Scripture Library

Vishnu Purana · Chapter 4.7

4.7.1

iti śriviṣṇumahāpurāṇe caturthāṃśe ṣaṣṭho 'dhyāyaḥ (6)
śrīparāśara uvāca
tasyāpyāyurdhīmānamāvasurvaniśvāvasuḥśrutāyuḥ śayurayutāyuritisaṃjñāḥ ṣaṭ putrā abhavan

4.7.2

tathāmāvasorbhīmanāmā putro 'bhavat

4.7.3

bhīmasya kāñcanaḥ kāñcanātsuhotraḥ tasyāpi jahnuḥ

4.7.4

yo 'sau yajñavāṭamakhilaṃ gaṅgāṃbhasā plāvitamavalokya krodhasaṃraktalocano bhagavantaṃ yajñapuruṣamātmani parameṇa samādhinā samāropyākhilameva gaṅgāmapibat

4.7.5

athainaṃ devarṣayaḥ prasādayāmāsuḥ

4.7.6

duhitṛtve cāsya gaṅgāmanayan

4.7.7

jahnoś ca sumandurnāma putro 'bhavat

4.7.8

tasyāpyajakastato balākāśvastasmātkuśastasyāpi kuśāṃbukuśanābhādhūrtarajaso vasuśceti catvāraḥ putrā babhūvuḥ

4.7.9

teṣāṃ kuśāṃbaḥ śakratulyo mutro bhavedititapaścakāra

4.7.10

taṃ cogratapasamavalokya mā bhavatvanayo 'mattulyo vīrya ityātmanaivāsyendraḥ putratvamagacchat

4.7.11

sa gādhirnāma putraḥ kauśiko 'bhavat

4.7.12

gādhiś ca satyavatīṃ kanyāmajanayat

4.7.13

tāṃ ca bhārgavaḥ ṛcīko vavre

4.7.14

gādhirapyatiroṣaṇāyātivṛddhāya brāhmaṇāya dātumanicchannekataḥ śyāmakarmānāminduvarcasāmanilaraṃhasāmaśvānāṃ sahasraṃ kanyāśulkamayācata

4.7.15

tenāpyṛṣiṇā varumasakāśādu palabhyāśvatīrthotpannaṃ tādṛśamaśvasahasraṃ dattam

4.7.16

tatastāmṛcīkaḥ kanyāmupayeme

4.7.17

ṛcīkaś ca tasyāścarumapatyārtaṃ cakāra

4.7.18

tatprasāditaś ca tanmātre kṣatravaraputrotpattaye caramaparaṃ sādhayāmāsa

4.7.19

eṣa carurbhavatyā ayamaparaścarustvanmātrā samya gupayojya ityuktvā vanaṃ jagāma

4.7.20

upayogakāle catāṃ mātā satyavatīmāha

4.7.21

putri sarva evātmaputramatiguṇamabhilaṣati nātmajāyābhrātṛguṇeṣvatīvādṛto bhavatīti

4.7.22

torhasi mamātmīyaṃ caruṃ madīyaṃ carumātmanopayoktum

4.7.23

matputreṇa hi sakalabhūmaṇḍalaparipālanaṃ kāryaṃ kiyadvā brāhmaṇasya balavīryasaṃpadetyuktā sā svacaruṃ mātre dattavatī

4.7.24

atha vanādāgatya satyavatīmṛṣirapaśyat

4.7.25

āha caināmatipāpe kimidamakāryaṃ bhavatyā kṛtam atiraudraṃma te vapurlakṣyate

4.7.26

nīnaṃ tvāyā tvanmātṛsātkṛtaścārurūpayukto na yuktāmetat

4.7.27

mayā hi tatra carau sakalaiśvaryavīryasauryabalasaṃpadāropitā tvadīyacarāvapyakhilaśāntijñānatitikṣādibrāhmamaguṇasaṃpat

4.7.28

tacca viparītaṃ kurvantyāstavātiraudrāstradhāraṇapālananiṣṭhaḥ kṣatriyācāraḥ putro bhaviṣyati tasyāścopaśamarucirbrāhmaṇācāra ityākarṇyaiva sā tasya pādau jagrāha

4.7.29

praṇipatya cainamāha

4.7.30

bhagavanmayaitadajñānādanuṣṭhitaṃ prasādaṃ me kuru maivaṃvidhaḥ putro bhavatu kāmamevaṃvidhaḥ pautro bhavatvityukte munirapyāha

4.7.31

evamastviti

4.7.32

anantaraṃ ca sā jamadagnimajījanat

4.7.33

tanmātā ca viśvāmitraṃ janayāmāsa

4.7.34

satyavatyapi kauśikī nāma nadyabhavat

4.7.35

jamadagnirikṣvākuvaṃśodbhavasya reṇostanayāṃ reṇukāmupayeme

4.7.36

tasyāṃ cāśeṣakṣatrahantāraṃ paraśurāmasaṃjñaṃ bhagavataḥsakalalokagurornārāyaṇasyāṃśaṃ jamadagnirajījanat

4.7.37

viśvāmītraputrastu bhārgava eva śunaḥśepo daivair dattaḥ tataś ca devarātanāmābhavat

4.7.38

tataścānye madhuśchandodhanañjayakṛtadevāṣṭakakacchapaharirākhyā viśvāmitraputrā babhūvuḥ

4.7.39

teṣāṃ ca bahūni kauśikagotrāṇi ṛṣyantareṣu vivāhyānyabhavat

Original text: Viṣṇupurāṇa · Edition: Bombay : Venkatesvara Steam Press 1910 · Data entry members of the Sansknet Project · GRETIL (Göttingen) · CC BY-NC-SA 4.0