Vishnu Purana · Chapter 1.10

iti śrīviṣṇupurāṇe prathame 'ṃśe navamo 'dhyāyaḥ (9)
śrīmaitreya uvāca
kathitaṃ me tvāyā sarvaṃ yatpṛṣṭosi mayā mune /
bhṛgusargātprabhṛtyeṣa sargo me kathyatāṃ punaḥ

śrīparāśara uvāca
bhṛgoḥ khyātyāṃ samutpannā lakṣmīrviṣṇuparigrahaḥ /
tathā dhātṛvidhātārau khyātyāṃ jātau sutau bhṛgoḥ

āyatirniyatiścaiva meroḥ kanye mahātmanaḥ /
bhārye dhātṛvidhātroste tayorjātau sutāvubhau

prāṇaścaiva mṛkaṇḍuś ca mārkaṇḍeyo mṛkaṇḍutaḥ /
tato vedaśirā jajñe prāṇasyāpi sutaṃ śṛṇu

prāṇasya dyutimānputro rājavāṃś ca tato 'bhavat /
tato vaṃśo mahābhāga vistaraṃ bhārgavo gataḥ

patnī marīceḥ saṃbhūtiḥ paurṇamāsamasūyatā /
virajāḥ parvataścaiva tasya putro mahātmanaḥ

vaṃśasaṃkīrtane putrānvadiṣyehaṃ tato dvija /
smṛtiścāṅgīrasaḥ patnī prasūtā kanyakās tathā /
sinīvālī kuhūścaiva rākā cānumatī tathā

anasūyā tathaivātrerjajñe niṣkalmaṣānsutān /
somaṃ durvāsasaṃ caiva dattātreyaṃ ca yoginam

prītyāṃ pulastyabhāryāyāṃ dattolistatsuto 'bhavat /
pūrvajanmani yo 'gastyaḥ smṛtaḥ svāyaṃbhuventare

kardamaścārvarīvāṃś ca sahiṣṇuś ca sutāstrayaḥ /
kṣamā tu suṣave bhāryā pulahasya prajāpateḥ

kratoś ca saṃtatirbhāryā vālakhilyānasūyata /
ṣaṣṭiputrasahasrāṇi munīnāmūrdhvaretasām /
aṅguṣṭhaparvamātrāṇāṃ jvaladbhāskaratejasām

ūrjāyāṃ tu vasiṣṭhasya saptājāyanta vai sutāḥ

rajo gotrordhvabāhuś ca savanaścānaghas tathā /
sutapāḥ śukra ityete sarve saptarṣayo 'malāḥ

yo 'sāvagnyabhimānī syāt brahmaṇastanayo 'grajaḥ /
tasmātsvāhā sutāṃllebhe trīnudāraujaso dvija

pāvakaṃ pavamānaṃ tu śuciṃ cāpi jalāśinam

teṣāṃ tu santatāvanye catvāriṃśacca pañca ca /
kathyante vahnayaścaite pitāputratrayaṃ ca yat

evamekonapañcaśadvahnayaḥ parikīrtitāḥ

pitaro brahmaṇā sṛṣṭā vyākhyātā ye mayā dvija /
āgniṣvātta barhiṣado 'nagnayaḥ sāgnayaś ca ye

tebhyaḥ svadhā sute jajñe menāṃ vai dhārīṇīṃ tathā /
te ubhe brahmavādinyau yoginyāvapyubhe dvija

uttamajñānasaṃpanne sarvaiḥ samudirtair guṇaiḥ

ityeṣā dakṣakanyānāṃ kathitā satyasaṃtatiḥ /
śraddhāvānsaṃsmarannetāmanapatyo na jāyate