Vishnu Purana · Chapter 5.13

iti śrīviṣṇumahāpurāṇe pañcamāṃśe dvādaśo 'dhyāyaḥ (12)
śrīparāśara uvāca
gate śakre tu gopālāḥ kṛṣṇamakliṣṭakāriṇam /
ūcuḥ prītyā dhṛtaṃ dṛṣṭvā tena govardhanācalam

vayamasmānmahābhāga bhagavanmahato bhayāt /
gāvaś ca bhavatā trātā giridhāraṇakarmaṇā

bālakrīḍeyamatulā gopālatvaṃ jugupsitam /
divyaṃ ca bhavataḥ karma kimetattāta kathyatām

kālīyo damitastoye dhenuko vinipātitaḥ /
dhṛto govardhanaścāyaṃ śaṅkitāni manāṃsi naḥ

satyaṃ satyaṃ hareḥ pādau śapāmo 'mita vikrama /
yathāvadvīryamālokya na tvāṃ manyāmahe naram

prītiḥsastrīkumārasya vrajasya tvayi keśava /
karma cedamaśakyaṃ yatsamastais tridaśerapi

bālatvaṃ cātivīryatvaṃ janma cāsmāsu śobhanam /
cintyamānamameyātmañchaṅkāṃ kṛṣṇa prayacchati

devo vā dānavo vā tvaṃ yakṣo gandharva eva vā /
kimasmākaṃ vicāreṇa bāndhavo 'si namostu te

śrīparāśara uvāca
kṣaṇaṃ bhūtvā tvasau tūṣṇīṃ kiñcitpraṇayakopavān /
ity evam uktas tair gopaiḥ kṛṣṇo 'py āha mahāmatiḥ

śrībhagavānuvāca
matsaṃbandhena vo gopā yadi lajjā na jāyate /
ślāghyo vāhaṃ tataḥ kiṃ vo vicāreṇa prayojanam

yadi vo 'sti mayi prītiḥ ślāghyo 'haṃ bhavatāṃ yadi /
tadātmabandhusadṛśī buddhirvaḥ kriyātāṃ mayi

nāhaṃ devo na gāndharvo na yakṣo na ca dānavaḥ /
ahaṃ vo bāndhavo jāto naitaccintyamito 'nyathā

śrīparāśara uvāca
iti śrutvā harervākyaṃ baddhamaunāstato vanam /
yayurgopā mahābhāga tasmanpraṇayakopini

kṛṣṇastu vimalaṃ vyoma śaraccandrasya candrikām /
tadā kumudinīṃ phullāmāmoditadigantarām

vanarājīṃ tathā kūjandbhṛṅgamālāmanoharām /
vilokya saha gopībhir manaścakre ratiṃ prati

vinā rāmeṇa madhuramatīva vanitāpriyam /
jagau kalapadaṃ śauristāramandrakṛtakramam

ramyaṃ gītadhvaniṃ śrutvā saṃtyajyāvasathāṃstadā /
ājagmustvaritā gopyo yatrāste madhusūdanaḥ

śanaiḥ śanair jagau gopī kācittasya layānugam /
dattāvadhānā kācicca tameva manasāsmarat

kācitkṛṣṇetikṛṣṇeti proktvā lajjāmupāyayau /
yayau ca kācitpremāndhā tatpārśvamavilaṃbitam

kāciccāvasathasyānte sthitvā dṛṣṭvā bahirgurum /
tanmayatvena govindaṃ dadhyau mīlitalocanā

taccittavimalāhlādakṣīṇapuṇyacayā tathā /
tadaprāptimahāduḥkhavilīnāśeṣapātakā

cintayatī jagatsūtiṃ parabrahmasvarūpiṇam /
nirucchvāsatayā muktiṃ gatānyā gopakanyakā

gopīparivṛto rātriṃ śaraccandramanoramām /
mānayāmāsa govindo rāsāraṃbharasotsukaḥ

gopyaś ca vṛndaśaḥ kṛṣṇaceṣṭāsvāyattamūrtayaḥ /
anyadeśaṃ gate kṛṣṇe cerurvṛndāvanāntaram

kṛṣṇe nibaddhahṛdayā idamūcuḥ parasparam

kṛṣṇo 'hameṣa lalitaṃ vrajāmyālokyatāṃ gatiḥ /
anyā bravīnti kṛṣṇasya mama gītirniśamyatām

duṣṭakāliya tiṣṭhātra kṛṣṇohamiti cāparā /
bāhumāsphoṭya kṛṣṇasya līlayā sarvamādade

anyā bravīti bho gopā niḥśaṅkaiḥ sthīyatāmiti /
alaṃ vṛṣṭibhayenātra dhṛto govardhano mayā

dhenuko 'yaṃ mayākṣipto vicarantu yathecchayā /
gāvo bravīti caivānyā kṛṣṇalīlānusāriṇī

evaṃ nānāprakārāsu kṛṣṇaceṣṭa su tāstadā /
gopyo vyagrāḥsamaṃ cerū ramyaṃ vṛndāvanāntaram

vilokyaikā bhuvaṃ prāha gopī gopavarāṅganā /
pulakāñcitasarvāṅgī vikāsinayanotpalā

dhvajabajrāṅkuśābjāṅkarekhāvantyāli paśyata /
padānyetāni kṛṣṇasya līlālalitagāminaḥ

kāpi tena samāyātā kṛtapuṇyā madālasā /
padāni tasyāścaitāni ghanānyalpatanūni ca

puṣpāpacayamatroccaiś cakre dāmodare dhruvam /
yenāgrākrāntamātrāṇi padānyatra mahātmanaḥ

atropaviśya vai tena kācitpuṣpair alaṅkṛtā /
anyajanmani sarvātmā viṣṇur abhyarcitas tayā

puṣpabandhanasaṃmānakṛtamānāmapāsya tām /
nandagopasuto yāto mārgeṇānena paśyata

anuyātainamatrānyā nitaṃbabharamantharā /
yā gantavye drutaṃ yāti nimnapādāgrasaṃsthitiḥ

hastanyastāgrahasteyaṃ tena yāti tathā sakhī /
anāyattapadanyāsā lakṣyate padapaddhatiḥ

hastasaṃsparśamātreṇa dhūrtenaiṣā vimānitā /
nairāśyānmandagāminyā nivṛttaṃ lakṣyate padam

nūnamuktā tvarāmīti punareṣyāmitentikam /
tena kṛṣṇena yenaiṣā tvaritā padapaddhatiḥ

praviṣṭo gahanaṃ kṛṣṇaḥ padamatra na lakṣyate /
nivartadhvaṃ śaśāṅkasya naitaddī dhitigocare

nivṛttāstāstadā gopyo nirāśāḥ kṛṣṇadarśane /
yamunātīramāsādya jagustaccaritaṃ tathā

tato dadṛśurāyāntaṃ vikāsimukhapaṅkajam /
gopyas trailokyagoptāraṃ kṛṣṇamakliṣṭaceṣṭitam

kācidālokya govindamāyāntamatiharṣitā /
kṛṣṇākṛṣṇeti kṛṣṇeti prāha nānyadudīrayat

kācidbhrūbhaṅguraṃ kṛtvā lalāṭaphalakaṃ harim /
vilokya netrabhṛṅgābhyāṃ papau tanmukhapaṅkajam

kācidālokya govindaṃ nimīlitavilocanā /
tasyaiva rūpaṃ dhyāyantī yogārūḍheva sā babhau

tataḥ kāñcit priyālāpaiḥ kāñcid bhrūbhaṅgavīkṣitaiḥ /
ninye 'nunayamanyāṃ ca karasparśena mādhavaḥ

tābhiḥ prasannacittābhir gopībhiḥ saha sādaram /
rarāsa rāsagoṣṭhībhir udāracarito hariḥ

rāsamaṇḍalabandhopi kṛṣṇapārśvamanujjhatā /
gopījanena naivābhūdekasthānasthirātmanā

hastena gṛhya caikaikāṃ gopīnāṃ rāsamaṇḍale /
cakāra tatkarasparśanimīlitadṛśaṃ hariḥ

tataḥ pravavṛte rāsaścaladvalayanisvanaḥ /
anuyātaśaratkāvyagoyagītiranukramāt

kṛṣṇaḥ śaraccandramasaṃ kaumudīṃ kumudākaram /
jagau gopījanastveka kṛṣṇanāma punaḥpunaḥ

parivṛttiśrameṇaikā caladvalayalāpinīm /
dadau bāhulatāṃ skandhe gopī madhunighātinaḥ

kācitpravilasadbāhuṃ parirabhya cucuṃba tam /
gopīgītastutivyājānnipuṇā madhusūdanam

gopīkapolasaṃśleṣamabhigamya harerbhujau /
pulakodgamasasyāya svedāṃbughanatāṃ gatau

rāsageyaṃ jagau kṛṣṇo yāvattārataradhvaniḥ /
sādhu kṛṣṇeti kṛṣṇeti tāvattā dviguṇaṃ jaguḥ

gatenugamanaṃ cakrurvalanaṃ saṃmukhaṃ yayuḥ /
pratilomānulomābhyāṃ bhejurgaupāṅganā harim

sa tathā saha gopībhī rarāsa madhurūdanaḥ /
yathābdakoṭipratimaḥ śraṇastena vinābhavat

tā vāryamāṇāḥ patibhiḥ pitṛbhir bhrātṛbhis tathā /
kṛṣṇaṃ gopāṅganā rātrau ramayanti ratipriyāḥ

so 'pi kaiśorakavayo mānayanmadhusūdanaḥ /
reme tābhir ameyātmā kṣapāsukṣapitāhitaḥ

tadbhartṛṣu tathā tāsu sarvabhūteṣu ceśvaraḥ /
ātmasvarūparūpo 'sau vyāpī vāyuriva sthitaḥ

yathā samastabhūteṣu nabhogniḥ pṛthivī jalam /
vāyuścātmā tathaivāsau vyāpya sarvamavasthitaḥ