Vishnu Purana · Chapter 5.8

iti śrīviṣṇumahāpurāṇe pañcamāṃśe saptamo 'dhyāyaḥ (7)
śrīparāśara uvāca
gāḥ pālayantau ca punaḥ sahitau balakeśavau /
bhramamāṇau vane tasminramyaṃ tālavanaṃ gatau

tattu tālavanaṃ divyaṃ dhenuko nāma dānavaḥ /
mṛgamāṃsakṛtāhāraḥ sadādhyāste kharākṛtiḥ

tattu tālavanaṃ pakvaphalasaṃpatsamanvitam /
dṛṣṭvā spṛhānvitā gopā phalādāne 'bruvanvacaḥ

gopā ūcuḥ
he rāma he kṛṣṇa sadā dhenukenaiṣa rakṣyate /
bhūpradeśo yatastasmātpakvānīmāni saṃti vai

phalāni paśya tālānāṃ gandhāmoditadiṃśi vai /
vayametānyabhīpsāmaḥ pātyantāṃ yadi rocate

śrīparāśara uvāca
iti gopakumārāṇāṃ śrutvā saṃkarṣaṇo vacaḥ /
etatkartavyamityuktvā pātayāmāsa tāni vai /
kṛṣṇaś ca pātayāmāsa bhuvitāni phalāni vai

phalānāṃ patatāṃ śabdamākarṇya sudurāsadaḥ /
ājagāma sa duṣṭātmā kopāddaiteyagardabhaḥ

padbhyāmubhābhyāṃ sa tadā paścimābhyāṃ balaṃ balī /
jaghānorasi tābhyāṃ ca sa ca tenābhyagṛhyata

gṛhītvā bhrāmayāmāsa soṃ'bare gatajīvitam /
tasminneva sa cikṣepa vegena tṛṇarājani

tataḥ phalānyanekāni tālāgrānnipatankharaḥ /
pṛthivyāṃ pātayāmāsa mahāvāto ghanāniva

anyā natha sajātīyānāgatāndaityagardabhān /
kṛṣṇaścikṣepa tālāgre balabhadraś ca līlayā

kṣaṇenālaṅkṛtā pṛthvī pakvais talaphalais tadā /
daitya gardabhadehaiś ca maitreya śuśubhe 'dhikam

tato gāvo nirābādhāstasmiṃstalavane dvija /
navaśaṣvaṃ sukhaṃ ceruryanna bhuktamabhūtpurā