Vishnu Purana · Chapter 1.18

iti śrīviṣṇupurāṇe prathame 'ṃśe prahlādānucaritaṃ nāma saptadaśodhyāyaḥ (17)
śrīpāraśara uvāca
tasyaitāṃ dānavāśceṣṭāṃ dṛṣṭvā daityapaterbhayāt /
ācacakhyuḥ sa covāca sūdānāhūya satvaraḥ

hiraṇyakaśipur uvāca
he sūdāḥmama putrosāvanyoṣāmapi durmatiḥ /
kumārgadeśiko duṣṭo hanyatāmavilambitam

hālāhalaṃ viṣaṃ tasya sarvabhakṣeṣu dīyatām /
avijñātamasau pāpo hanyatāṃ mā vicāryatām

śrīparāśara uvāca
te tathaiva tataścakruḥ prahlādāya mahātmane /
viṣadānaṃ yathājñāptaṃ pitrā tasya mahātmanaḥ

hālāhalaṃ viṣaṃ ghoramanantoccāraṇena saḥ /
abhimantrya sahānnena maitreya bubhuje tadā

avikāraṃ sa tadbhuktvā prahlādaḥ svasthamānasaḥ /
anantakhyātinirviryajarayāmāsa tadviṣam

tataḥ sūdā bhayatrastā jīrṇaṃ dṛṣṭvā mahadviṣam /
daityeśvaramupāgamya praṇipatyedamabruvan

sūdā ūcuḥ
daityarāja viṣaṃ dattamasmābhir atibhīṣaṇam /
jīrṇaṃ tena sahānnena prahlāhena sutena te

hiraṇyakaśipur uvāca
tvaryatāṃ tvaryatāṃ he he sadyo daityapurohitāḥ /
kṛtyāṃ tasyavināśāya utpādayata mā ciram

śrīparāśara uvāca
sakāśamāgamya tataḥ prahlādasya purohitāḥ /
sāmapūrvamathocuste prahlādaṃ vinayānvitam

purohitā ūcuḥ
jātastrailokyavikhyāta āyuṣmanbrahmaṇaḥ kule /
daityarājasya tanayo hiraṇyakaśiporbhavāt

kindevaiḥ kimanantena kimanyena tavāśrayaḥ /
pitā te sarvalokānāṃ tvaṃ tathaiva bhaviṣyasi

tasmātparityajaināṃ tvaṃ vipakṣastavasaṃhitām /
ślāghyaḥ pitā samastānāṃ gurūṇāṃ paramo guruḥ

prahlāda uvāca
evam etan mahābhāgāḥ ślāghyametanmahākulam /
mariceḥ sakalepyasmin trailokye nā nyāthā vadet

pitā ca mama sarvāsmiñjagatyuktṛṣṭaceṣṭitaḥ /
etadapyavagacchāmi satyamatrāpi nānṛtam

gurūṇāmapi sarveṣāṃ pitā paramako guruḥ /
yaduktaṃ bhrāntistatrāpi svalpāpi hi na vidyate

pitā gururna sandehaḥ pūjanīyaḥ pūyatnataḥ /
tatrāpi nāparādhyāmītyevaṃ manasi se sthitam

yattvetatkimanantenetyuktaṃ yuṣmābhir idṛsam /
ko bravīti yathānyāyyaṃ kiṃ tu naitadvacorthavat

ityuktvā so 'bhavanmaunī teṣāṃ goravayantritaḥ /
prahasya ca punaḥ prāha kimanantena sādhviti

sādhu bhoḥ kimanantena sādhu bho guruvo mama /
śrūyatāṃ yadanantena yadi khedaṃ na yāsyatha

dharmārthakāmamokṣāś ca puruṣārthā udāhṛtāḥ /
catuṣṭayamidaṃ yasmāttasmāktiṃ kimidaṃ vaca

marīcimiśrair dakṣādyais tathaivānyair anantataḥ /
dharma prāptas tathā cānyair arthaḥ kāmastathāparaiḥ

tantattvavedino bhūtvā jñānadhyānasamādhibhiḥ /
avāpurmuktimapare puruṣā dhvastabandhanāḥ

sampadaiśvaryamāhātmya-jñānasaṃtatikarmaṇām /
vimukteścaikato labhyaṃ mūlamārādhanaṃ hareḥ

yato dharmārthakāmākhyaṃ muktiścapi phalaṃ dvijāḥ /
tenāpi kiṅkimityevamanantena kimucyate

kiṃ cāpi bahunoktena bhavanto guravo mama /
vadantu sādhu vāsādhu viveko 'smākam alpakaḥ

bahunātra kimuktena sa eva jagataḥ patiḥ /
sa kartā ca vikartā ca saṃhartā ca hṛdi sthitaḥ

sa bhoktā bhojyamapyevaṃ sa eva jagadīśvaraḥ /
bhavadbhir etatkṣantavyaṃ bālyāduktaṃ tu yanmayā

purohitā ūcuḥ
dahyamānastvamasmābhir agninā bāla rakṣitaḥ /
bhūyo na vakṣyasītyevaṃ naiva jñātosyabuddhimān

yadāsmadvacanānmohagrāhaṃ na tyakṣate bhavān /
tataḥ kṛtyāṃ vināśāya tava sṛkṣyāma durmate

prahlāda uvāca
kaḥ kena hanyate jantur jantuḥ kaḥ kena rakṣyate /
hanti rakṣati caivātmā hyasatsādhu samācaran

karmaṇā jāyate sarvaṃ karmaiva gatisādhanam /
tasmātsarvaprayatnena sādhu karma samācaret

śrīparāśara uvāca
ityuktāstena te kruddhā daityarājapurohitāḥ /
kṛtyāmutpādayāmāsurjvālāmālojjvalākṛtim

atibhīmā samāgamya pādanyāsakṣatakṣitiḥ /
śulena sādhu saṃkruddhā taṃ jaghānāśu vakṣasi

tattasya hṛdayaṃ prāpya śūlaṃ bālasya dīptimat /
jagāma khaṇḍitaṃ bhūmau tatrāpi śatadhā gatam

yatrānapāyī bhagavān hṛdyāste haririśvaraḥ /
bhaṅgo bhavati vajrasya tatra śūlasya kā kathā

āpāpe tatra pāpaiś ca pātitā daityāyājakaiḥ /
tāneva sā jaghānāśu kṛtyā nāśaṃ jagāma ca

kṛtyayā dahyamānāṃstanvilokya sa mahāmatiḥ /
trāhi kṛṣṇetyananteti vadannabhyavapadyata

prahlāda uvāca
sarvavyāpin jagadrūpa jagatstraṣṭarjanārdana /
pāhi viprānimānasmādduḥ sahānmantrapāvakāt

yathā sarveṣu bhūteṣu sarvavyāpī jagadguruḥ /
viṣṇureva tathā sarve jīvantvete purohitāḥ

yathā sarvagataṃ viṣṇuṃ manyamānonapāyinam /
cintayāmyaripakṣepi jīvantvete purohitāḥ

ye hantumāgatā dattaṃ yorviṣaṃ yair hutāśanaḥ /
yair diggajair ahaṃ kṣuṇṇo daṣṭaḥ sarpaiś ca yair api

teṣvahaṃ mitrabhāvena samaḥ pāposmi na kvacit /
yathā tenādya satyena jīvantvasurayājakāḥ

śrīparāśara uvāca
ityuktāstena te sarve saṃspṛṣṭāś ca nirāmayāḥ /
samuttasthurdvijā bhūyastamūcuḥ praśrayānvitam

purohitā ūcuḥ
dīrghāyurapratihato balavīryasamanvitaḥ /
putrapautradhanaśvair yair yukto vatsa bhavottamaḥ

śrīparāśara uvāca
ityuktvā taṃ tato gatvā yathāvṛttaṃ purohitāḥ /
daityarājāya sakalamācacakhyurmahāmune