Vishnu Purana · Chapter 3.16

iti śrīviṣṇumahāpurāṇe tṛtīyāṃse pañcadaśo 'dhyāyaḥ (15)
aurva uvāca
haviṣyamatsyamāsais tu śaśasya nakulasya ca /
sokaracchākalaiṇeyarauravair gavayena ca

aurabhragavyaiś ca tathā māsavṛddhyā pitāmahāḥ /
prayānti tṛptiṃ māṃsais tu nityaṃ vārdhroṇasāmiṣaiḥ

khaḍgamāṃsamatīvātra kālaśākaṃ tathā madhu /
śastāni karmaṇyatyantatṛptidāni nareśvara

gayāmupetya yaḥ śrāddhaṃ karoti pṛthivīpate /
saphalaṃ tasya tajjanma jāyate pitṛtīṣṭidam

praśāntikāḥsamīvārāḥ śyāmākā dvividhās tathā /
vanyaiṣadhīpradhānāstu śrāddhārhāḥ puruṣarṣabha

yavāḥ priyaṅgavo mudgā godhūmā vrīhayastilāḥ /
niṣpāvāḥ kovidārāś ca sarṣapāścātra sobhanāḥ

akṛtāgrayaṇaṃ yacca dhānyajātaṃ nareśvara /
rājamāṣānaṇuṃścaiva masūrāṃś ca visarjayet

alābuṃ gṛñjanaṃ caiva palāṇḍuṃ piṇḍamūlakam /
gāndhārakakaraṃvādilavāṇānyauṣarāṇi ca

āraktāścaiva niryāsāḥ pratyakṣalavaṇāni ca /
varjyānyetāni vai śrāddhe yacca vācā na śasyate

naktāhṛtamanucchinnaṃ tṛpyate na ca yatra gauḥ /
durghadhiphenilaṃ cāṃbu śrāddhayogyaṃ na pārthiva

kṣiramekasaphānāṃ yadauṣṭramāvikameva ca /
mārgaṃ ca māhiṣaṃ caiva varjayecchrāddhakameṇi

ṣaṇḍāpaviddhacaṇḍālapāpipāṣaṇḍarogibhiḥ /
kṛkavākuśvānanagna-vānaragrāmasūkaraiḥ

udakyāsūtikāśaucamṛtahāraiś ca vīkṣite /
śrāddhe surā na pitaro bhuñjante puruṣarṣabha

tasmātparīśrite kuryācchrāddhaṃ śraddhāsamanvitaḥ /
urvyāṃ ca tilavikṣepādyātudhānānnivārayet

nakhādinā copapannaṃ keśakīṭādibhir nṛpa /
na caivābhiṣavair miśram annaṃ paryuṣitaṃ tathā

śraddhāsamanvitair dattaṃ pitṛbhyo nāmagotrataḥ /
yadāhārāstu te jātāstadāhāratvameti tat

śrūyate cāpi pitṛrbhigītā gāthā mahīpate /
ikṣvākormanuputrasya kalāpopavane purā

api naste bhaviṣyanti kule sanmārgaśīlinaḥ /
gayāmupetya ye piṇḍāndāsyantyasmākamādarāt

api naḥsa kule jāyādyo no dadyāttrayodaśīm /
pāyasaṃ madhusarpirbhyāṃ varṣāsu ca maghāsu ca

gaurīṃ vāpyudvahetkanyāṃ nīlaṃ vā vṛṣamutsṛjet /
yajeta vāśvamedhena vidhivaddakṣiṇāvatā