વિષ્ણુ પુરાણ · અધ્યાય 5.8

ઇતિ શ્રીવિષ્ણુમહાપુરાણે પઞ્ચમાંશે સપ્તમો ઽધ્યાયઃ (7)
શ્રીપરાશર ઉવાચ
ગાઃ પાલયન્તૌ ચ પુનઃ સહિતૌ બલકેશવૌ ।
ભ્રમમાણૌ વને તસ્મિન્રમ્યં તાલવનં ગતૌ

તત્તુ તાલવનં દિવ્યં ધેનુકો નામ દાનવઃ ।
મૃગમાંસકૃતાહારઃ સદાધ્યાસ્તે ખરાકૃતિઃ

તત્તુ તાલવનં પક્વફલસંપત્સમન્વિતમ્ ।
દૃષ્ટ્વા સ્પૃહાન્વિતા ગોપા ફલાદાને ઽબ્રુવન્વચઃ

ગોપા ઊચુઃ
હે રામ હે કૃષ્ણ સદા ધેનુકેનૈષ રક્ષ્યતે ।
ભૂપ્રદેશો યતસ્તસ્માત્પક્વાનીમાનિ સંતિ વૈ

ફલાનિ પશ્ય તાલાનાં ગન્ધામોદિતદિંશિ વૈ ।
વયમેતાન્યભીપ્સામઃ પાત્યન્તાં યદિ રોચતે

શ્રીપરાશર ઉવાચ
ઇતિ ગોપકુમારાણાં શ્રુત્વા સંકર્ષણો વચઃ ।
એતત્કર્તવ્યમિત્યુક્ત્વા પાતયામાસ તાનિ વૈ ।
કૃષ્ણશ્ ચ પાતયામાસ ભુવિતાનિ ફલાનિ વૈ

ફલાનાં પતતાં શબ્દમાકર્ણ્ય સુદુરાસદઃ ।
આજગામ સ દુષ્ટાત્મા કોપાદ્દૈતેયગર્દભઃ

પદ્ભ્યામુભાભ્યાં સ તદા પશ્ચિમાભ્યાં બલં બલી ।
જઘાનોરસિ તાભ્યાં ચ સ ચ તેનાભ્યગૃહ્યત

ગૃહીત્વા ભ્રામયામાસ સોંઽબરે ગતજીવિતમ્ ।
તસ્મિન્નેવ સ ચિક્ષેપ વેગેન તૃણરાજનિ

તતઃ ફલાન્યનેકાનિ તાલાગ્રાન્નિપતન્ખરઃ ।
પૃથિવ્યાં પાતયામાસ મહાવાતો ઘનાનિવ

અન્યા નથ સજાતીયાનાગતાન્દૈત્યગર્દભાન્ ।
કૃષ્ણશ્ચિક્ષેપ તાલાગ્રે બલભદ્રશ્ ચ લીલયા

ક્ષણેનાલઙ્કૃતા પૃથ્વી પક્વૈસ્ તલફલૈસ્ તદા ।
દૈત્ય ગર્દભદેહૈશ્ ચ મૈત્રેય શુશુભે ઽધિકમ્

તતો ગાવો નિરાબાધાસ્તસ્મિંસ્તલવને દ્વિજ ।
નવશષ્વં સુખં ચેરુર્યન્ન ભુક્તમભૂત્પુરા