Vishnudharmottara Purana · Chapter 1.101

// mārkaṇḍeya uvāca //
dhuvasthānaniviṣṭānāṃ devatānāṃ mahīpate //
ghṛtāktairakṣatairhomaḥ kāryyaśca satilairbhavet

arkaḥ palāśaḥ khadiraścāpāmārgo 'tha pippalaḥ //
udumbaraśśamīdūrvāḥ kuśāśceti yathākramam

samidarthaṃ praśasyante sūryādīnāṃ narādhipa //
hotavyāssamidhaścaiva ghṛtāktā manujeśvara

tathā prādeśamātrāśca prāgagrā nityameva ca //
ūrdhvaśuṣkāḥ sapatrāśca vitvacaśca vivarjayet

kṛttikānāṃ ghṛtenākto homaḥ pārthivasattama //
rohiṇīnāṃ tathā bījairilvilānāṃ ca pāyasaiḥ

mākṣikaiśca tathārdrāyāmādityasya ca taṇḍulaiḥ //
puṣyasya pāyasenāpi sārpa sya ca tathauṣadhaiḥ

tilaiḥ sataṇḍulairhomaḥ tathā paitryasya kīrtitaḥ //
priyaṅgubhiśca bhāgyasya cāryyamṇasya tathākṣataiḥ

sāvitrasya tathā dadhnā citrāyā pāyasena ca //
vāyavyasyākṣataiḥ kāryyā saghṛtairmanujeśvara

aindrāgnasya sadā kāryyo yāvakena tathaiva ca //
masūraiścaiva maitrasya śākrasya caṇakena tu

mūlasyauṣadhibhiḥ kāryyastathaivāpyasya śālibhiḥ //
vaiśvadevasya payasā tathā brāhmasya pāyasaiḥ

maṇibhistaṇḍulopetaiḥ śravaṇasya vidhīyate //
nyagrodhodumbaraphalairvāsavasya vidhīyate

vāruṇasyodakaiḥ puṣpaistathā caivākṣataiśśubhaiḥ //
ājasyājyena madhunā dadhnā ca nṛpasattama

vrīhībhiśca tathā kāryyāścāhirbudhnyasya pārthiva //
phalaiśca sākṣataiḥ kāryyastathā pauṣṇasya pārthiva

kṣīravṛkṣasamidbhiśca āśvinasya vidhīyate //
yāmyasya madhusaṃyuktaistilaiḥ pārthivasattama

ājya tilāśca tailaṃ ca kṛśaraṃ madhu pāyasam //
dadhi kṣīraṃ ghṛtaṃ kṣaudraṃ prācyādīnāṃ yathākramam

sāgarāṇāṃ ca payasā homaḥ kāryaḥ pṛthakpṛthak //
uktālābhe ca sarveṣāṃ homaḥ kāryyasti lākṣataiḥ

saghṛtaiḥ pārthivaśreṣṭha dravyaśāṭhyaṃ vivarjayet //
prabhoḥ prathamakalpasya yo'nukalpena vartate

na sāmparāyikaṃ tasya bhavatīha sudurmateḥ

yadyadagrahasyābhihitaṃ mayātra ṛkṣasya vā bhūmipatipradhāna //
taddevatāyāśca tathaiva deyaṃ diśastathā nātra vicāraṇāsti

iti śrīviṣṇudharmottare prathamakhaṇḍe mārkaṇḍeyavajrasaṃvāde homadravyavibhāgo nāmaikottaraśatatamo'dhyāyaḥ // १०१