Vishnu Purana · Chapter 5.4

iti śriviṣṇumahāpurāṇe pañcamāṃśe tṛtīyo 'dhyāyaḥ (3)
śrīparāśara uvāca
kaṃsastatodvignamanāḥ prāha sarvānmahāsurān /
pralaṃbakeśipramukhānāhūyāsurapuṅgavān

kaṃsa uvāca
he pralaṃba mahābāho keśin dhenuka pūtane /
ariṣṭādyāstathaivānye śrūyatāṃ vacanaṃ mama

māṃ hantumamarair yatnaḥ kṛtaḥ kila durātmabhiḥ /
madvīryatāpitānvīro na tvetāngaṇayāmyaham

kimindreṇālpavīryeṇa kiṃ hareṇaikacāriṇā /
hariṇā vāpi kiṃ sādhyaṃ chidreṣvasuraghātinā

kimādityaiḥ kiṃ vasubhir alpavīryaiḥ kimagnibhiḥ /
kiṃvānyair amaraiḥ sarvair madbāhubalanirjitaiḥ

kiṃ na dṛṣṭomarapatirmayā saṃyugametya saḥ /
pṛṣṭhenaiva vahanbāṇānapagacchannavakṣasā

madrāṣṭre vāritā vṛṣṭiryadā śakreṇa kiṃ tadā /
madbāṇabhinnair jaladair āpo muktāyathepsitāḥ

kimurvyāmavanīpālā madbāhubalabhīravaḥ /
te sarve sannatiṃ yātā jarāsaṃdhamṛte guram

amareṣu mamāvajñā jāyate daityapuṅgavāḥ /
hāsyaṃ me jāyate vīrās teṣu yatnapareṣvapi

tathāpi khalu duṣṭānāṃ teṣāmapyadhikaṃ mayā /
apakārāya daityendrā yatanīyaṃ durātmanām

tadye yaśasvinaḥ kecitpṛthivyāṃ ye ca yajvanaḥ /
kāryo devāpakārāya teṣāṃ sarvātmanā vadhaḥ

utpannaścāpi me mṛtyurbhūtapūrvaḥsa vai kila /
ityetaddārikā prāha devakīgarbhasaṃbhavā

tasmādbāleṣu ca paro yatnaḥ kāryo mahītale /
yatrodriktaṃ balaṃ bāle sa hantavyaḥ prayatnataḥ

ityājñāpyāsurānkasaḥ praviśyāśu gṛhaṃ tataḥ /
mumoca vasudevaṃ ca devakīṃ ca nirodataḥ

kaṃsa uvāca
yuvayorghātitā garbhā vṛthaivaite mayādhunā /
kopyanya eva nāśāya mama garbhaḥsamudyataḥ

tadalaṃ paritāpena nunaṃ tadbhāvino hi te /
arbhakā yuvayordeṣāccāyuṣo yadviyojitāḥ

śrīparāśara uvāca
ityāśvāsya vimuktvā ca kaṃsastau pariśaṅkitaḥ /
antargṛhaṃ dvijaśreṣṭha praviveśa tataḥ svakam