Vishnu Purana · Chapter 5.23

iti śrīviṣṇumahāpurāṇe pañcamāśe dvāviṃśo 'dhyāyaḥ (22)
śrīparāśara uvāca
gārgyaṃ goṣṭhyāṃ dvijaṃ śyālaḥṣaṇḍa ityuktavāndvija /
yadūnāṃ sannidhau sarve jahasuryādavāstadā

tataḥ kopaparītātmā dakṣiṇāpathametya saḥ /
sutamicchaṃstapastepe yaducakrabhayāvaham

ārādhayanmahādevaṃ lohacūrṇamabhakṣayat /
dadau varaṃ ca tuṣṭo 'smai varṣe tu dvādaśe haraḥ

saṃtoṣayāmāsa ca taṃ yavaneśo hyanātmajaḥ /
tadyoṣitsaṃgamāccāsya putro 'bhūdalisannibhaḥ

taṃ kālayavanaṃ nāma rāye sve yavaneśvaraḥ /
abhiṣicya vanaṃ yāto vajragrakaṭhinorasam

sa tu vīryamadonmattaḥ pṛthivyāṃ balino nṛpān /
apṛcchannāradastasmai kathayāmāsa yādavān

mlecchakoṭisahasrāṇāṃ sahasraiḥ so 'bhisaṃvṛtaḥ /
gajāśvarathasaṃpannaiś cakāra paramodyamam

prayayau sa vyavacchinnaṃ chinnayāno dinedine /
yādavānprati sāmarṣo maitreya mathurāṃ purīm

kṛṣṇo 'pi cintayāmāsa kṣapitaṃ yādavaṃ balam /
yavanena raṇe gamyaṃ māgadhasya bhaviṣyati

māgadhasya balaṃ kṣīṇaṃ sa kālayavano balī /
hantaitadevamāyātaṃ yadūnāṃ vyasanaṃ dvidhā

tasmāddurgaṃ kariṣyāmi yadūnāmaridurjayam /
striyo 'pi yatra yuddheyuḥ kiṃ punarvṛṣṇipuṅgavāḥ

mayi matte pramatte vā supte pravasite 'pi vā /
yādavābhibhavaṃ duṣṭā mā kurvaṃstvarayodhikāḥ

iti saṃcintya govindo yojanānāṃ mahodadhim /
yayāce dvādaśapurīṃ dvārakāṃ tatra nirmame

mahodyānāṃ mahāvaprāṃ taṭākaśataśobhitām /
prāsādagṛhasaṃbādhāmindrasyevāmarāvatīm

mathurāvāsinaṃ lokaṃ tatrānīya janārdanaḥ /
āsanne kālayavane mathurāṃ ca svayaṃ yayau

bahirāvāsite sainye mathurāyā nirāyudhaḥ /
nirjagāma ca govindo dadarśa yavanaś ca tam

sa jñātvā vāsudevaṃ taṃ bāhupraharaṇaṃ nṛpaḥ /
anuyāto mahāyogī cetobhiḥ prāpyate na yaḥ

tenānuyātaḥ kṛṣṇo 'pi praviveśa mahāguhām /
yatra śete mahāvīryo mucukundo nareśvaraḥ

so 'pi praviṣṭo yavano dṛṣṭvā śayyāgataṃ nṛpam /
pādena tāḍayāmāsa matvā kṛṣṇaṃ sudurmatiḥ

utthāya mucukundo 'pi dadarśa yavanaṃ nṛpaḥ

dṛṣṭamātraś ca tenāsau jajvāla yavanogninā /
tatkrodhajena maitreya bhasmībhūtaś ca tatkṣaṇāt

sa hi devāsure yuddhe gato hatvā mahāsurān /
nidrārtaḥsumahākālaṃ nidrāṃ vavre varaṃ surān

proktaś ca devaiḥ saṃsuptaṃ yastvāmutthāpayiṣyati /
dehajenāgninā sadyaḥsa tu bhasmībhaviṣyati

evaṃ dagdhvā sa taṃ pāpaṃ dṛṣṭvā ca madhusūdanam /
kastvamityāha so 'pyāha jātohaṃ śaśinaḥ kule /
vasudevasya tanayo yadorvaṃśasamudbavaḥ

mucukundo 'pi tatrāsau vṛddhagargyāvaco 'smarat

saṃsmṛtya praṇipatyainaṃ sarvaṃ sarveśvaraṃ harim /
prāha jñāto bhavān viṣṇor aṃśastvaṃ parameśvara

purā gārgyeṇa kathitamaṣṭāviṃśatime yuge /
dvāparānte harerjanma yaduvaṃśe bhaviṣyati

sa tvaṃ prāpto na saṃdeho martyānāmupakārakṛt

tathāhi sumahattejo nālaṃ soḍhumahaṃ tava /
tathāhi sajalāṃbhodanādadhīrataraṃ tava /
vākyaṃ namati caivorvī yuṣmatpādaprapīḍitā

devāsuramahāyuddhe daityasainyamahābhaṭāḥ /
na sehurmama te jaste tvattejo na sahāmyaham

saṃsārapatitasyaiko jantostvaṃ śaraṇaṃ param /
prasīda tvaṃ prapannārtihara nāśaya me 'śubham

tvaṃ payo nidhayaḥ śailasaritastvaṃ vanāni ca /
medinī gaganaṃ vāyurāpognistvaṃ tathā manaḥ

buddhiravyākṛtaprāṇāḥ prāṇeśastvaṃ tathā pumān /
puṃsaḥ parataraṃ yacca vyāpya janma vikāravat

śabdādihīnamajaramameyaṃ kṣayavarjitam /
avṛddhināśaṃ tadbrahma tvamādyantavivarjitam

tvatto 'marāḥsapitaro yakṣagandharvakinnarāḥ /
siddhāścāpsarasastvatto manuṣyāḥ paśavaḥ khagāḥ

sarīsṛpā mṛgāḥsarve tvattaḥsarve mahīruhāḥ /
yacca bhūtaṃ bhaviṣyaṃ ca kiñcidatra carācaram

mūrtāmūrtaṃ tathā cāpi sthūlaṃ sūkṣmataraṃ tathā /
tatsarvaṃ tvaṃ jagatkartā nāsti kiñcittvā yā vinā

mayā saṃsāracakre 'sminbhramatā bhagavaṃstadā /
tāpatrayābhibhūtena na prāptā nirvṛtiḥ kvicit

duḥkhānyeva sukhānīti mṛgatṛṣṇājalāśayāḥ /
mayā nātha gṛhītāni tāni tāpāya me 'bhavan

rājyamurvī balaṃ kośo mitrapakṣastathātmajāḥ /
bhāryā bhṛtya jano ye ca śabdādya viṣayāḥ prabho

sukhabuddhyā mayā sarvaṃ gṛhītamidamavyayam /
pariṇāme tadeveśa tāpātmakamabhūnmama

devalokagatiṃ prāpto nātha devagaṇo 'pi hi /
mattaḥsāhāyyakāmobhūcchāśvatī kutra nirvṛtiḥ

tvāmanārādhya jagatāṃ sarveṣāṃ prabhavāspadam /
śāśvatī prāpyate kena parameśvara nirvṛtiḥ

tvanmāyāmūḍhamanaso janmamṛtyujarādikān /
avāpya tāpānpaśyanti pretarājamanantaram

tato nijakriyāsūtinarakeṣvatidāruṇam /
prāpnuvanti narā duḥkhamasvarūpavidastava

ahamatyantaviṣayī mohitastava māyayā /
mamatvagarvagartāntarbhramāmi parameśvara

so 'haṃ tvāṃ śaraṇamapāramaprameyaṃ saṃprāptaḥ paramapadaṃ yato na kiñcit /
saṃsārabhramaparitāpataptacetānirvāṇe pariṇatadhāmni sābhilāṣaḥ