વિષ્ણુ પુરાણ · અધ્યાય 5.15

ઇતિ શ્રીવિષ્ણુમહાપુરાણે પઞ્ચમાંશે ચતુર્દશોધ્યાયઃ (14)
શ્રીપરાશર ઉવાચ
કકુદ્મતિ હતે ઽરિષ્ટે ધેનુકે વિનિપાતિતે ।
પ્રલંબે નિધનં નીતે ધૃતે ગોવર્ધનાચલે

દમિતે કાલિયે નાગે ભગ્નેતુઙ્ગદ્રુમદ્વયે ।
હતાયાં પૂતનાયાં ચ શકટે પરિવર્તિતે

કંસાય નારદઃ પ્રાહ યથાવૃત્તમનુક્રમાત્ ।
યશોદાદેવકીગર્બપરિવૃત્તદ્યશેષતઃ

શ્રુત્વા તત્સકલં કંસો નારદાદ્દેવદર્શનાત્ ।
વસુદેવં પ્રતિ તદા કોપં ચક્રે સુદુર્મતિઃ

સોતિકોપાદુપાલભ્ય સર્વયાદવસંસદિ ।
જગર્જ યાદવાંશ્ચૈવ કાર્યં ચૈતદચિન્તયત્

યાવન્ન બલમારૂઢૌ રામકૃષ્ણૌ સુબાલકૌ ।
તાવદેવ મયા વધ્યાવસાધ્યૌ રૂઢયૌવનૌ

ચાણૂરોત્ર મહાવીર્યો મુષ્ટિકશ્ ચ મહાબલઃ ।
એતાભ્યાં મલ્લયુદ્ધેન મારયિષ્યામ દુર્મતી

ધનુર્મહમહાયોગવ્યાજેનાનીય તૌ વ્રજાત્ ।
તથા તથા યતિષ્યામિ યાસ્યેતે સંક્ષયં યથા

શ્વફલ્પતનયં શૂરમક્રૂરં યદુપુઙ્ગવમ્ ।
તયોરાનયનાર્થાય પ્રેષયિષ્યામિ ગોકુલમ્

વૃન્દા વનચરં ઘોરમાદેક્ષ્યામિ ચ કેશિનમ્ ।
તત્રૈવાસાવતિબલસ્તાવુભૌ ઘાતયિષ્યતિ

ગજઃ કુવલાયાપીડો મત્સકાશમિહાગતૌ ।
ઘાતયિષ્યતિ વા ગોષૌ વસુદેવસુતાવુભૌ

શ્રીપરાશર ઉવાચ
ઇત્યાલોચ્ય સ દુષ્ટાત્મા કંસો રામજનાર્દનૌ ।
હન્તું કૃતમ્ અર્તિવીરાવ્ અક્રૂરં વાક્યમ્ અવૃબ્રવીત્

કંસ ઉવાચ
ભો ભો દાનપતે વાક્યં ક્રિયતાં પ્રીતયે મમ ।
ઇતઃ સ્યન્દનમારુહ્ય ગમ્યતાં નન્દગોકુલમ્

વસુદેવસુતૌ તત્ર વિષ્ણોર્ અંશસમુદ્ભવૌ ।
નાશાય કિલ સંભૂતૌ મમ દુષ્ટૌ પ્રવર્ધતઃ

ધનુર્મહો મમાપ્યત્ર ચતુર્દશ્યાં ભવિષ્યતિ ।
આનેયૌ ભવતા ગત્વા મલ્લયુદ્ધાય તત્ર તૌ

ચાણૂરમુષ્ટિકૌ મલ્લૌ નિયુદ્ધકુશલૌ મમ ।
તાભ્યાં સહાનયોર્યુદ્ધં સર્વલોકો ઽત્ર પશ્યતુ

ગજઃ કુવલયાપીડો મહામાત્રપ્રચોદિતઃ ।
સ વા હનિષ્યતે પાપૌ વસુદેવાત્મજૌ શિશુ

તૌ હત્વા વસુદેવં ચ નન્દગોપં ચ દુર્મતિમ્ ।
હનિષ્યે પિતરં ચૈનમુગ્રસેનં સુદુર્મતિમ્

તતઃસમસ્તગોપાનાં ગોધનાન્યખિલાન્યહમ્ ।
વિત્તં ચાપહરિષ્યામિ દુષ્ટાનાં મદ્વધૈષિણામ્

ત્વામૃતે યાદવાશ્ચૈતે દ્વિષો દાનપતે મમ ।
એતેષાં ચ વધાયાહં યતિષ્યે ઽનુક્રમાત્તતઃ

તદા નિષ્કણ્ટકં સર્વં રાજ્યમેતદયાદવમ્ ।
પ્રસાધિષ્યે ત્વયા તસ્માન્મત્પ્રીત્યૈ વીર ગમ્યતામ્

યથા ચ માહિષં સર્પિર્દધિચાપ્યુપહાર્ય વૈ ।
ગોપાઃસમાનયન્ત્વાશુ તથા વાચ્યાસ્ત્વયા ચ તે

શ્રીપરાશર ઉવાચ
ઇત્યાજ્ઞપ્તસ્તદાક્રૂરોમહાભાગવતો દ્વજ ।
પ્રીતિમાનભવત્કૃષ્ણં શ્વોદ્રક્ષ્યામીતિ સત્વરઃ

તથેત્યક્ત્વા ચ રાજાનં રથમારુહ્ય શોભનમ્ ।
નિશ્ચક્રામ તતઃ પુર્યા મથુરાયા મધુપ્રિયઃ