વિષ્ણુ પુરાણ · અધ્યાય 5.24

ઇતિ શ્રીવિષ્ણુમહાપુરાણેચ પઞ્ચમાંશે ત્રયોવિંશો ઽધ્યાયઃ (23)
શ્રીપરાશર ઉવાચ
ઇત્થંસ્તુતસ્તદા તેન મુચુકુન્દેન ધીમતા ।
પ્રાહેશઃ સર્વભૂતાનામનાદિનિધનો હરિઃ

શ્રીભગવાનુવાચ
યથાભિવાઞ્છિતાન્દિવ્યાન્ગચ્છલોકાન્નરાધિપ ।
અવ્યાહતપરૈશ્વર્યો મત્પ્રસાદોપબૃંહિતઃ

ભુક્ત્વા દિવ્યન્મહા ભોગાન્ભવિષ્યસિ મહાકુલે ।
જાતિસ્મરો મત્પ્રસાદાત્તતોમોક્ષમવાપ્સ્યસિ

શ્રીપરાશર ઉવાચ
ઇત્યુક્તઃ પ્રણિપત્યેશં જગતામચ્યુતં નૃપઃ ।
ગુહામુખાદ્વિનિષ્ક્રાન્તતઃસ દદર્શાલ્પકાન્નરાન્

તતઃ કલિયુગં મત્વા પ્રાપ્તં તપ્તું નૃપસ્તપઃ ।
નરનારાયણસ્થાનં પ્રયયૌ ગન્ધમાદનમ્

કૃષ્ણોપિ ઘાતયિત્વારિમુપાયેન હિ તદ્વલમ્ ।
જગ્રાહ મથુરામેત્ય હસ્ત્યશ્વસ્યન્દનોજ્જ્વલમ્

આનીય ચોગ્રસેનાય દ્વારવત્વાં ન્યવેદયત્ ।
પરાભિભવનિઃ શઙ્કં બભૂવ ચ યદોઃ કુલમ્

બલદેવો ઽપિ મૈત્રેય પ્રશાન્તાખિલવિગ્રહઃ ।
જ્ઞાતિદર્શનસોત્કણ્ઠઃ પ્રયયૌ નન્દગોકુલમ્

તતો ગોપાશ્ ચ ગોપ્યશ્ ચ યથા પૂર્વમ્ અમિત્રજિત્ ।
તથૈવાભ્યવદત્પ્રમ્ણા બહુમાનપુરઃસરમ્

સ કૈશ્ચિત્ સંપરિષ્વક્તઃ કાંશ્ચિચ્ચ પરિષસ્વજે ।
હાસ્યં ચક્રે સમં કૈશ્ચિદ્ ગોપૈર્ ગોપીજનૈસ્ તથા

પ્રિયાણ્યનેકાન્યવદન્ ગોપાસ્તત્ર હલાયુધમ્ ।
ગોપ્યશ્ ચ પ્રેમકુપિતાઃ પ્રોચુઃસેર્ષ્યમથાપરાઃ

ગોપ્યઃ પપ્રચ્છુરપરા નાગરીજનવલ્લભમ્ ।
કચ્ચિદાસ્તે સુખં કૃષ્ણશ્ચલપ્રેમલવાત્મકઃ

અસ્મચ્ચેષ્ટામપહસન્ન કચ્ચિત્પુરયોષિતામ્ ।
સૌભાગ્યમાન મધિકં કરોતિ ક્ષણસૌહૃદઃ

કચ્ચિત્સ્મરતિ નઃ કૃષ્ણો ગીતાનુગમનં કલમ્ ।
અપ્યસૌ માતરં દ્રષ્ટુ સકૃદપ્યાગમિષ્યતિ

અથ વા કિં તદાલાપૈઃ ક્રિયન્તામપરાઃ કથાઃ ।
યસ્યાસ્મભિર્ વિના તેન વિનાસ્માકં ભવિષ્યતિ

પિતા માતા તથા ભ્રાતા ભર્તા બન્ધુજનશ્ ચ કિમ્ ।
સંત્યક્તસ્તત્કૃતેસ્માભિર્ અકૃતજ્ઞધ્વજો હિ સઃ

તથાપિ કચ્ચિદાલાપમિહાગમનસંશ્રયમ્ ।
કરોતિ કૃષ્ણો વક્તવ્યં ભવતા રામ નાનૃતમ્

દામોદરો ઽસૌ ગોવિન્દઃ પુરસ્ત્રીસક્તમાનસઃ ।
અપેતપ્રીતિરસ્માસુ દુર્દર્શઃ પ્રતિભાતિ નઃ

આમન્ત્રિતશ્ ચ કૃષ્ણેતિ પુનર્દામોદરેતિ ચ ।
જહસુઃસસ્વરં ગોપ્યો હરિણા હૃતચેતસઃ

સંદેશૈઃ સામમધુરૈઃ પ્રેમગર્ભૈર્ અગર્વિતૈઃ ।
રામેણાશ્વાસિતા ગોપ્યઃ કૃષ્ણસ્યાતિમનોહરૈઃ

ગોપૈશ્ ચ પૂર્વવદ્રામઃ પરિહાસમનોહરાઃ ।
કથાશ્ચકાર રેમે ચ સહ તૈર્ વ્રજભૂમિષુ