Scripture Library

Vishnu Purana · Chapter 4.3

4.3.1

iti śriviṣṇumahāpurāṇe caturthāśe dvitīyo 'dhyāyaḥ (2)
ataś ca mādhātuḥ putrasaṃtatirabhidhīyate

4.3.2

aṃbarīṣasya māndhātṛtanayasya yuvanāśvaḥ putro 'bhūt

4.3.3

tasmāddhārītaḥ yatoṅgiraso hārītā

4.3.4

rasātale mauneyā nāma gandharvā babhūvuḥṣaṭkoṭisaṃkhyātāstair aśeṣāṇi nāgakulānyapahṛtapradhānaratnādhipatyānyakriyanta

4.3.5

taiś ca gandharvavīryāvabūtair urageśvaraiḥ stūyamāno bhagavānaśeṣadeveśa āste tacchravaṇonmīlilonnidrapuṇḍarīkanayano jalaśayano nidrāvasānapravṛddhaḥ praṇipatyābhihitaḥ | bhagavannasmākametebhyo gandharvebhyo bhayamutpannaṃ kathamupaśamameṣyatīti

4.3.6

āha ca bhagavānanādinidhanapuruṣottamo yosau yauvanāśvasya māndhātuḥ purukutsanāmā putrastamahāmanupraviśya tānaśeṣān duṣṭagandharvānupaśamaṃ nayiṣyāmīti

4.3.7

tadākarṇya bhagavate jalaśāyine kṛtapraṇāmāḥ punarnāgalokamāgatāḥ pannagādhipatayo narmadāñca purukutsānayanāya codayāmāsuḥ

4.3.8

sā cainaṃ rasātalaṃ nītavatī

4.3.9

rasātalagataścāsau yabhagavattejasāpyāyitātmavīryaḥsakalagandharvānnijaghāna

4.3.10

punaś ca svapuramājagāma

4.3.11

sakalapannagādhipatayaś ca narmadāyai varaṃ daduḥ /
yattenusmaraṇasamavetaṃ nāmagrahaṇaṃ kariṣyati na tasya sarpaviṣabhayaṃ bhaviṣyatīti

4.3.12

atra ca ślokaḥ

4.3.13

narmadāyai namaḥ prātarnarmadāyai namo niśi /
namostu narmade tubhyaṃ trāhi māṃ viṣasarpataḥ

4.3.14

ityuccāryāharniśamandhakārapraveśe vā sarpair na daśyate na cāpi kṛtānusmaraṇabhujo viṣamapi bhuktamupaghātāya bhavati

4.3.15

purukutsāya saṃtativicchedo na bhaviṣyatītyuragapatayo paraṃ daduḥ

4.3.16

purukutso narmadāyāṃ trasaddasyumajījanat

4.3.17

trasaddasyutaḥsaṃbhūto 'naraṇyaḥ yaṃ rāvaṇodigvijaye jaghān

4.3.18

anaraṇyasya pṛṣaṭaśvaḥ pṛṣadaśvasya haryaśvaḥ putro 'bhavat

4.3.19

tasya ca hastaḥ putro 'bhavat

4.3.20

tataś ca sumanāstasyāpi tridhanvā tridhanvanastrayyāruṇiḥ

4.3.21

trayyāruṇeḥsatyavrataḥ yo 'sau triśaṅkusaṃjñāmavāpa

4.3.22

sa caṇḍālatāmupagataś ca

4.3.23

dvādaśavarṣikyāmanāvṛṣṭyāṃ viśvāmitrakalatrāpatyapoṣaṇārthaṃ caṇḍālapratigraharaṇāya ca jāhnavītīranyagrodhe mṛgamāṃsamanudinaṃ babandha

4.3.24

sa tu parituṣṭena viśvāmitreṇa saśarīraḥsvargamāropitaḥ

4.3.25

triśaṅkorhariścandrastasmācca rohitāśvastataś ca harito haritasya cañcuścañcorvijayavasudevau ruruko vijayādrukasya vṛkaḥ

4.3.26

tato vṛkasya bāhuḥ yo 'sau haihayatālajaṅghādibhiḥ parājitontarvatnyā mahiṣyā saha vanaṃ praviveśa

4.3.27

tasyāścā sapatnyā garbhastaṃbhanāya garo dattaḥ

4.3.28

tenāsya garbhaḥsaptavarṣāṇi jaṭhara eva tasthau

4.3.29

sa ca bāhurvṛddhabhāvādaurvāśramamamīpe mamāra

4.3.30

sā tasya bhāryā citāṃ kṛtvā tamāropyānuparaṇakṛtaniścayābhūt

4.3.31

athaitāmatītānāgatavartamānakālatrayavedī bhagavānaurvacaḥsvāśramānnirgatyābravīt

4.3.32

alamalamanenāsadgrāheṇākhilabhūmaṃ ḍalapatirativīryaparākramo naikayajñakṛdarātipakṣakṣayakartā tavodare cakravartī tiṣṭhati

4.3.33

naivamatisāhasādhyavasāyinī bhavatī tena tyuktā sā tasmādanumaraṇanirbandhādvirarāma

4.3.34

tenaiva ca bhagavatā svāśramamānītā

4.3.35

tatra kativayadinābhyantare ca sahaiva tena gareṇātitejasvī bālako jajñe

4.3.36

tasyaurvo jātakarmādikriyā niṣpādya sagara iti nāma cakāra

4.3.37

kṛtopanayanaṃ cainamaurvo vedaśāstrāṇyastraṃ cāgneyaṃ bhārgavākhyamadhyāpayāmāsa

4.3.39

utpannabuddhiś ca mātaramabravīt // 38 //
aṃba kathayātra vayaṃ kva tātosmākamitye vamādipṛcchantaṃ mātā sarvamevāvocat

4.3.40

tataś ca pitṛrājyapaharaṇādamarṣito haihayatālajaṅghādivadhāya pratijñāmakarot

4.3.41

prāyaśaś ca haihayatālajaṅghāñjaghāna

4.3.42

śakayavanakāṃbho0japāradapaplavāḥ hanyamānāstatkulaguruṃ vasiṣṭhaṃ śaraṇaṃ jagmuḥ

4.3.43

athainānvasiṣṭho jīvanamṛtakān kṛtvā sagaramāha

4.3.44

vatsālam ebhir jīvanmṛtakair anumṛtaiḥ

4.3.45

ete ca mayaiva tvatpratijñāpāripālanāya nijadharmadvijasaṃgaparityāgaṃ kāritāḥ

4.3.46

tatheti tadguruvacanabhinandya teṣāṃ veṣānyatvamakārayat

4.3.47

yavanānmuṇḍitaśirasordhamuṇḍitāñcchakān pralaṃbakeśān pāradān paplavāñ śmaśrudharān niḥsvādhyāyavaṣaṭkārānetānanyāṃś ca kṣatriyāṃścakāra

4.3.48

ete cātmadharmaparityāgādbāhyaṇaiḥ parityaktā mlecchatāṃ yayuḥ

4.3.49

sagaropi smadhiṣṭhānamāgamya askhalitacakraḥsaptadvīpavatīmimāmurvīṃ praśaśāsa

Original text: Viṣṇupurāṇa · Edition: Bombay : Venkatesvara Steam Press 1910 · Data entry members of the Sansknet Project · GRETIL (Göttingen) · CC BY-NC-SA 4.0