વિષ્ણુ પુરાણ · અધ્યાય 5.4

ઇતિ શ્રિવિષ્ણુમહાપુરાણે પઞ્ચમાંશે તૃતીયો ઽધ્યાયઃ (3)
શ્રીપરાશર ઉવાચ
કંસસ્તતોદ્વિગ્નમનાઃ પ્રાહ સર્વાન્મહાસુરાન્ ।
પ્રલંબકેશિપ્રમુખાનાહૂયાસુરપુઙ્ગવાન્

કંસ ઉવાચ
હે પ્રલંબ મહાબાહો કેશિન્ ધેનુક પૂતને ।
અરિષ્ટાદ્યાસ્તથૈવાન્યે શ્રૂયતાં વચનં મમ

માં હન્તુમમરૈર્ યત્નઃ કૃતઃ કિલ દુરાત્મભિઃ ।
મદ્વીર્યતાપિતાન્વીરો ન ત્વેતાન્ગણયામ્યહમ્

કિમિન્દ્રેણાલ્પવીર્યેણ કિં હરેણૈકચારિણા ।
હરિણા વાપિ કિં સાધ્યં છિદ્રેષ્વસુરઘાતિના

કિમાદિત્યૈઃ કિં વસુભિર્ અલ્પવીર્યૈઃ કિમગ્નિભિઃ ।
કિંવાન્યૈર્ અમરૈઃ સર્વૈર્ મદ્બાહુબલનિર્જિતૈઃ

કિં ન દૃષ્ટોમરપતિર્મયા સંયુગમેત્ય સઃ ।
પૃષ્ઠેનૈવ વહન્બાણાનપગચ્છન્નવક્ષસા

મદ્રાષ્ટ્રે વારિતા વૃષ્ટિર્યદા શક્રેણ કિં તદા ।
મદ્બાણભિન્નૈર્ જલદૈર્ આપો મુક્તાયથેપ્સિતાઃ

કિમુર્વ્યામવનીપાલા મદ્બાહુબલભીરવઃ ।
તે સર્વે સન્નતિં યાતા જરાસંધમૃતે ગુરમ્

અમરેષુ મમાવજ્ઞા જાયતે દૈત્યપુઙ્ગવાઃ ।
હાસ્યં મે જાયતે વીરાસ્ તેષુ યત્નપરેષ્વપિ

તથાપિ ખલુ દુષ્ટાનાં તેષામપ્યધિકં મયા ।
અપકારાય દૈત્યેન્દ્રા યતનીયં દુરાત્મનામ્

તદ્યે યશસ્વિનઃ કેચિત્પૃથિવ્યાં યે ચ યજ્વનઃ ।
કાર્યો દેવાપકારાય તેષાં સર્વાત્મના વધઃ

ઉત્પન્નશ્ચાપિ મે મૃત્યુર્ભૂતપૂર્વઃસ વૈ કિલ ।
ઇત્યેતદ્દારિકા પ્રાહ દેવકીગર્ભસંભવા

તસ્માદ્બાલેષુ ચ પરો યત્નઃ કાર્યો મહીતલે ।
યત્રોદ્રિક્તં બલં બાલે સ હન્તવ્યઃ પ્રયત્નતઃ

ઇત્યાજ્ઞાપ્યાસુરાન્કસઃ પ્રવિશ્યાશુ ગૃહં તતઃ ।
મુમોચ વસુદેવં ચ દેવકીં ચ નિરોદતઃ

કંસ ઉવાચ
યુવયોર્ઘાતિતા ગર્ભા વૃથૈવૈતે મયાધુના ।
કોપ્યન્ય એવ નાશાય મમ ગર્ભઃસમુદ્યતઃ

તદલં પરિતાપેન નુનં તદ્ભાવિનો હિ તે ।
અર્ભકા યુવયોર્દેષાચ્ચાયુષો યદ્વિયોજિતાઃ

શ્રીપરાશર ઉવાચ
ઇત્યાશ્વાસ્ય વિમુક્ત્વા ચ કંસસ્તૌ પરિશઙ્કિતઃ ।
અન્તર્ગૃહં દ્વિજશ્રેષ્ઠ પ્રવિવેશ તતઃ સ્વકમ્