વિષ્ણુ પુરાણ · અધ્યાય 5.5

ઇતિ શ્રીવિષ્ણુમહાપુરાણે પઞ્ચમાંશે ચતુર્થો ઽધ્યાયઃ (4)
શ્રીપરાશર ઉવાચ
વિમુક્તો વસુદેવો ઽપિ નન્દસ્ય શકટં ગતઃ ।
પ્રહૃષ્ટં દૃષ્ટવાન્નન્દં પુત્રો જાતો મમેતિ વૈ

વસુદેવોપિ તં પ્રાહ દિષ્ટ્યાદિષ્ટ્યેતિ સાદરમ્ ।
વાર્ધકે ઽપિ સમુત્પન્નસ્તનયો ઽયં તવાધુના

દત્તો હિ વાર્ષિકઃસર્વો ભવદ્ભિર્ નૃપતેઃ કરઃ ।
યદર્થમાગતાસ્તસ્માન્નાત્ર સ્થેયં મહાધનૈઃ

યદર્થમાગતાઃ કાર્યં તન્નિષ્પન્નં કિમસ્યતે ।
ભવદ્ભિર્ ગમ્યતાં નન્દ તચ્છીઘ્રં નિજગોકુલમ્

મમાપિ બાલકસ્તત્ર રોહિણી પ્રભવો હિ યઃ ।
સ રક્ષણીયો ભવતા યથાયં તનયો નિજઃ

ઇત્યુક્તાઃ પ્રયયુર્ગોપા નન્દગોપપુરોગમાઃ ।
શકટારોપિતૈર્ ભાડૈઃ કરં દત્ત્વા મહાબલાઃ

વસતાં ગોકુલે તેષાં પૂતના બાલઘાતિની ।
સુપ્તં કૃષ્ણમુપાદાય રાત્રૌ તસ્મૈ સ્તનં દદૌ

યસ્મૈ યસ્મૈ સ્તનં રાત્રૌ પૂતના સંપ્રયચ્છતિ ।
તસ્યતસ્ય ક્ષણેનાઙ્ગં બાલકસ્યોપહન્યતે

કૃષ્ણસ્તુ તત્સ્તનં ગાઢં કરાભ્યામતિપીડિતમ્ ।
ગૃહીત્વા પ્રાણસહિતં પપૌક્રોધસમન્વિતઃ

સાતિમુક્તમહારાવા વિચ્છિન્નસ્ત્રાયુબન્ધના ।
પપાત પૂતના ભૂમૌ મ્રિયમાણાતિભીષણા

તન્નાદશ્રુતિસંત્રસ્તાઃ પ્રવુદ્ધાસ્તે વ્રજૌકસઃ ।
દદૃશુઃ પૂતનોત્સંગે કૃષ્ણં તાં ચ નિપાતિતામ્

આદાય કૃષ્ણં સંત્રસ્તા યશોદાપિ દ્વિજોત્તમ ।
ગોપુચ્છભ્રામણેનાથ બાલદોષમપાકરોત્

ગોકરીષમુપાદાય નન્દગોપોપિ મસ્તકે ।
કૃષ્ણસ્ય પ્રદદો રક્ષાં કુર્વશ્ચૈતદુદીરયન્

નન્દગોપ ઉવાચ
રક્ષતુ ત્વામશેષાણાં ભૂતાનાં પ્રભવો હરિઃ ।
યસ્ય નાભિસમુદ્ભૂતપઙ્કજાદભવજ્જગત્

યેન દંષ્ટ્રાગ્રવિધૃતા ધારયત્યવનિર્જગત્ ।
વરાહરૂપધૃગ્દેવઃસ ત્વાં રક્ષતુ કેશવઃ

નખાઙ્કુરવિનિર્ભિન્નવૈરિવક્ષસ્થલો વિભુઃ ।
નૃસિંહરૂપી સર્વત્ર રક્ષતુ ત્વાં જનાર્દનઃ

વામનો રક્ષતુ સદા ભવન્તં યઃ ક્ષણાદભૂત્ ।
ત્રિવિક્રમઃ ક્રમાક્રાન્તત્રૈલોક્યઃ સ્ફુરદાયુધઃ

શિરસ્તે પાતુ ગોવિન્દઃ કણ્ઠં રક્ષતુ કેશવઃ ।
ગુહ્યં ચ જઠરં વિષ્ણુર્જઘે પાદૌ જનાર્દનઃ

મુખં બાહૂ પ્રબાહૂ ચ મનઃ સર્વેદ્રિયાણિ ચ ।
રક્ષત્વવ્યાહતૈશ્વર્યસ્તવ નારાયણો ઽવ્યયઃ

શાર્ઙ્ગચક્રગદાપાણેઃ શઙ્ખનાદહતાઃ ક્ષયમ્ ।
ગચ્છન્તુ પ્રેતકૂષ્માણ્ડરાક્ષસા યે તવાહિતાઃ

ત્વાં પાતુ દિક્ષુ વૈકુણ્ઠો વિદિક્ષુ મધુસૂદનઃ ।
હૃષીકેશોંઽબરે ભૂમૌ રક્ષતુ ત્વાં મહીધરઃ

શ્રીપરાશર ઉવાચ
એવં કૃતસ્વસ્ત્યયનો નન્દગોપેન બાલકઃ ।
શાયિતઃ શકટસ્યાધો બાલપર્યઙ્કિકાતલે

તે ચ ગોપા મહદ્દૃષ્ટ્વા પૂતનાયાઃ કલેવરમ્ ।
મૃતાયાઃ પરમં ત્રાસં વિસ્મયં ચ તદા યયુઃ