વિષ્ણુ પુરાણ · અધ્યાય 5.25

ઇતિ શ્રીવિષ્ણુમહાપુરાણે પઞ્ચમાંશે ચતુર્વિંશોધ્યાયઃ (24)
શ્રીપરાશર ઉવાચ
વને વિચરતસ્ તસ્ય સહ ગોપૈર્ મહાત્મનઃ ।
માનુષચ્છદ્મરૂપસ્ય શેષસ્ય ધરણીધૃતઃ

નિષ્પાદિતો રુકાર્યસ્ય કાર્યોણોર્વીપ્રચારિણઃ ।
ઉપભોગાર્થમત્યર્થં વરુણઃ પ્રાહ વારુણીમ્

અભીષ્ટા સર્વદા યસ્ય મદિરે ત્વં મહૌજસઃ ।
અનન્તસ્યોપભોગાય તસ્ય ગચ્છ મુદે શુભે

ઇત્યુક્તા વારુણી તેન સન્નિધાનમથાકરેત્ ।
વૃન્દાવનસમુત્પન્નકદં બતરુકોટરે

વિચરન્ બલદેવો ઽપિ મદિરાગન્ધમુત્તમમ્ ।
આઘ્રાય મદિરાતર્ષમવાપાથ વરાનનઃ

તતઃ કદંબાત્સહસામદ્યધારાં સ લાઙ્ગલી ।
પતન્તીં વીક્ષ્ય મૈત્રેય પ્રયયૌ પરમાં મુદમ્

પપૌ ચ ગોપગોપીભિઃ સમુપેતો મુદાન્વિતઃ ।
પ્રગીયમાનો લલીતં ગીતવાદ્યવિશારદૈઃ

સ મત્તોત્યન્તઘર્માંભઃકણિકામૌક્તિકોજ્જ્વલઃ ।
આગચ્છ યમુને સ્નાતુમિચ્છામીત્યાહ વિહ્વલઃ

તસ્ય વાચં નદી સા તુ મત્તોક્તામવમત્ય વૈ ।
નાજગામ તતઃ ક્ત્રુદ્ધો હલં જગ્રાહ લાઙ્ગલી

ગૃહીત્વા તાં હલાન્તેન ચકર્ષ મદવિહ્વલઃ ।
પાપે નાયાસિ નાયાસિ ગમ્યતામિચ્છયાન્યતઃ

સાકૃષ્ટા સહસા તેન માર્ગં સંત્યજ્ય નિમ્રગા ।
યત્રાસ્તે બલભદ્રો ઽસૌ પ્લાવયામાસ તદ્વનમ્

શોરીરિણી તદાભ્યેત્ય ત્રાસવિહ્વલલોચના ।
પ્રસીદેત્યબ્રવીદ્રામં મુઞ્ચ માં મુસલાયુધ

તતસ્તસ્યાઃ સુવચનમાકર્ણ્ય સ હલા યુધઃ ।
સો ઽબ્રવીદવજાનાસિ મમ શૌર્યબલે નદિ ।
સો ઽહં ત્વાં હલપાતેન નયિષ્યામિ સહસ્રધા

શ્રીપરાશર ઉવાચ
ઇત્યુક્તયાતિ સંત્રાસાત્તયા નદ્ય પ્રસાદિતઃ ।
ભૂભાગે પ્લાવિતે તસ્મિન્મુમોચ યમુનાં બલઃ

તતઃ સ્નાતસ્ય વૈ કાન્તિર્ અજાયત મહાત્મનઃ

અવતંસોત્પલં ચારુ ગૃહીત્વૈકં ચ કુણ્ડલમ્ ।
વરુણપ્રહિતાં ચાસ્મૈ માલામમ્લાનપઙ્કજામ્ ।
સમુદ્રાભે તથા વસ્ત્રે નીલે લક્ષ્મીરયચ્છત

કૃતાવતંસઃ સ તદા ચારુકુંડલભૂષિતઃ ।
નીલાંબરધરઃસ્રગ્વી શુશુભે કાન્તિસંયુતઃ

ઇત્થં વિભૂષિતો રેમે તત્ર રામસ્ તથા વ્રજે ।
માસદ્વયેન યાતશ્ ચ સ પુનર્દ્વારકાં પુરીમ્

રેવતીં નામ તનયાં રૈવતસ્ય મહીપતેઃ ।
ઉપયેમે બલસ્તસ્યાં જજ્ઞાતે નિશિતોલ્મુકૌ