Vishnu Purana · Chapter 3.14

iti śriviṣṇumahāpurāṇe tṛtīyāṃśe trayodaśodhyāyaḥ (13)
aurva uvāca
brahmendrarudranāsatyasūryāgnivasumārutān /
viśvedevānpitṛgaṇānvayāṃsi manujānpaśun

sarīsṛpānṛṣigaṇānyaccānyadbhūta saṃjñitam /
śrāddhaṃ śraddhānvitaḥ kurvanprīṇayatyakhilaṃ jagat

māsimāsyasite pakṣe pañcadaśyāṃ nareśvara /
dathāṣṭakāsu kurvīta kāmyānkālāñchṛṇuṣva me

śrāddhārhamāgataṃ dravyaṃ viśiṣṭamatha vā dvijam /
śrāddhaṃ kurvīta vijñāya vyatīpāte 'yate tathā

viṣuve cāpi saṃprāpte grahaṇe śaśi sūryayoḥ /
samasteṣveva bhūpāla rāśiṣvarke ca gacchati

nakṣatragrahapīḍāsu duṣṭasvapnāvalokane /
icchāśrāddhāni kurvīta navasasyāgame tathā

amāvāsyā yadā maitraviśākhāsvātiyoginī /
śrīddhaiḥ pitṛgaṇastṛptiṃ tathāpnotyaṣṭavārṣikīm

amavāsyā yadā puṣye raudretharkṣe punarvasau /
dvādaśābdaṃ tadā tṛptiṃ prayānti piratorcitāḥ

vāsavājaikapādarkṣe pitaṇāṃ tṛptimicchatām /
vāruṇe vāpyamāvāsyā devānāmapi durlabhā

navasvṛkṣeṣvamāvāsyā yadaiteṣvavanīpate /
tadā hi tṛptidaṃ śrāddhaṃ pitṝṇāṃ śṛṇu cāparam

gītaṃ sanatkumāreṇa yathailāna mahātmane /
pṛcchate pitṛbhaktāya praśrayāvanātāya ca

sanatkumāra uvāca
vaiśākhamāsasya ca yā tṛtīyā navamyasau kartikaśuklapakṣe /
nabhasyamāsasya ca kṛṣṇapakṣe trayodaśī pañcadaśī ca māghe

etā yugādyāḥ kathitāḥ purāṇeṣvanantapuṇyāstitha yaścatastraḥ /
upaplave candramaso raveś ca triṣvaṣṭakāsvapyayanadvaye ca

pānīyamapyatra tilair vimiśraṃ dadyātpitṛbhyaḥ prayato manuṣyaḥ /
śrāddhaṃ kṛte tena samāsahasraṃ rahasyametatpitaro vadanti

māghe 'siti pañcadaśī kadācidupaiti yogaṃ yadi vāruṇena /
ṛkṣeṇa kālaḥsa paraḥ pitṝṇāṃ na hyalpapuṇyair nṛpa labhyatesau

kāle dhaniṣṭhā yadi nāma tasminbhavettu bhūpāla tadā pitṛbhyaḥ /
dattaṃ jalānnaṃ pradadāti tṛptiṃ varṣāyutaṃ tatkulajair manuṣyaiḥ

tatraiva cedbhādrapadānupūrvāḥ kāle yathāvatkriyate pitṛbhyaḥ /
śrāddhaṃ parāṃ tṛptimupaiti tena yugaṃ sahasraṃ pitaraḥsvapanti

gaṅgāṃ śatadrūṃ yamunāṃ vipāśāṃ sarasvatīṃ naimiśagomatīṃ vā /
tatrāvagāhyarcanamādareṇa kṛtvā pitṝṇāṃ duritāni hanti

gāyanti caitatpitaraḥ kadānu harṣādamī tṛptimavāpya bhūyaḥ /
māghāsitānte śubhatīrthatoyair yāsyāma tṛptiṃ tanayādidattaiḥ

cittaṃ ca vittaṃ ca nṛṇāṃ viśuddhaṃ śastaṃ ca kālaḥ kathito vidhiś ca /
pātraṃ yathoktaṃ paramā ca bhaktirnṛṇāṃ prayacchantyabhivāñchitāni

pitṛgītāntataivātra ślokāṃstañchṛṇu pārthiva /
śrutvā tathaiva bhavatā bhāvyaṃ tatrādṛtātmanā

api dhanyaḥ kule jāyādasmākaṃ matimānnaraḥ /
akurvanvittaśāṭhyaṃ yaḥ piṇḍānno nirvapiṣyati

ratnaṃ vastraṃ mahāyānaṃ sarvabhogādikaṃvasu /
vibhave sati viprebhyo yosmānuddiśya dāsyati

annena vā yathāśaktyā kālesminbhaktinamradhīḥ /
bhojayiṣyati viprāgryāṃstanmātravibhavo naraḥ

asamarthonnadānasya dhānyamāmaṃ svaśaktitaḥ /
pradāsyati dvijāgrebhyaḥ svalpālpāṃ vāpi dakṣiṇām

tatrāpyasāmarthyayutaḥ karāgrāgrasthitāṃstilān /
praṇamya dvijamukhyāya kasmaicidbhūpa dāsyati

tilaiḥ saptāṣṭabhir vāpi samavetaṃ jalāñjalim /
bhaktinamraḥ samuddiśya bhuvyasmākaṃ pradāsyati

yataḥ kutāścitsaṃprāpya gobhyo vāpi gavāhnikam /
abhāve prīṇayannasmāñcchraddhāyuktaḥ pradāsyati

sarvābhāve vanaṃ gatvā kakṣamūlapradarśakaḥ /
sūryādilokapālānāmidamuccervadiṣyati

na me 'sti vittaṃ na dhanaṃ ca nānyacchrāddhopayogyaṃ svapitṝnnatosmi /
tṛpyantu bhaktayā pitaro mayaitau kṛtau bhujau vartmani mārutasya

aurva uvāca
ity etat pitṛbhir gītaṃ bhāvābhāvaprayojanam /
yaḥ karoti kṛtaṃ tena śrāddhaṃ bhavati pārthiva