaṃ kārpāsavāsāṃsi gurave tathā

sitavarṇaṃ ca turagaṃ bhārgavāya pradāpayet //
kṛṣṇāṃ dhenuṃ savatsāṃ ca dadyātsūryasutāya vai

uṣṇīṣaṃ lohadaṇḍaśca dātavyo nṛpa rāhave //
chāgaśca ketave deyaṃ kutapaṃ ca narādhipa

kṛttikānāṃ tu kanakaṃ dātavyaṃ bhūtimicchatā //
sarvabījāni deyāni rohiṇīnāṃ tathaiva ca

dogdhrīṃ dhenuñcelvalānāmanaḍvāhaṃ ca rāhave //
ādityāya śubhaṃ vastraṃ puṇyāya kanakaṃ ghṛtam

sārpāya vṛṣabhaṃ dadyādrukmaśṛṅgaṃ mahīpate //
pitryasya ca tilāndadyādvāyavyasya ca cāmaram

bhāgyasya deyā gandhāśca āryamṇasya ca kāñcanam //
hastasya kuñjaraṃ dadyātkanakaṃ vā mahīpate

tvāṣṭrasya vṛṣabhaṃ dadyādaindrāgnasya narādhipa//
vastrāṇi caiva maitrasya śākrasya kanakaṃ tathā

dadyānmūlasya mūlāni phalāni vividhāni ca //
āpyasya dadhipātrāṇi śakaṭaṃ vāsavasya ca

tathā candanakāṣṭhañca vāruṇasya pradāpayet //
ajamājasya dātavyamāhirbudhnyasya caudanam

dhenuṃ pauṣṇasya turagamāśvinasya tathaiva ca //
tiladhenuñca yāmyasya dadyātpāpāpanuttaye

kuñjaraṃ ca tathaivoṣṭraṃ rathaṃ śakaṭameva ca //
hayamaśvataraṃ caiva narayānaṃ ca pārthiva

prācyādīnāṃ kramāddadyāddakṣiṇāśca narādhipa //
sāgarāṇāṃ ca dātavyaṃ kanakaṃ bhūridakṣiṇam

nakṣatrāṇāṃ grahāṇāñca diśāśca manujeśvara //
yaduktamatra taddeyaṃ devatānāṃ pṛthakpṛthak

uktābhāve ca dātavyā dhenuḥ pārthivasattama //
pratyekasya mahābhāga śubhā kāṃsyopadohanā

dogdhrī savatsā śīlāḍhyā vastraratnopaśobhitā //
rukmaśṛṅgaiḥ khurai raupyairmuktālāṃgūlabhūṣitā

tato visarjanaṃ kāryaṃ pūrvoktavidhinā nṛpa //
dadhikṣīraghṛtaprāyaṃ tathā trimadhurānvitam

bhojayedbrāhmaṇānbhaktyā pratyekasya narādhipa //
yathāśaktyā mahārāja teṣāṃ dadyācca dakṣiṇām //
prayatastām̐śca yāceta pūjitānprīṇanaṃ budhaḥ

etāvaduktaṃ tava śāntikarma samastapāpapraśamāya rājan //
karttavyametatprayatena śaktyā na vittaśāṭhyena na māyayā ca

iti śrīviṣṇudharmottare prathamakhaṇḍe mārkaṇḍeyavajrasaṃvāde dakṣiṇādhyāyo nāma tryadhikaśatatamo'dhyāyaḥ