Vishnu Purana · Chapter 5.35

iti śrīviṣṇumahāpurāṇe pañjamāṃśe catustriṃśo 'dhyāyaḥ (34)
maitreya uvāca
bhūya evāhamicchāmi balabhadrasya dhīmataḥ /
śrotuṃ parākramaṃ brahman tanmamākhyātumarhasi

yamunākarṣaṇādīni śrutāni bhagavanmayā /
tatkathyatāṃ mahābhāga yadanyatkṛtavānbalaḥ

śrīparāśara uvāca
maitreya śruyatāṃ karma yadrāmeṇābhavatkṛtam /
anante nāprameyena śeṣeṇa dharaṇīdhṛtā

suyodhanasya tanayāṃ svayaṃvarakṛtakṣaṇām /
balādādattavānvīraḥ sāṃbo jāṃbavatīsutaḥ

tataḥ kruddhāmahāvīryāḥ karṇaduryodhanādayaḥ /
bhīṣmadroṇādayaścainaṃ babandhuryudhi nirjitam

tacchutvā yādavāḥsarve krodhaṃ duryodhanādiṣu /
maitreya cakruḥ kṛṣṇaś ca tānnihantuṃ mahodyamam

tānnivārya balaḥ prāha madalolakalākṣaram /
mokṣyanti te madvacanādyāsyāmyeko hi kauravān

śrīparāśara uvāca
baladevastato dṛṣṭvā nagaraṃ nāgasāhvayam /
bāhyopavanamadhye 'bhūnna viveśa ca tatpuram

balamāgatamājñāya bhūpā duryodhanādayaḥ /
gāmarghyamudakaṃ caiva rāmāya pratyavedayan

gṛhītvā vidhivatsarvaṃ tatastānāha kauravān /
ājñāpayatyugrasenaḥsāṃbamāśu vimuñcata

tatastadvacanaṃ śrutvā bhīṣmadroṇādayo nṛpāḥ /
karmaduryodhanādyāś ca cukṣubhurdvijasattama

ūcuś ca kupitāḥsarve bāhlikādyāś ca kauravāḥ /
arājyārhaṃ yadorvaśamavekṣya musalāyudha

bhobhoḥ kimetadbhavatā balabhadreritaṃ vacaḥ /
ājñāṃ kurukulotthānāṃ yādavaḥ kaḥ pradāsyati

ugraseno 'pi yadyājñāṃ kauravāṇāṃ pradāsyati /
tadalaṃ pāṇḍuraiś chatrair nṛpayogyair viḍaṃbanaiḥ

tadgaccha bala mā vā tvaṃ sāṃbamanyāyaceṣṭitam /
vimokṣyāmo na bhavataścograsenasya śāsanāt

praṇatiryā kṛtāsmākaṃ mānyānāṃ kukurāndhakaiḥ /
na nāma sā kṛtā keyamājñā svāmini bhṛtyataḥ

garvamāropitā yūyaṃ samānāsanabhojanaiḥ /
ko doṣo bhavatāṃ nītiryatprītyā nāvalokitā

asmābhir argho bhavato yoyaṃ bala niveditaḥ /
premṇaitannaitadasmākaṃ kulādyuṣmatkulocitam

śrīparāśara uvāca
ityuktvā kuravaḥ sāṃbaṃ muñcāmo na hareḥsutam /
kṛtaitaniścayastūrṇaṃ viviśurgajasāhvayam

mattaḥ kopena cāghūrmastatodhikṣepajanmanā /
utthāya pārṣṇyā vasudhāṃ jaghāna sa halāyudhaḥ

tato vidāritā pṛthvī pārṣṇighātānmahātmanaḥ /
āsphoṭayāmāsa tadā diśaḥ śabdena pūrayan

uvāca cātitāmrākṣo bhṛkuṭīkuṭilānanaḥ

aha madāvalepoyamasārāṇāṃ durātmanām /
kauravāṇāṃ mahīpatvamasmākaṃ kila kālajam /
ugrasenasya yenājñāṃ manyante 'dyapi laṅghanam

ugrasenaḥ samadhyāste sudhārmā na śacīpatiḥ /
dhiṅmānuṣaśatocchiṣṭe tuṣṭireṣāṃ nṛpāsane

pārijātataroḥ puṣpamañjarīrvanitājanaḥ /
bibharti yasya bhatyānāṃ so 'pyeṣāṃ na mahīpatiḥ

samastabhūbhṛtāṃ nātha ugrasenaḥ sa tiṣṭhatu /
adya niṣkauravāmurvī kṛtvā yāsyāmi tatpurīm

karṇaṃ duryodhanaṃ droṇamadya bhīṣmaṃ sabāhlikam /
duḥśasanādīnbhūriṃ ca bhūriśravasameva ca

somadattaṃ śalaṃ caiva bhīmārjunayudhiṣṭhirān /
yamau ca kauravāṃścānyānhatvā sāśvarathadvipān

vīramādāya taṃ sāṃbaṃ sapatnīkaṃ tataḥ purīm /
dvārakāmugrasenādīngatvā drakṣyāmi bāndhavān

atha vā kauravāvāsaṃ samastaiḥ kurubhiḥ saha /
bhāgīrathyāṃ kṣipāmyāśu nagaraṃ nāgasāhvayam

śrīparāśara uvāca
ityuktvā madaraktākṣaḥ karṣaṇādhomukhaṃ halam /
prākāravapradurgasya cakarṣa musalāyudhaḥ

āghūrṇitaṃ tatsahasā tato vai hāstinaṃ puram /
dṛṣṭvā saṃkṣubdhahṛdayāścukṣubhuḥsarvakauravāḥ

rāmarāma mahābāho kṣamyatāṃ kṣamyatāṃ tvayā /
upasaṃhriyatāṃ kopaḥ prasīda musalāyudha

eṣa sāṃbaḥsapatnīkastavaniryātito balāt /
avijñātaprabhāvāṇāṃ kṣmayatāmaparādhinām

śrīparāśara uvāca
tato niryātayāmāsuḥsāṃbaṃ patnīsamanvitam /
niṣkramya svapurāttūrṇaṃ kauravā munipuṅgava

bhīṣmadroṇakṛpādīnāṃ praṇamya vadatāṃ priyam /
kṣāntameva mayetyāha balo balavatāṃ varaḥ

adyāpyāghūrṇitākāraṃ lakṣyate tatpuraṃ dvija /
eṣa prabhāvo rāmasya balaśauryopalakṣaṇaḥ

tatastu kauravāḥsāṃbaṃ saṃpūjya bali nā saha /
preṣayāmāsurudvāhadhanabhāryāsamanvitam