Vishnu Purana · Chapter 5.34

iti śrīviṣṇumahāpurāṇe pañcamāṃśe trayastriṃśo 'dhyāyaḥ (33)
maitreya uvāca
cakre karma mahacchaurirbībhraṇo mānuṣīṃ tanum /
jigāya śakraṃ śarvaṃ ca sarvāndevāṃś ca līlayā

yac cānyad akarot karma divyaceṣṭavighātakṛt /
tatkathyatāṃ mahābhāga paraṃ kautūhalaṃ hi me

śrīparāśara uvāca
gadato mama viprarṣe śrūyatāmidamādarāt /
narāvatāre kṛṣṇena dagdhā vārāṇasī yathā

paiṇḍrako vāsudevastu vāsudevo 'bhavadbhuvi /
avatīrmastvamityukto janair ajñānamohitaiḥ

sa mene vāsudevohamavatīrṇo mahītale /
naṣṭasmṛtistataḥsarvaṃ viṣṇucihnamacīkarat

dūtaṃ ca preṣayāmāsa kṛṣṇāya sumahātmane /
tyaktvā cakrādikaṃ cihnaṃ madīyaṃ nāma cātmanaḥ

vāsudevātmakaṃ mūḍha tyaktvā sarvamaśeṣataḥ /
ātmano jīvitārthāya tato me praṇati vraja

ityuktaḥsaṃprahasyainaṃ dūtaṃ prāhajanārdanaḥ /
nijacihnamahaṃ cakraṃ samutsṛkṣye tvayīti vai

vācyaś ca paiṇḍrako gatvā tvayā dūta vaco mama /
jñātas tvadvākyasadbhāvo yatkāryaṃ tadvidhīyatām

gṛhītacihnaveṣohamāgamiṣyāmi te puram /
utsrakṣyāmi ca taccakraṃ nijacihnamasaṃśayam

ājñāpūrvaṃ ca yadidamāgaccheti tvayoditam /
saṃpādayiṣye śvastubhyaṃ samāgamyāvilaṃbitam

śaraṇaṃ te samabhyetya kartāsmi nṛpate tathā /
yathā tvatto bhayaṃ bhūyo na me kiñcid bhaviṣyati

śrīparāśara uvāca
ityuktepagate dūte saṃsmṛtyābhyāgataṃ hariḥ /
garutmantamathāruhya tvaritastatpuraṃ yayau

tatastu keśavodyogaṃ śrutvā kāśīpatistadā /
sarvasainyaparivāraḥ pārṣṇigrāha upāyayau

tato balena mahatā kāśīrājabalena ca /
paiṇḍrako vāsudevo 'sau keśavābhimukho yayau

taṃ dadarśa harirdūrādudārasyandane sthitam /
cakrahastaṃ gadāśārṅgabāhuṃ pāṇigatāṃbujam

sragdharaṃ pītavasanaṃ suparmaracitadhvajam /
vakṣasthale kṛtaṃ cāsya śrīvatsaṃ dadṛśe hariḥ

kirīṭakuṇḍaladharaṃ nānāratnopaśobhitam /
taṃ dṛṣṭvā bhāvagaṃbhīraṃ jahāsa garuḍadhvajaḥ

yuyudhe ca balenāsya hastyaśvabalinā dvija /
nistriṃśāsigadāśūlaśaktikārmukaśālinā

kṣaṇena śārṅganirmuktaiḥ śarair arividāraṇaiḥ /
gadācakranipātaiś ca sūdayāmāsa tadbalam

kāśīrājabalaṃ caivaṃ kṣayaṃ nītvā janārdanaḥ /
uvāca paiṇḍrakaṃ mūḍhamātmacihnopalakṣitam

śrībhagavānuvāca
paiṇḍrakoktaṃ tvayā yattudūtavaktreṇa māṃ prati /
samutsṛjeti cihnāni tatte saṃpādayāmyaham

cakrametatsamutsṛṣṭaṃ gadeyaṃ te visarjitā /
garutmāneṣa cotsṛṣṭaḥsamārohatu te dhvajam

śrīparāśara uvāca
ityuccārya vimuktena cakreṇāsau vidāritaḥ /
pātito gadayā bhagno dhvajaścāsya garutmatā

tato hāhākṛte loke kāśīpuryadhipo balī /
yuyudhe vāsudevena mitrasyāpacitau sthitaḥ

tataḥ śārṅgadhanurmuktaiś chittvā tasya śiraḥ śaraiḥ /
kāśīpuryāṃ sa cikṣepa kurvaṃllokasya vismayam

hatvā ta pauḍrakaṃ śauri kāśīrājaṃ ca sānugam /
punardvāravatīṃ prāpto reme svargagato yatā

tacchiraḥ patitaṃ tatradṛṣṭvā kāśīpateḥ pure /
janaḥ kimetadityāha cchinnaṃ keneti vismitaḥ

jñātvā taṃ vāsudevena hataṃ tasya sutastataḥ /
purohitena sahitastoṣayāmāsa śaṅkaram

avimukte mahākṣetre toṣitastena śaṅkaraḥ /
varaṃ vṛṇīṣveti tadā taṃ provāca nṛpātmajam

sa vavre bhagavankṛtyā pitṛhanturvadhāya me /
samutiṣṭhatu kṛṣṇasya tvatprasādānmaheśvara

śrīparāśara uvāca
evaṃ bhaviṣyatītyukte dakṣiṇāgneranantaram /
mahākṛtyā samuttasthau tasyaivāgnervināśanī

tato jvālākarālāsyā jvalatkeśakapālikā /
kṛṣṇakṛṣṇeti kupitā kṛtyā dvāravarīṃ yayau

tāmavekṣya janastrāsādvicalallocano mune /
yayau śaraṇyaṃ jagatāṃ śaraṇaṃ madhusūdanam

kāśīrājasuteneyamārādhya vṛṣabhadhvajam /
utpāditā mahākṛtyetyavagamyātha cakriṇā

jahikṛtyāmimāmugrāṃ vahnijvālājaṭālakām /
cakramutsṛṣṭamakṣeṣu krīḍāsaktena līlayā

tadagnimālājaṭilajvālodgārātibhīṣaṇām /
kṛtyāmanujagāmāśu viṣṇucakraṃ sudarśanam

cakrapratāpanirdagdhā kṛtyā māheśvarī tadā /
nanāśa veginī vegāttadapyanujagāma tām

kṛtyā vārāṇasīmeva praviveśa tvarānvitā /
viṣṇucakrapratihataprabhāvā munisattama

tataḥ kāśībalaṃ bhūri pramathānāṃ tathā balam /
samastaśastrāstrayutaṃ cakrasyābhimukhaṃ yayau

śastrāstramokṣacaturaṃ dagdhvā tadbalamojasā /
kṛtyā garbhamaśeṣāṃ tāṃ tadā vārāṇasīṃpurīm

sabhūbhṛdbhṛtyapaurāṃ tu sāśvamātaṅgamānavām /
aśeṣagoṣṭhakośāṃ tāṃ durnirikṣyāṃ surair api

jvālāpariṣkṛtāśeṣagṛhaprākāracatvarām /
dadāha taddhareścakraṃ sakalāmeva tāṃ purīm

akṣīṇāmarṣamatyugraṃ sādhyasādhanasaspṛham /
taccakraṃ prasphuraddīpti viṣṇorabhyāyayau karam