Scripture Library

Vishnu Purana · Chapter 4.11

4.11.1

iti śrīviṣṇumahāpurāṇe caturthāṃśe daśamo 'dhyāyaḥ (10)
śrīparāśara uvāca
ataḥ paraṃ yayāteḥ prathamaputrasya yadorvaṃśamahaṃ kathayāmi

4.11.2

yatrāśeṣalokanivāso manuṣyasiddhagandharvayakṣarākṣasaguhyakakiṃpuruṣāpsaroragavihagadaityadānavādityarudravasvaśvimaruddevarṣibhir mumukṣubhir dharmārthakāmamokṣārthibhiś ca tattatphalalābhāya sadābhiṣṭuto 'paricchedyamāhātmyāṃśena bhagavānanādinidhano viṣṇuravatatāra

4.11.3

atra ślokaḥ

4.11.4

yadorvaṃśaṃ naraḥ śrutvā sarvapāpaiḥ pramucyate /
yatrāvatīrṇaṃ kṛṣṇākhyaṃparaṃ brahmanarākṛti

4.11.5

sahasrajitkroṣṭunalanahuṣasaṃjñāścātvāro yaduputrā vabhuvuḥ

4.11.6

sahasrajitpuḥ śatajit

4.11.7

tasya haihayahehayaveṇuhayāstrayaḥ putrā babhūvuḥ

4.11.8

haihayaputro dharmaḥ tasyāpi dharmanetraḥ tataḥ kuntiḥ kunteḥ sahajit

4.11.9

tattanayo mahiṣmān yo 'sau māhiṣmatoṃ purīṃ nirvāpayāmāsa

4.11.10

tasmādbhadraśreṇyastato durdamastasmāddhanakaḥ dhanakasya kṛtavīryakṛtāgnikṛtadharmakṛtaujasaścatvāraḥ putrā babhūvuḥ

4.11.11

kṛtavīryādarjuḥsaptadvīpādhipatirbāhusahasro jajñe

4.11.12

yo 'sau bhagavadaṃśamatrikulaprasūtaṃ dattātreyākhyamārādhya bāhusahasramadharmasevānivāraṇaṃ svadharmasevitvaṃ raṇe pṛthivījayaṃ dharmataścānupālanamārātibhyo 'parājayamakhilajagatprakhyātapuruṣācca mṛtyumityetānvarānabhilaṣitavāṃllebhe ca

4.11.13

teneyamaśeṣadvīpavatī pṛthivī samyakparīpālitā

4.11.14

daśayajñasahasrāṇyasāvayajat

4.11.15

tasya ca śloko 'dyāpi gīyate

4.11.16

na nūnaṃ kārtavīryasya gātiṃ yāsyanti pārthivāḥ /
yajñair dānais tapobhir vā praśrayeṇa śrutena ca

4.11.17

anaṣṭadravyatā ca tasya rājye 'bhavat

4.11.18

evaṃ ca pañcāśītivarṣasahasraṇyavyāhaterogyaśrībalaparākramo rājyamakarot

4.11.19

māhiṣmatyāṃ digvijayābhyāgato sthāpitaḥ

4.11.20

yaś ca pañcāśītivarśasahasropalakṣaṇakālāvasāne bhagavannārāyaṇāṃśena paraśurāmeṇopasaṃhṛtaḥ

4.11.21

tasya ca putraśatapradhānāḥ pañcaputrā babhūvuḥ śuraśūrasenavṛṣasenamadhujayadhvajasaṃjñāḥ

4.11.23

jayadhvajāttālajaṅghaḥ putrobhavat // 22 //
tālajaṅghasya tālajaṅghākhyaṃ putraśatamāsīt

4.11.24

eṣāṃ jyeṣṭhe vītihotrastathānyo bharataḥ

4.11.25

bharatādvṛṣaḥ

4.11.26

vaṣasya putro madhurabhavat

4.11.27

tasyāpi vṛṣṇipramukhaṃputraśatamāsīt

4.11.28

yato vṛṣṇisaṃjñāmetadgotramavāpa

4.11.29

madhusaṃjñāhetuś ca madhurabhavat

4.11.30

yādavāś ca yadunāmopalakṣaṇāditi

Original text: Viṣṇupurāṇa · Edition: Bombay : Venkatesvara Steam Press 1910 · Data entry members of the Sansknet Project · GRETIL (Göttingen) · CC BY-NC-SA 4.0