Vishnu Purana · Chapter 5.5

iti śrīviṣṇumahāpurāṇe pañcamāṃśe caturtho 'dhyāyaḥ (4)
śrīparāśara uvāca
vimukto vasudevo 'pi nandasya śakaṭaṃ gataḥ /
prahṛṣṭaṃ dṛṣṭavānnandaṃ putro jāto mameti vai

vasudevopi taṃ prāha diṣṭyādiṣṭyeti sādaram /
vārdhake 'pi samutpannastanayo 'yaṃ tavādhunā

datto hi vārṣikaḥsarvo bhavadbhir nṛpateḥ karaḥ /
yadarthamāgatāstasmānnātra stheyaṃ mahādhanaiḥ

yadarthamāgatāḥ kāryaṃ tanniṣpannaṃ kimasyate /
bhavadbhir gamyatāṃ nanda tacchīghraṃ nijagokulam

mamāpi bālakastatra rohiṇī prabhavo hi yaḥ /
sa rakṣaṇīyo bhavatā yathāyaṃ tanayo nijaḥ

ityuktāḥ prayayurgopā nandagopapurogamāḥ /
śakaṭāropitair bhāḍaiḥ karaṃ dattvā mahābalāḥ

vasatāṃ gokule teṣāṃ pūtanā bālaghātinī /
suptaṃ kṛṣṇamupādāya rātrau tasmai stanaṃ dadau

yasmai yasmai stanaṃ rātrau pūtanā saṃprayacchati /
tasyatasya kṣaṇenāṅgaṃ bālakasyopahanyate

kṛṣṇastu tatstanaṃ gāḍhaṃ karābhyāmatipīḍitam /
gṛhītvā prāṇasahitaṃ papaukrodhasamanvitaḥ

sātimuktamahārāvā vicchinnastrāyubandhanā /
papāta pūtanā bhūmau mriyamāṇātibhīṣaṇā

tannādaśrutisaṃtrastāḥ pravuddhāste vrajaukasaḥ /
dadṛśuḥ pūtanotsaṃge kṛṣṇaṃ tāṃ ca nipātitām

ādāya kṛṣṇaṃ saṃtrastā yaśodāpi dvijottama /
gopucchabhrāmaṇenātha bāladoṣamapākarot

gokarīṣamupādāya nandagopopi mastake /
kṛṣṇasya pradado rakṣāṃ kurvaścaitadudīrayan

nandagopa uvāca
rakṣatu tvāmaśeṣāṇāṃ bhūtānāṃ prabhavo hariḥ /
yasya nābhisamudbhūtapaṅkajādabhavajjagat

yena daṃṣṭrāgravidhṛtā dhārayatyavanirjagat /
varāharūpadhṛgdevaḥsa tvāṃ rakṣatu keśavaḥ

nakhāṅkuravinirbhinnavairivakṣasthalo vibhuḥ /
nṛsiṃharūpī sarvatra rakṣatu tvāṃ janārdanaḥ

vāmano rakṣatu sadā bhavantaṃ yaḥ kṣaṇādabhūt /
trivikramaḥ kramākrāntatrailokyaḥ sphuradāyudhaḥ

śiraste pātu govindaḥ kaṇṭhaṃ rakṣatu keśavaḥ /
guhyaṃ ca jaṭharaṃ viṣṇurjaghe pādau janārdanaḥ

mukhaṃ bāhū prabāhū ca manaḥ sarvedriyāṇi ca /
rakṣatvavyāhataiśvaryastava nārāyaṇo 'vyayaḥ

śārṅgacakragadāpāṇeḥ śaṅkhanādahatāḥ kṣayam /
gacchantu pretakūṣmāṇḍarākṣasā ye tavāhitāḥ

tvāṃ pātu dikṣu vaikuṇṭho vidikṣu madhusūdanaḥ /
hṛṣīkeśoṃ'bare bhūmau rakṣatu tvāṃ mahīdharaḥ

śrīparāśara uvāca
evaṃ kṛtasvastyayano nandagopena bālakaḥ /
śāyitaḥ śakaṭasyādho bālaparyaṅkikātale

te ca gopā mahaddṛṣṭvā pūtanāyāḥ kalevaram /
mṛtāyāḥ paramaṃ trāsaṃ vismayaṃ ca tadā yayuḥ