Vishnudharmottara Purana · Chapter 1.11

vajra uvāca //
himavatpādasambhūtāḥ puṇyā brahmanviśeṣataḥ //
prādhānyena samācakṣva nadyaḥ pāpabhayāpahāḥ

mārkaṇḍeya uvāca //
kauśeyavarṇasalilā kuśeśayavimiśritā //
kauśikasya priyā nityaṃ kauśikī nimnagottamā

nimajjatpāpasaṃghaughanirmalīkaraṇe śubhā //
niścarā nimnagā śreṣṭhā nityaṃ munijanapriyā

gajendrabhinnakūlā tu gaṅgātulyā ca puṇyataḥ //
gandharvagaṇagītā ca gaṇḍakī gokulākulā

lokānāṃ pāvanāyālaṃ lokanāthena nirmitā //
lokadṛṣṭimanohārī lohityaśca mahānadaḥ

divaḥ sevyā sadā viprairdivi devagaṇairyathā//
dṛṣadvatī samākīrṇā darśanīyodakā tathā

bahudā bahusattvā'tha menā ca pralayakṣamā //
anavacchinnavāhā tu likhitasya ca bāhudā

dharmapradā sevakānāṃ dhūtapāpā mahānadī//
gomatī gokulākīrṇā gajendragaṇagāhitā

gandharvagītagaṃbhīrā gaṇayakṣagaṇairyutā //
kuhūkadambakādambakekāravavināditā

kumudotpala kahlārakusumairākulodakā //
devadevasya yā devī dayitā śaṅkarasya ca

devikā sā purā rājandevalokagatipradā //
vistāritamahākūlā viṣamadvīpa vījitā

viṣṇulokapradā devī vitastāghavināśinī //
candrabhāgā ca candrāṃśucāruśītajalāvilā

candralokapradā snāne cāmaratvapradāyinī //
sarojākulatīrthā ca sarayūḥ saritāṃ varā

satataṃ sevitā sadbhiḥ somalokamabhīpsubhiḥ //
indrebhasevitataṭā indraloka pradāyinī

indīvarākulajalā tathā devī irāvatī //
viśiṣṭapāśavicchede vipāśā kuśalā tathā

tathaiva sarvapāpānāṃ vipākakāriṇī nṛṇām //
vaśiṣṭhavidrutā devī śatadrurdrutagāminī

raudrāṇāmapi sattvānāṃ rudralokapradā śivā //
kṛṣṇena kṛṣṇatoyā ca bālye pītapayodharā

yamasvasā ca yamunā yāmyaduḥkhavināśinī //
saptaprakārā ca nadī tathā devī sarasvatī

tasyāḥ saptasu bhāgeṣu nāmāni śṛṇu me nṛpa //
suprabhā kātarākṣī ca viśālā mānasahradā

sarasvatyoghanādā ca suveṇurvimalodakā //
puṣkare naimiṣe caiva gayāyāṃ kośaleṣu ca

kurukṣetre kramājjñeyā gaṅgādvāre himācale //
nadyastathaitā himavatprasūtāḥ pradhānabhūtāḥ kathitā nṛvīra! //
uktāśca nadyaśca sahasraśo'nyāḥ sarvāḥ pavitrā ṛṣivaryajuṣṭāḥ

varṣasya tasyāpi tathāntare'sminsaptaprakārā ca trimārgagāpi //
dvīpaṃ praviṣṭā bharatasya rājan bhagīrathārādhitapadmajoktā

iti śrīviṣṇudharmmottare prathamakhaṇḍe mārkaṇḍevajrasaṃvāde himavannadīvarṇanaṃ nāmaikādaśo'dhyāyaḥ