Vishnudharmottara Purana · Chapter 1.102

mārkaṇḍeya uvāca //
dhruvā dyauriti mantreṇa homaḥ kāryo dhruvasya tu //
ūrdhvo adhara ityeva dhruvāyāśca diśo bhavet

brahmayajñānamityeṣa brahmaṇaḥ parikīrtitaḥ //
dyaustvā iti ca mantreṇa divaḥ kāryo mahīpate

pṛthivī divi cetyeva pṛthivyāḥ parikīrtitaḥ //
praṇavena ca śeṣasya cādhastācca tathā diśaḥ

agnirmūrdheti mantro'yamagnaye parikīrtitaḥ //
uduttamaṃ varuṇapāśaṃ mantroyaṃ varuṇasya tu

praṇavaśca kumārasya tadviṣṇorviṣṇave bhavet //
trātāramindraṃ śakrasya devyāśca praṇavo bhavet

prajāpate na tvadetā mantro'yaṃ syātprajāpateḥ //
vināyakāya praṇavo viśvakarmeti cāpyatha

mantraśca kathito rājansatataṃ viśvakarmaṇaḥ //
ākṛṣṇeti ca mantro'yamādityasya prakīrtitaḥ

imaṃ deveti somasya agnirmūrdhā kujasya tu //
udbudhyasvā budhasyāpi mantraḥ prokto nareśvara

bṛhaspate ati yadaryo mantra ukto bṛhaspateḥ //
annātparisrutetyevaṃ mantraḥ śukrasya kīrtitaḥ

śannodevīti saurasya kāṇḍātkāṇḍeti rāhave //
ketuṃ kṛṇvanniti tathā mantra uktaśca ketave

agnirmūrddhā kṛttikānāṃ rohiṇīnāṃ prajāpate //
madhuvvāteti mantro'yamilvalānāṃ prakīrtitaḥ

mṛḍano rudramārdrāyāḥ sutrāmāṇaṃ punarvasoḥ //
tava śriyeti puṣyasya homamantro vidhīyate

namo'stu sarpebhyaśceti mantraḥ sārpasya kīrtitaḥ //
ahaṃ pitṝniti tathā mantraḥ pitryasya kīrtitaḥ

sadāsugeti bhāgyasya tathā mantraḥ prakīrtitaḥ //
ete aryyamannityevamāryamṇasya ca nirdiśet

sāvitrasya ca sāvitrī tvāṣṭrasya ya ime tathā//
vāyuragreti ca tathā vāyavyasya narādhipa

indrāgnī rocanetyevamindrāgnasya prakīrtitaḥ

mitrojaneti maitrasya homamantraḥ prakīrtitaḥ //
indraḥ sutrāma iti ca śākrasya vasudhādhipa

yante devīti nirṛtiṃ mūlasya ca tathā bhavet //
śanna āpastathāpyasya homamantraḥ prakīrtitaḥ

viśvedevīti vaiśvasya tathā ca vasudhādhipa //
brahmayajñānamityevaṃ tathā brāhmasya nirdiśet

vaṣaṭte viṣṇa ityevaṃ vaiṣṇavasya tathā bhavet //
āme grahā bhavatyevaṃ vāsavasya prakīrtitaḥ

imaṃ me varuṇetyevaṃ vāruṇasya tathā bhavet //
upaprāgetimantreṇa homamājasya kārayet

mantraścāhirivetyevamāhirbudhnyasya kīrtitaḥ //
prayādamiti mantreṇa aśvinasya prakīrtitaḥ

yamo dādhāra pṛthivīṃ tathā yāmyasya kīrtitam //
nakṣatradevatāhome mantrā ete prakīrtitāḥ

nakṣatradevatā tulyā digīśānāṃ tathaiva ca //
praṇavena diśaḥ kāryastathā vaiśravaṇasya ca

sāgarāṇāṃ ca rājendra pṛthageva vijānatā //
ekacakreti vā dvyarcaṃ grahāṇāṃ ca narādhipa

samāgneti tathā dvyarca nakṣatrāṇāṃ vidhīyate

etāvadukto nṛpavarya tubhyaṃ homāśrayo mantragaṇo grahāṇām //
hutena yenānaghamānavānāṃ kāmānabhīṣṭānpradiśanti loke

iti śrīviṣṇudharmmottare prathamakhaṇḍe mārkaṇḍeyavajrasaṃvāde homamantrādhyāyo nāma dvyadhikaśatatamo'dhyāyaḥ