Vishnu Purana · Chapter 4.12

iti śrīviṣṇumahāpurāṇe caturthāṃśa ekādaśo 'dhyāyaḥ (11)
śrīparāśara uvāca
kroṣṭostu yaduputrasyātmajo dhvajinīvān

tataś ca svātiḥ tato ruśaṅkuḥ ruśaṅkościtrarathaḥ

tattanayaḥ śaśibinduḥ caturdaśamahāratneśaścakravartyabhavat

tasya ca śatasahasraṃ patnī nāmabhavat

daśalakṣasaṃkhyāś ca putrāḥ

teṣāṃ ca pṛthuśravāḥ pṛthukarmā pṛthukīrtiḥ pṛthuyaśāḥ pṛthujayaḥ pṛthudānaḥ ṣaṭputrāḥ pradhānāḥ

pṛthuśravasaś ca putraḥ pṛthutamaḥ

tasmāduśanā yo vājimedhānāṃ śatamājahāra

tasya ca śitapurnāma putro 'bhavat

tasyāpi rukmakavacastataḥ paravṛt

tasya parāvṛto rukmeṣupṛthujyāmaghavalitaharitasaṃjñāstasya pañcātmajā babhūvuḥ

tasmādyāpi jyāmaghasya śloko gīyate

bhāryāvaśyāstu ye kecidbhaviṣyantyatha vā mṛtāḥ /
teṣāṃ tu jyāmaghaḥ śreṣṭhaḥ śaivyāpatirabhūnnṛpaḥ

aputrā tasya sā patnī śaivyā nāma tathāpyasau /
apatyakāmo 'pi bhayānnānyāṃ bhāryāmavindata

sa tvekadā prabhūtarathaturagagajasaṃmardātidāruṇe mahāhave yuddhyamānaḥca sakalamevāricakramajayat

taccāricakramapāstaputrakalatrabandhubalakośaṃ svamadhiṣṭhānaṃ parityajya diśaḥ pratividrutam

tasmiṃś ca vidrutetitrāsalolāyatalocanayugalaṃ trāhitrāhi māṃ tātāṃba bhratarityākulavilāpavidhuraṃ sa rājakanyāratnamadrākṣīt

taddarśanācca tasyāmanurāganugatāntarātmā sa nṛpo 'cintayat

sādhvidaṃ mamāpatyarahitasya vandhyābhartuḥ sāṃprataṃ vidhināpatyakāraṇaṃ kanyāratnamupapāditam

tadetatsamudvahāmīti

atha vaināṃ syandanamāropya svamadhiṣṭhānaṃ nayāmi

tayaiva devyāśaivyayāhamanujñātaḥsamudvahāmīti

athaināṃ rathamāropya svanagaramagacchat

vijayinaṃ ca rājānamaśeṣapaurabhṛtvayarijanāmātyasametā śaivyā draṣṭumadhiṣṭhanadvāramāgatā

sā cāvalokya rājñaḥ savyapārśavavarttinīṃ kanyāmīṣadudbhūtāmarṣasphuradadharapallavā rājānamavocat

aticapalacittātra syandane keyamāropiteti

asāvapyanālocitottaravacanotibhayāttāmāha snuṣā mameyamiti

athainaṃ śaivyovāca

nāhaṃ prasūtā putreṇa nānyā patnyabhavattava /
snuṣāsaṃbandhatā hyoṣā katamena sutena te

śrīparāśara uvāca
ityātmerṣyākopakaluṣitavacanamuṣitaviveko bhayādduruktāparihārārthamidamavanīpatirāha

yaste janiṣyatyātmajastasyeyamanāgatasyaiva bhāryā nirūpitetyākarṇyodbhūtamṛduhāsā tathetyāha

praviveśa ca rājñā sahādhiṣṭhānam

anantaraṃ cātiśuddhalagnahorāṃśakāvayavoktakṛtaputrajanmalābhaguṇādvayasaḥ pariṇāmamupagatāpi śaivyā svalpair evāhobhir garbhamavāpa

kālena ca kumāramajījanat

tasya ca vidarbha iti pitā nāma cakre

sa ca tāṃ snuṣāmupayeme

tasyāṃ cāsaukrathakaiśikasaṃjñau putrāvajanayat

punaś ca tṛtīyaṃ romapādasaṃjñaṃ putramajījanadyo nāradādavāptajñānavānbhaviṣyatīti

romapādādbabhruḥ babhrordhṛtirḥ dhṛteḥ kaiśikaḥ kaiśikasyāpi cediḥ putro 'bhavat yasya saṃtatau caidyā bhūpālāḥ

krathasya snaṣāputrasyakuntirabhavat

kunterdhṛṣṭiḥ dhṛṣṭernidhṛtiḥ nidhṛterdaśārhastataś ca vyomaḥ tasyāpi jīmūtaḥ tataś ca vikṛtiḥ tataś ca bhībharathaḥ tasmānnavarathaḥ tasyāpi daśarathaḥ tataś ca śakuniḥ tattanayaḥ karaṃbhiḥ karaṃbherdevarāto 'bhavat

tasmāddevakṣatraḥ tasyāpi madhuḥ madhoḥ kumāravaṃśaḥ kumāravaṃśādanuḥ anoḥ purumitraḥ pṛthivīpatirabhavat

tataścāṃśustasmācca satvataḥ

satvatādete sātvatāḥ

ityetāṃ jyāmaghasya saṃtatiṃ samyakchraddhāsamanvitaḥ śrutvā pumān maitreya svapāpaiḥ pramucyate