Vishnu Purana · Chapter 5.15

iti śrīviṣṇumahāpurāṇe pañcamāṃśe caturdaśodhyāyaḥ (14)
śrīparāśara uvāca
kakudmati hate 'riṣṭe dhenuke vinipātite /
pralaṃbe nidhanaṃ nīte dhṛte govardhanācale

damite kāliye nāge bhagnetuṅgadrumadvaye /
hatāyāṃ pūtanāyāṃ ca śakaṭe parivartite

kaṃsāya nāradaḥ prāha yathāvṛttamanukramāt /
yaśodādevakīgarbaparivṛttadyaśeṣataḥ

śrutvā tatsakalaṃ kaṃso nāradāddevadarśanāt /
vasudevaṃ prati tadā kopaṃ cakre sudurmatiḥ

sotikopādupālabhya sarvayādavasaṃsadi /
jagarja yādavāṃścaiva kāryaṃ caitadacintayat

yāvanna balamārūḍhau rāmakṛṣṇau subālakau /
tāvadeva mayā vadhyāvasādhyau rūḍhayauvanau

cāṇūrotra mahāvīryo muṣṭikaś ca mahābalaḥ /
etābhyāṃ mallayuddhena mārayiṣyāma durmatī

dhanurmahamahāyogavyājenānīya tau vrajāt /
tathā tathā yatiṣyāmi yāsyete saṃkṣayaṃ yathā

śvaphalpatanayaṃ śūramakrūraṃ yadupuṅgavam /
tayorānayanārthāya preṣayiṣyāmi gokulam

vṛndā vanacaraṃ ghoramādekṣyāmi ca keśinam /
tatraivāsāvatibalastāvubhau ghātayiṣyati

gajaḥ kuvalāyāpīḍo matsakāśamihāgatau /
ghātayiṣyati vā goṣau vasudevasutāvubhau

śrīparāśara uvāca
ityālocya sa duṣṭātmā kaṃso rāmajanārdanau /
hantuṃ kṛtam artivīrāv akrūraṃ vākyam avṛbravīt

kaṃsa uvāca
bho bho dānapate vākyaṃ kriyatāṃ prītaye mama /
itaḥ syandanamāruhya gamyatāṃ nandagokulam

vasudevasutau tatra viṣṇor aṃśasamudbhavau /
nāśāya kila saṃbhūtau mama duṣṭau pravardhataḥ

dhanurmaho mamāpyatra caturdaśyāṃ bhaviṣyati /
āneyau bhavatā gatvā mallayuddhāya tatra tau

cāṇūramuṣṭikau mallau niyuddhakuśalau mama /
tābhyāṃ sahānayoryuddhaṃ sarvaloko 'tra paśyatu

gajaḥ kuvalayāpīḍo mahāmātrapracoditaḥ /
sa vā haniṣyate pāpau vasudevātmajau śiśu

tau hatvā vasudevaṃ ca nandagopaṃ ca durmatim /
haniṣye pitaraṃ cainamugrasenaṃ sudurmatim

tataḥsamastagopānāṃ godhanānyakhilānyaham /
vittaṃ cāpahariṣyāmi duṣṭānāṃ madvadhaiṣiṇām

tvāmṛte yādavāścaite dviṣo dānapate mama /
eteṣāṃ ca vadhāyāhaṃ yatiṣye 'nukramāttataḥ

tadā niṣkaṇṭakaṃ sarvaṃ rājyametadayādavam /
prasādhiṣye tvayā tasmānmatprītyai vīra gamyatām

yathā ca māhiṣaṃ sarpirdadhicāpyupahārya vai /
gopāḥsamānayantvāśu tathā vācyāstvayā ca te

śrīparāśara uvāca
ityājñaptastadākrūromahābhāgavato dvaja /
prītimānabhavatkṛṣṇaṃ śvodrakṣyāmīti satvaraḥ

tathetyaktvā ca rājānaṃ rathamāruhya śobhanam /
niścakrāma tataḥ puryā mathurāyā madhupriyaḥ