Vishnu Purana · Chapter 5.25

iti śrīviṣṇumahāpurāṇe pañcamāṃśe caturviṃśodhyāyaḥ (24)
śrīparāśara uvāca
vane vicaratas tasya saha gopair mahātmanaḥ /
mānuṣacchadmarūpasya śeṣasya dharaṇīdhṛtaḥ

niṣpādito rukāryasya kāryoṇorvīpracāriṇaḥ /
upabhogārthamatyarthaṃ varuṇaḥ prāha vāruṇīm

abhīṣṭā sarvadā yasya madire tvaṃ mahaujasaḥ /
anantasyopabhogāya tasya gaccha mude śubhe

ityuktā vāruṇī tena sannidhānamathākaret /
vṛndāvanasamutpannakadaṃ batarukoṭare

vicaran baladevo 'pi madirāgandhamuttamam /
āghrāya madirātarṣamavāpātha varānanaḥ

tataḥ kadaṃbātsahasāmadyadhārāṃ sa lāṅgalī /
patantīṃ vīkṣya maitreya prayayau paramāṃ mudam

papau ca gopagopībhiḥ samupeto mudānvitaḥ /
pragīyamāno lalītaṃ gītavādyaviśāradaiḥ

sa mattotyantagharmāṃbhaḥkaṇikāmauktikojjvalaḥ /
āgaccha yamune snātumicchāmītyāha vihvalaḥ

tasya vācaṃ nadī sā tu mattoktāmavamatya vai /
nājagāma tataḥ ktruddho halaṃ jagrāha lāṅgalī

gṛhītvā tāṃ halāntena cakarṣa madavihvalaḥ /
pāpe nāyāsi nāyāsi gamyatāmicchayānyataḥ

sākṛṣṭā sahasā tena mārgaṃ saṃtyajya nimragā /
yatrāste balabhadro 'sau plāvayāmāsa tadvanam

śorīriṇī tadābhyetya trāsavihvalalocanā /
prasīdetyabravīdrāmaṃ muñca māṃ musalāyudha

tatastasyāḥ suvacanamākarṇya sa halā yudhaḥ /
so 'bravīdavajānāsi mama śauryabale nadi /
so 'haṃ tvāṃ halapātena nayiṣyāmi sahasradhā

śrīparāśara uvāca
ityuktayāti saṃtrāsāttayā nadya prasāditaḥ /
bhūbhāge plāvite tasminmumoca yamunāṃ balaḥ

tataḥ snātasya vai kāntir ajāyata mahātmanaḥ

avataṃsotpalaṃ cāru gṛhītvaikaṃ ca kuṇḍalam /
varuṇaprahitāṃ cāsmai mālāmamlānapaṅkajām /
samudrābhe tathā vastre nīle lakṣmīrayacchata

kṛtāvataṃsaḥ sa tadā cārukuṃḍalabhūṣitaḥ /
nīlāṃbaradharaḥsragvī śuśubhe kāntisaṃyutaḥ

itthaṃ vibhūṣito reme tatra rāmas tathā vraje /
māsadvayena yātaś ca sa punardvārakāṃ purīm

revatīṃ nāma tanayāṃ raivatasya mahīpateḥ /
upayeme balastasyāṃ jajñāte niśitolmukau