Vishnu Purana · Chapter 3.6

iti śrīviṣṇumahāpurāṇe tṛtīyāṃśe pañcamo 'dhyāyaḥ (5)
śrīparāśara uvāca
sāmavedataroḥ śākhā vyāsaśiṣyasya jauminiḥ /
krameṇa yena maitreya vibhedaśṛṇu tanmama

susaṃtustasya putrobhūtsūtvānaścābhavatsutaḥ /
adhītavantau caikaikāṃ saṃhitāṃ tau māhamatī

sahasrasaṃhitābhedaṃ sukarmātatsutastataḥ /
cakāra taṃ ca tacchiṣyau jagṛhāte mahāvratau

hiraṇyanābhaḥ kausalyaḥ pauṣpiṃjiś ca dvijottama /
udīcyāḥsāmagāḥ śiṣyāstasya pañcaśataṃ smṛtāḥ

hiraṇyanābhāttāvatyaḥsaṃhitā yair dvijottamaiḥ /
gṛhītāstepi cocyante paṇḍitaiḥ prācyasāmagāḥ

lokākṣirnaidhamiścaiva kakṣivāṃllāṅgalis tathā /
pauṣpijiśiṣyāstadbhedaiḥ saṃhitā bahulīkṛtāḥ

hiraṇyanābhaśiṣyastu caturviśatisaṃhitāḥ /
provāca kṛtanāmāsau śiṣyebhyaś ca mahāmuniḥ

taiś cāpi sāmavedo 'sau śākhābhir bahulīkṛtaḥ /
atharvaṇāmatho vakṣye saṃhitānāṃ samuccayam /
atharvavedaṃ sa muniḥsusaṃturamitadyutiḥ

śiṣyamadhyāpayāmāsa kabandhaṃ so 'pi taṃ dvidhā /
kṛtvā tudevadarsāya tathā pathyāya dattavān

devadarśasya śiṣyāstu medhobrahmabalis tathā /
śaulkāyaniḥ pippalādastathānyo dvijasattama

pathyasyāpi trayaḥ śiṣyāḥ kṛtā yair dvija saṃhitāḥ /
jābāliḥ kumudādiś ca tṛtīyaḥ śaunako dvija

śaunakastu dvidhā kṛtvā dadāvekāṃ tu babhrave /
dvitīyāṃ saṃhitāṃ prādātsaindhavāya ya saṃjñine

saindhavānmujikeśaś ca dvedhabhinnāstridhā punaḥ /
nakṣatrakalpo vedānāṃ saṃhitānāṃ tathaiva ca

caturthaḥsyādāṅgirasaḥ śāntikalpaścapañcamaḥ /
śreṣṭhāstvatharvaṇāmete saṃhitānāṃ vikalpakāḥ

ākhyānaiś cāpy upākhyānair gāthābhiḥ kalpaśuddhibhiḥ /
purāṇasaṃhitāṃ cakrepurāṇārthaviśāradaḥ

prakhyāto vyāsaśiṣyobhūtsūto vai romaharṣaṇaḥ /
purāmasaṃhitāṃ tasmai dadau vyāso mahāmatiḥ

sumatiścāgnivarcāś ca mitrāyuḥśāṃsapāyanaḥ /
akṛtavraṇasāvarṇiṣpaṭśiṣyāstasya cābhavan

kāśyapaḥ saṃhitākartā sāvarṇiḥ śāṃsapāyanaḥ /
romaharṣāṇikācānyā tisṝṇāṃ mūlasaṃhitā

catuṣṭayena bhedena saṃhitānāmidaṃ mune

ādyaṃ sarvapurāṇānāṃ purāṇaṃ brāhmamucyate /
aṣṭādaśapurāṇāni purāṇajñāḥ pracakṣate

brāhmaṃ pādmaṃ vaiṣṇavaṃ ca śaivaṃ bhāgavataṃ tathā /
tathānyaṃ nāradīyaṃ ca mārkaṇḍeyaṃ ca saptamam

āgneyamaṣṭamaṃ caiva bhaviṣyannavamaṃ smṛtam /
daśamaṃ brahmavaivartaṃ laiṅgamekādaśaṃ smṛtam

vārāhaṃ dvādaśaṃ caiva skāndaṃ cātra trayodaśam /
caturdaśaṃvāmanaṃ ca kaurmaṃ pañcadaśaṃ tathā /
mātsyaṃ ca gāruḍaṃ caiva brahmāṇḍaṃ ca tataḥ param /
mahāpurāṇānyetāni hyaṣṭādaśa mahāmune

tathā copa purāṇāni munibhiḥ kathitāni ca /
sargaś ca pratisargaś ca vaṃśamanvantarāṇi ca /
sarveṣveteṣu kathyante vaṃśānucārītaṃ ca yat

yadetattava maitreya purāṇaṃ kathyate mayā /
etadvaiṣṇavasaṃjñaṃ vai pādmasyasamanantaram

sarge ca pratisarge ca vaṃśamanvantarādiṣu /
kathyate bhagavān viṣṇur aśeṣeṣv iva sattama

aṅgāni vedāścatvāro mīmāṃsānyāyavistaraḥ /
purāṇaṃ dharmaśāstraṃ ca vidyā hyetāścaturdaśa

āyurvedodhanurvedo gāndharvaścaiva te trayaḥ /
arthaśāstraṃ caturthaṃ tu vidya hyaṣṭādaśaiva tāḥ

jñeyā brahmarṣayaḥ pūrvaṃ tebhyo devarṣayaḥ punaḥ /
rājarṣayaḥ punastebhya ṛṣiprakṛtayastrayaḥ

iti śākhāḥsamākhyātaḥ śākhābhedāstathaiva ca /
kartāraścaiva śākhānāṃ bhedahetustathoditaḥ

sarvamanvantareṣvevaṃ śākhābhedāḥsamāḥ smṛtāḥ

prājāpatyā śrutirnityā tadvikalpāstvime dvija

etatte kathitaṃ sarvaṃ yatpṛṣṭohamihatvayā /
maitreya vedasaṃbandhaḥ kimanyatkathayāmi te