Vishnu Purana · Chapter 5.19

iti śrīviṣṇumahāpurāṇe pañcamāṃśe 'ṣṭāśo 'dhyāyaḥ (18)
śrīparāśara uvāca
evamantarjale viṣṇumabhiṣṭūya sa yādavaḥ /
arcayāmāsa sarveśaṃ dhūpapuṣpair manomayaiḥ

parityaktānyaviṣayo manastatra niveśya saḥ /
brahmabhūte ciraṃ sthitvā virarāma samādhinaḥ

kṛtakṛtyamivātmānaṃ manyamāmau mahāmatiḥ /
ājagāma rathaṃ bhūyo nirgamya yamunāṃbhasaḥ

dadarśa rāmakṛṣṇau ca yathāpurvamavasthitau /
vismitākṣastadākrūrastaṃ ca kṛṣṇo 'bhyabhāṣata

śrīkṛṣṇa uvāca
nūnaṃ te dṛṣṭamāścaryamakrūra yamunājale /
vismayotphullanayano bhavānsaṃlakṣyate yataḥ

akrūra uvāca
antarjale yadāścaryaṃ dṛṣṭaṃ tatra mayācyuta /
tadatrāpi hi paśyāmi mūrtimatpurataḥ sthitam

jagadetanmahāścaryarūpaṃ yasya mahātmanaḥ /
tenāścaryapareṇāhaṃ bhavatā kṛṣṇa saṃgataḥ

tatkimetena mathurāṃ yāsyāmo madhusūdana /
bibhemi kaṃsāddhigjanma paripiṇḍopajīvinām

ityuktvā codayāmāsa sa hayān vātaraṃhasaḥ /
saṃprāptaścāpi sāyāhne so 'krūro mathurāṃ purīm

vilokya mathurāṃ kṛṣṇaṃ rāmaṃ cāha sa yādavaḥ /
padybhāṃ yātaṃ mahāvīrau rathenaiko viśāmyaham

gantavyaṃ vasudevasya no bhavadybhāṃ tathā gṛham /
yuvayorhi kṛte vṛddhaḥsa kaṃsena nirasyate

śrīparāśara uvāca
ityuktvā praviveśātha so 'krūro mathurāṃ purīm /
praviṣṭau rāmakṛṣṇau ca rājamārgamupāgatau

strībhir naraiś ca sānandaṃ lotanair abhivīkṣitau /
jagmaturlīlayā vīrau mattau bālagajāviva

bhramamāṇau tato dṛṣṭvā rajakaṃ raṅgakārakam /
ayocetāṃ sūrūpāṇi vāsāṃsi rucirāṇi tau

kaṃsasya rajakaḥ so 'tha prasādārūḍhavismayaḥ /
bahūnyākṣepavākyāni prāhoccai rāmakeśavau

tatastalaprahāreṇa kṛṣṇastasya durātmanaḥ /
pātayāmāsa roṣeṇa rajakasya śiro bhuvi

hatvā'dāya ca vastrāṇi pītanīlāṃbarau tataḥ /
kṛṣṇarāmau mudā yuktau mālākāragṛhaṃ gatau

vikāsinetrayugalo mālākārotivismitaḥ /
etau kasya sutau yātau maitreyācintayattadā

pītanīlāṃbaradharau tau dṛṣṭvātimanoharau /
sa tarkayāmāsa tadā bhuvaṃ devāvupāgatau

vikāsimukhapadmābhyāṃ tābhyāṃ puṣpāṇi yācitaḥ /
bhivaṃ viṣṭabhya hastābhyāṃ pasparśa śirasā mahīm

prasādaparamau nāthau mama gehamupāgatau /
dhanyo 'hamarcayiṣyāmītyāha tau mālyajīvanaḥ

tataḥ prahṛṣṭavadanastayoḥ puṣpaṇi kāmataḥ /
cārūṇyetānyathaitāni pradadau sa pralobhayan

punaḥpunaḥ praṇamyobhau mālākāro narottamau /
dadau puṣpāṇi cārūṇi gandhavantyamalāni ca

mālākārāya kṛṣṇo pi prasannaḥ pradadau varān /
śrīstvāṃ matsaṃśrayā bhadra na kadācittyajiṣyati

balahānirna te saumya dhanahānirathāpi vā /
yāvaddināni tāvacca na naśiṣyati saṃtatiḥ

bhuktvā ca vipulānbhogāṃstvamante matprasādataḥ /
mamānusmaraṇaṃ prāpyadivyaṃ lokamavāpsyasi

dharme manaś ca te bhadra sārvakālaṃ bhaviṣyati /
yuṣmatsaṃtatijātānāṃ dhīrghamāyurbhaviṣyati

nopasargādikaṃ doṣaṃ yuṣmatsaṃtatisaṃbhavaḥ /
avāpsyati mahābhāgā yāvatsūryo bhaviṣyati

śrīparāśara uvāca
atyuktvā tadgṛhātkṛṣṇo baladevasahāyavān /
nirjagāma muniśreṣṭha mālākāreṇa pūjitaḥ