Vishnu Purana · Chapter 5.33

iti śrīviṣṇumahāpurāṇe pañcamāṃśe dvātriṃśo 'dhyāyaḥ (32)
śrīparāśara uvāca
bāṇopi praṇipatyāgre maitreyāha trilocanam /
deva bāhusahasreṇa nirviṇṇosmyāhavaṃ vinā

kaccinmamaiṣāṃ bāhūnāṃ sāphalyajanako raṇaḥ /
bhaviṣyati vinā yuddhaṃ bhārāya mama kiṃ bhujaiḥ

śrīśaṅkara uvāca
mayūradhvajabhaṅgaste yadā bāṇā bhaviṣyati /
piśitāśijanānandaṃ prapsyase tvaṃ tadā raṇam

śrīparāśara uvāca
tataḥ praṇamya varadaṃ śaṃbhumabhyāgato gṛham /
sabhagnaṃ dhvajamālokya hṛṣṭo harṣaṃ punaryayau

etasminneva kāle tu yogavidyābalena tam /
aniruddhamathāninye citralekhā varāpsarāḥ

kanyāntaḥpuramabhyetya ramamāṇaṃ sahoṣayā /
vijñāya rakṣiṇo gatvā śaśaṃsurdaityabhūpate

vyādiṣṭaṃ kiṅkarāṇāṃ tu sainyaṃ tena mahātmanā /
jaghāna parighaṃ ghoramādāya paravīrahā

hateṣu teṣu bāṇopi rathasthastadvadhodyataḥ /
yudhyamāno yathāśakti yaduvīreṇa nirjitaḥ

māyayā yuyudhe tena sa tadā mantricoditaḥ /
tatastaṃ pannagāstreṇa babandha yadunandanam

dvāravatyāṃ kva yāto 'sāvaniruddheti jalpatām /
yadūnāmācacakṣe taṃ baddhaṃ bāṇena nāradaḥ

taṃ śośitapuraṃ nītaṃ śrutvā vidyāvidagdhayā /
yoṣitā pratyayaṃ jagmuryādavā nāmarair iti

tato garuḍamāruhya smṛtamātrāgataṃ hariḥ /
balapradyumnasahito bāṇasya prayayau puram

purapraveśe pramathair yuddhamāsīnmahātmanaḥ /
yayau bāṇapurābhyāśaṃ nītvā tānsaṃkṣayaṃ hariḥ

tatastripādastriśirā jvaro māheśvaro mahān /
bāṇarakṣārthamabhyetya yuyudhe śārṅgadhanvanā

tadbhasmasparśasaṃbhūtatāpaḥ kṛṣṇāṅgasaṃgamāt /
avāpa baladevopi śramamāmīlitekṣaṇaḥ

tataḥsa yuddhyamānastu saha devena śārṅgiṇā /
vaiṣṇavena jvareṇāśu kṛṣṇadehānnirākṛtaḥ

nārāyaṇabhujāghātapāripījanavihvalam /
taṃ vīkṣya kṣamyatāmasyetyāha devaḥ pitāmahaḥ

tataś ca kṣāntameveti proktvā taṃ vaiṣṇavaṃ jvaram /
ātmanyevalayaṃ ninye bhagavānmadhusūdanaḥ

jvara uvāca
mama tvāya samaṃ yuddhaṃ ye smarīṣyanti mānavāḥ /
vijvarāste bhaviṣyantī tyuktvā cainaṃ yayau jvaraḥ

tatognīnbhagavānpañca jitvā nītvā tathā kṣayam /
dānavānāṃ balaṃ kṛṣṇaścūrṇayāmāsa līlayā

tataḥsamastasainyena daiteyānāṃ baleḥsutaḥ /
yuyudhe śaṅkaraścaiva kārttikeyaś ca śauriṇā

hariśaṅkarayoryuddhamatīvāsītsudāruṇam /
cukṣubhuḥsa kalā lokāḥ śastrāstrāṃśupratāpitiḥ

pralayoyamaśeṣasya jagato nūnamāgataḥ /
menire tridaśāstatra vartamāne mahāraṇe

jṛṃbha kāstreṇa govindo jṛṃbhayāmāsa śaṅkaram /
tataḥ praṇemurdaiteyāḥ pramathāś ca samantataḥ

jṛṃbhābhibhūtasyu haro rathopastha upāviśat /
na śaśāka tato yoddhuṃ kṛṣṇenākliṣṭakarmaṇā

garujakṣatavāhaś ca pradyumnāstreṇa pīḍitaḥ /
kṛṣṇahuṅkāranirdhūtaśaktiścāpayayau guhaḥ

jṛṃbhite śaṅkare naṣṭe daityasainye guhe jite /
nīte pramathasainye ca saṃkṣayaṃ śārṅgadhanvanā

nandinā saṃgṛhītāśvamadhirūḍho mahāratham /
bāṇastatrāyayau yoddhuṃ kṛṣṇakārṣṇibalaiḥ saha

balabhadro mahāvīryo bāṇasainyamanekadhā /
vivyādha bāṇaiḥ prabhraśya dharmataścāpalāyata

ākṛṣya lāṅgalāgreṇa mukalenāśu tāḍitam /
balaṃ balena dadṛśe bāṇo bāṇaiś ca cakriṇā

tataḥ kṛṣṇena bāṇasya yuddhamāsītsudāruṇam

samasyatoriṣūndīptānkāyatrāṇavibhedinaḥ /
kṛṣṇaściccheda bāṇais tān bāṇena prahitāñchitān /
vivyādha keśavaṃ bāṇo bāṇaṃ vivyādha cakradhṛk

mumucāte tathāstrāṇi bāṇakṛṣṇau jigīṣayā /
parasparakṣatikarau lāghavādaniśaṃ dvija

bhidyamāneṣvaśeṣeṣu śareṣvastre ca sīdati /
prācuryeṇa tato bāṇaṃ hantuṃ cakre harirmanaḥ

tatorkaśatasaṃghātatejasā sadṛśadyuti /
jagrāha daityacakrārirhariścakraṃ sudarśanam

muñcato bāṇanāśāya tataścakraṃ madhudviṣaḥ /
nagnā daiteyavidyābhūtkoṭarī purato hareḥ

tāmagrato harirdṛṣṭvā mīlitākṣaḥsudarśanam /
mumoca bāṇamuddiśya cchettuṃ bāhuvanaṃ ripoḥ

krameṇa tattu bāhūnāṃ bāṇasyācyutacoditam /
chedaṃ cakre 'surāpāstaśastrau ghakṣapaṇādṛtam

chinne bāhuvane tattu karasthaṃ madhusūtanaḥ /
mumukṣurbāṇanāśāya vijñātastripuradviṣā

samupetyāha govindaṃ sāmapūrvamumāpatiḥ /
vilokya bāmaṃ dādaḍacchedāsṛksrāvavarṣiṇam

śaṅkara uvāca
kṛṣṇakṛṣṇa jagannātha jāne tvāṃ puruṣottamam /
pareśaṃ paramātmānamanādinidhanaṃ harim

devatiryaṅmanuṣyeṣu śarīragrahaṇātmikā /
līleyaṃ sarvabhūtasya tava ceṣṭopalakṣaṇā

tatprasīdābhayaṃ dattaṃ bāṇasyāsya mayā prabho /
tattvāya nānṛtaṃ kāryaṃ yanmayā vyāhṛtaṃ vacaḥ

asmatsaṃśrayadṛptoyaṃ nāparādhī tavāvyaya /
mayā dattavaro daityastatastvāṃ kṣamayāmyaham

śrīparāśara uvāca
ityuktaḥ prāha govidaḥ śulapāṇimumāpatim /
prasannapadano bhūtvā gatāmarṣo 'suraṃ prati

śrībhagavānuvāca
yuṣmaddattavaro bāṇo jīvatāmeṣa śaṅkara /
tvadvākyagauravādetanmayā cakraṃ nivartitam

tvayā yadabhayaṃ dattaṃ taddattamakhilaṃ mayā /
matto 'vibhinnamātmānaṃ draṣṭumarhasi śaṅkara

yohaṃ sa tvaṃ jagaccedaṃ sadevāsuramānuṣam /
matto nānyadaśeṣaṃ yattattvañjñātumihārhasi

avidyāmohitātmānaḥ puruṣā bhinnadarśinaḥ /
vadanti bhedaṃ paśyanti cāvayorantaraṃ hara

prasanno 'haṃ gamiṣyāmi tvaṃ gaccha vṛṣabhadhvaja

śrīparāśara uvāca
ityuktvā prayayau kṛṣṇaḥ prādyumniryatra tiṣṭhati /
tadbandhaphaṇino neśurgaruḍānilapothitāḥ

tato 'niruddhamāropya sapatnīkaṃ garutmati /
ājagmurdvārakāṃ rāmakārṣṇidāmodarāḥ purīm

putrapautraiḥ parivṛtastatra reme janārdanaḥ /
devībhiḥ satataṃ vipra bhūbhārataramecchayā