Vishnu Purana · Chapter 5.24

iti śrīviṣṇumahāpurāṇeca pañcamāṃśe trayoviṃśo 'dhyāyaḥ (23)
śrīparāśara uvāca
itthaṃstutastadā tena mucukundena dhīmatā /
prāheśaḥ sarvabhūtānāmanādinidhano hariḥ

śrībhagavānuvāca
yathābhivāñchitāndivyāngacchalokānnarādhipa /
avyāhataparaiśvaryo matprasādopabṛṃhitaḥ

bhuktvā divyanmahā bhogānbhaviṣyasi mahākule /
jātismaro matprasādāttatomokṣamavāpsyasi

śrīparāśara uvāca
ityuktaḥ praṇipatyeśaṃ jagatāmacyutaṃ nṛpaḥ /
guhāmukhādviniṣkrāntataḥsa dadarśālpakānnarān

tataḥ kaliyugaṃ matvā prāptaṃ taptuṃ nṛpastapaḥ /
naranārāyaṇasthānaṃ prayayau gandhamādanam

kṛṣṇopi ghātayitvārimupāyena hi tadvalam /
jagrāha mathurāmetya hastyaśvasyandanojjvalam

ānīya cograsenāya dvāravatvāṃ nyavedayat /
parābhibhavaniḥ śaṅkaṃ babhūva ca yadoḥ kulam

baladevo 'pi maitreya praśāntākhilavigrahaḥ /
jñātidarśanasotkaṇṭhaḥ prayayau nandagokulam

tato gopāś ca gopyaś ca yathā pūrvam amitrajit /
tathaivābhyavadatpramṇā bahumānapuraḥsaram

sa kaiścit saṃpariṣvaktaḥ kāṃścicca pariṣasvaje /
hāsyaṃ cakre samaṃ kaiścid gopair gopījanais tathā

priyāṇyanekānyavadan gopāstatra halāyudham /
gopyaś ca premakupitāḥ procuḥserṣyamathāparāḥ

gopyaḥ papracchuraparā nāgarījanavallabham /
kaccidāste sukhaṃ kṛṣṇaścalapremalavātmakaḥ

asmacceṣṭāmapahasanna kaccitpurayoṣitām /
saubhāgyamāna madhikaṃ karoti kṣaṇasauhṛdaḥ

kaccitsmarati naḥ kṛṣṇo gītānugamanaṃ kalam /
apyasau mātaraṃ draṣṭu sakṛdapyāgamiṣyati

atha vā kiṃ tadālāpaiḥ kriyantāmaparāḥ kathāḥ /
yasyāsmabhir vinā tena vināsmākaṃ bhaviṣyati

pitā mātā tathā bhrātā bhartā bandhujanaś ca kim /
saṃtyaktastatkṛtesmābhir akṛtajñadhvajo hi saḥ

tathāpi kaccidālāpamihāgamanasaṃśrayam /
karoti kṛṣṇo vaktavyaṃ bhavatā rāma nānṛtam

dāmodaro 'sau govindaḥ purastrīsaktamānasaḥ /
apetaprītirasmāsu durdarśaḥ pratibhāti naḥ

āmantritaś ca kṛṣṇeti punardāmodareti ca /
jahasuḥsasvaraṃ gopyo hariṇā hṛtacetasaḥ

saṃdeśaiḥ sāmamadhuraiḥ premagarbhair agarvitaiḥ /
rāmeṇāśvāsitā gopyaḥ kṛṣṇasyātimanoharaiḥ

gopaiś ca pūrvavadrāmaḥ parihāsamanoharāḥ /
kathāścakāra reme ca saha tair vrajabhūmiṣu