Vishnu Purana · Chapter 5.11

iti śrīviṣṇumahāpurāṇe pañcamāṃśe daśamo 'dhyāyaḥ (10)
śrīparāśara uvāca
makhe pratihate śakro maitreyātiruṣānvitaḥ /
saṃvartakaṃ nāma gaṇaṃ toyadānāmathābratrīt

bhobho medhā niśamyaitadvacanaṃ gadato mama /
ājñānantaramevāśu kriyatāmavicāritam

nandagopaḥsudurbuddhirgopair anyaiḥ sahāyavān /
kṛṣṇāśrayaṃ balādhmāto makhabhaṅgamacīkarat

ājīvo yāḥ parasteṣāṃ gāvastasya ca kāraṇam /
tāgāvo vṛṣṭipātena pīḍyantāṃ vacanānmama

aham apyadriśṛṅgābhaṃ tuṅgam āruhya vāraṇam /
sāhāyyaṃ vaḥ kariṣyāmi vāyvambūtsargayojitam

śrīparāśara uvāca
ityājñaptās tatas tena mumucus te balāhakāḥ /
vātavarṣaṃ mahābhīmamabhāvāya gavāṃ dvija

tataḥ kṣaṇena pṛthivī kakubhoṃbaram eva ca /
ekaṃ dhārāmahāsārapūreṇanābhavanmune

vidyullatākaṣāghātatrastair iva ghanair ghanam /
nādāpūritadikcakrair dhārāsāramapātyata

andhakārīkṛte loke varṣadbhir aniśaṃ ghanaiḥ /
adhaścordhvaṃ ca tiryak ca jagadāpyamivābhavat

gāvastu tena patatā varṣavātena vāginā /
dhūtāḥ prāṇāñ jahuḥ sannatrikasakthisirodharāḥ

kroḍena vatsān ākramya tasthur anyā mahāmune /
gāvo vivatsāś ca kṛtā vāripūreṇa cāparāḥ

vatsāś ca dīnavadanā vātakaṃpitakandharāḥ /
trāhitrāhītyalpasabdāḥ kṛṣṇamūcurivāturāḥ

tatastadgokulaṃ sarvaṃ gogopīgopasaṃkulam /
atīvārtaṃ harirdaṣṭvā maitreyācintayattadā

etatkṛtaṃ mahendreṇa sakhabhaṅgavirodhinā /
tadetadakhilaṃ goṣṭhaṃ trātavyamadhunā māya

imam adrimahaṃ dhairyād utpāṭyoruśikhāghanam /
dhārayiṣyāmi goṣṭhasya pṛthucchatramivopari

śrīparāśara uvāca
iti kṛtvāmatiṃ kṛṣṇo govardhanamahīdharam /
utpāṭyaikakareṇeva dhārayāmāsa līlayā

gopāṃścaha hasañchauriḥsamutpāṭitabhūdharaḥ /
viśadhvamatratvaritāḥ kṛtaṃ varṣanivāraṇam

sunivāteṣu deśeṣu yathā joṣamihāsyatām /
praviśyatāṃ na bhetavyaṃ girīpātācca nirbhayaiḥ

ityuktāstena te gopā viviśurgodhanaiḥ saha /
śakaṭāropitair bhāḍair gopyaścāsārapīḍitāḥ

kṛṣṇopi taṃ dadhāraiva śailamatyantaniścalam /
vrajaukavāsibhir harṣavismitākṣair nirikṣitaḥ

gopagopījanair hṛṣṭaiḥ prītivistāritekṣaṇaiḥ /
saṃstūyamānacaritaḥ kṛṣṇaḥ śailamadhārayat

saptarātraṃ mahāmedhā vavarṣurnandagokule /
indreṇa coditā vipra gopānāṃ nāśakāriṇā

tato dhṛte mahāśaile paritrāte ca gokule /
mithyāpratijño balabhidvārayāmāsa tānghanān

vyabhre nabhasi devendre vitathātmavacasyatha /
niṣkramya gokulaṃ hṛṣṭaṃ svasthānaṃ punarāgamat

mumoca kṛṣṇopi tadā govardhanamahācalam /
svasthāne vismitamukhair dṛṣṭas tais tu vrajaukasaiḥ