Vishnu Purana · Chapter 5.16

iti śrīviṣṇumahāpurāṇe pañcamāse pañcadaśo 'dhyāyaḥ (15)
śrīparāśara uvāca
keśī cāpi balodagraḥ kaṃsadūtaḥ pracoditaḥ /
kṛṣṇasya nidhanākāṅkṣī vṛndāvanamupāgamat

sa khurakṣatabhūpṛṣṭhaḥsaṭākṣepadhutāṃbudaḥ /
drutavikrāntacandrārkamārgo gopānupādravat

tasya deṣitaśabdena gopālā daityavājinaḥ /
gopyaś ca bhayasaṃvignā govindaṃ śaraṇaṃ yayuḥ

trāhitrāhiti govindaḥśrutvāteṣāṃ tato vacaḥ /
satoyajaladadhvānagaṃbhīramidamuktavān

alaṃ trāsena gopālāḥ keśinaḥ kiṃ bhayāturaiḥ /
bhavidbhir gopajātī yair vīravīryaṃ vilopyate

kimanonālpasāreṇa haṣitāṭopakāriṇā /
daiteyabalavāhyena valgatā duṣṭavājinā

ehyehi duṣṭa kṛṣṇo 'haṃ pūṣṇastviva pinākadhṛt /
pātayiṣyāmi daśanānvadanādakhilāṃstava

ityuktvāsphoṭya govindaḥ keśinaḥsaṃmukhaṃ yayau /
vivṛtāsyaś ca so 'py enaṃ daiteyāśva upādravat

bāhumābhogitaṃ kṛtvā makhe tasya janārdanaḥ /
praveśayāmāsa tadā keśino duṣṭavājinaḥ

keśino vadanaṃ tena viśatā kṛṣṇabāhunā /
śātitā daśanāḥ petuḥ sitābbrāvayavā iva

kṛṣṇasya vavṛdhe bāhuḥ keśidehagato dvija /
vināśāya yathā vyādhirāsaṃbhūterupekṣitaḥ

vipāṭitoṣṭho bahulaṃ saphenaṃ rudhiraṃ vaman /
sokṣiṇī vivṛte cakre viśiṣṭe muktabandhane

jadhāna dharaṇīṃ pādaiḥ śakṛnmūtraṃ samutsṛjan /
svedārdragātrasśāntaś ca niryatnaḥso 'bhavattadā

vyāditāsyamahāṃrandhraḥso 'suraḥ kṛṣṇabāhunā /
nipātito dvidhā bhūmau vaidyutena yathā drumaḥ

dvipāde pṛṣṭhapucchārdha śravaṇaikākṣināsike /
keśinaste dvidhā bhūte śakale dve virejatuḥ

hatvā tu keśinaṃ kṛṣṇo gopālair muditair vṛtaḥ /
anāyastatanuḥsvastho hasaṃstatraiva tasthivān

tato gopyaś ca gopāś ca hate keśini vismitāḥ /
tuṣṭuvuḥ puṇḍarīkākṣamanurāgamanoramam

athāhāntarhito vipra nārado jalade sthitaḥ /
keśinaṃ nihataṃ dṛṣṭvā harṣanirbharamānasaḥ

sādhusādhu jagannātha līlayaiva yadacyuta /
nihato 'yaṃ tvayā keśī kleśadastridivaukāsām

yuddhotsukohamatyarthaṃ naravājimahāhavam /
abhūtapūrvamanyatra draṣṭuṃ svargādihāgataḥ

karmāṇya'trāvatāre te kṛtāni madhusūdana /
yāni tair vismitaṃ cetastoṣametena me gatam

turaṅgasyāsya śakropi kṛṣṇa devāś ca bibhyati /
dhutakesārajālasya hreṣato 'bhrāvalokinaḥ

yasmāttvayaiṣa duṣṭātmā hataḥ keśī janārdana /
tasmātkeśavanāmnā tvaṃ loke khyāto bhaviṣyasi

svastyastu te gamiṣyāmi kaṃsayuddhe 'dhunā punaḥ /
paraśvo 'ha sameṣyāmi tvayā keśiniṣūdana

ugrasenasute kaṃse sānuge vinipātite /
bhārāvatārakartā tvaṃ pṛthivyā pṛthivīdhara

tatrāneka prakārāṇi yuddhāni pṛthivīkṣitām /
draṣṭavyāni mayā yuṣmatpraṇītāni janārdana

so 'haṃ yāsyāmi govinda devakāryaṃ mahatkṛtam /
tvayaiva viditaṃ sarvaṃ svasti te 'stu vrajāmyaham

nārade tu gate kṛṣṇaḥ saha gopaiḥ sabhājitaḥ /
viveśa gokulaṃ gopīnetrapānaikabhājanam