Vishnu Purana · Chapter 4.14

iti śrīviṣṇumahāpurāṇe caturthāṃśe trayodaśo 'dhyāyaḥ (13)
śrīparāśara uvāca
anamitrasya putraḥ śinirnāmābhavat

tasyāpi satyakaḥ satyakātsātyakiryuyudhānāparanāmā

tasmādapi saṃjayaḥ tatputraś ca kuṇiḥ kuṇeryugandharaḥ

ityete śaineyāḥ

anamitrasyānvaye vṛṣṇiḥ tasmāt ścaphalkaḥ tatprabhāvaḥ kāthena eva

śvaphalkasyānyaḥ kanīyāṃścitrakonāma bhrātā

śvaphalkādakrūro gāndinyāmabhavat

tathopamadgaḥ

upamadgormṛdāmṛdaviśvārimejayagirikṣatropakṣatraśataghnārimardanadharmadṛgdṛṣṭadharmagandhamojavāhaprativāhākhyāḥ putrāḥsutārākhyā kanyā ca

devavānupadevaścākrūraputrau

pṛthuvivṛthupramukhāścitrakasya putrā bahavo babhūvuḥ

kukurabhajamānaśucikaṃbalabarhiṣākhyāstathāndhakasya catvāraḥ putrāḥ

kukurāddhṛṣṭaḥ tasmācca kapotaromā tataś ca vilomā tasmādapi tuṃburasakho 'bhavadanusaṃjñaś ca

anorānakadundabhiḥ tataścā bhijit abhijitaḥ punarvasuḥ

tasyāpyāhukaḥ āhukī ca kanyā

āhukasya devakograsenau dvau putrau

devavānupadevaḥ sahadevo devarakṣitā ca devakasya catvāraḥ putrāḥ

teṣāṃ vṛkadevopadevā devarakṣitā śrīdevā śāntidevā sahadevā devakī ca saptabhaginyaḥ

tāś ca sarvā vasudeva upayeme

ugrasenasyāpi kaṃsanyagrodhasunāmānakāhvaśaṅkusubhūmirāṣṭrapālayuddhatuṣṭisutuṣṭiṃmatsaṃjñāḥ putrā babhūvuḥ

kaṃsākaṃsavatīsutanūrāṣṭrapalikāhvāścograsenasya tanūjāḥ kanyāḥ

bhajamānācca vidūrathaḥ putro 'bhavat

vidūrathācchūraḥ śurācchamī śaminaḥ pratikṣatraḥ tasmātsvayaṃbhojaḥ tataś ca hṛdikaḥ

tasyāpi kṛtavarmaśatadhanurdavārhadevagarbhādyāḥ putrā babhūvuḥ

devagarbhasyāpi śuraḥ

śurasyāpi mārīṣā nāma patnyabhavat

tasyāṃ cāsau daśaputrānajanayadvasudevarūrvān

vasudevasya jātamātrasyaiva tadgṛhe bhagavadaṃśāvatāramavyāhatadṛṣṭyā paśyadbhir devair divyānakadundubhayo vāditāḥ

tataścasāvānakadundubhisaṃjñāmavāpa

tasya ca devabhāgadevaśravāṣṭakakakuccakravatsadhārakasṛṃjayaśyāmaśamikagañjūṣasaṃjñā nava bhrataro 'bhavan

pṛthā śrutadevā śruta kīrtiḥ śrutaśravā rājādhidevī ca vasudedādīnāṃ pañca bhaginyo 'bhavan

śurasya kuntirnāma sakhābhavat

tasmai cāputrāya pṛthāmātmajāṃ vidhinā śuro dattavān

tāṃ ca pāṇḍuruvāha

tasyāṃ ca dharmānilendrair yudhiṣṭharabhīmasenārjunākhyāstrayaḥ putrāḥsamutpāditāḥ

pūrvamevānūḍhāyāś ca bhagavatā bhāsvatā kānīnaḥ karṇo nāma putro 'janyata

tasyāś ca sapatnī mādrī nāmābhūt

tasyāṃ ca nāsatyadastrābhyāṃ nakulasahadevau pāṇḍoḥ putrau janitau

śrutadevāṃ tu vṛddhadharmā nāma kārūśa uvayeme

tasyāñca ca dantavakro nāma mahāsuro jajñe

śrutakīrtimapi kekayarājā upayeme

tasyāṃ ca saṃtardanādayaḥ kaikeyāḥ pañca putrā babhūvuḥ

rājādhidevyamāvantyau vindānuvindau jajñāte

śrutaśravasamapi cedirājo damaghoṣanāmopayeme

tasyāṃ ca śiśupālamutpādayāmāsa

sa vā pūrvamapyudāravikramo daityānāmādipuruṣo hiraṇyakaśipurabhavat

yaś ca bhagavatā sakalalokaguruṇā nārasiṃhena ghātitaḥ

punarapi akṣayavīryaśauryasaṃpatparākramaguṇaḥsamākrāntasakalatrailokeśvaraprabhāvo daśānano nāmābhūt

bahukālopabhuktabhagavatsakāśāvāptaśarīrapātodbhavapuṇyaphalo bhagavatā rāghavarūpiṇā so 'pi nidhanamupapāditaḥ

punaścedirājasya damaghoṣasyātmajaḥ śiśu pālanāmābhavat

śiśupālatvepi bhagavato bhūbhārāvatāraṇāyāvatīrṇāṃśasya puṇḍarīkanayanākhyasyopari dveṣānubandhamatitarāñcakāra

bhagavatā ca sa nidhanamupānītastatraiva paramātmabhūte manasa ekāgratayā sāyujyamavāpa

bhagavān yadi prasanno yathābhilaṣitaṃ dadāti tathā agrasannopi nighnan divyamanupamaṃ sthānaṃ prayacchati