વિષ્ણુ પુરાણ · અધ્યાય 1.10

ઇતિ શ્રીવિષ્ણુપુરાણે પ્રથમે ઽંશે નવમો ઽધ્યાયઃ (9)
શ્રીમૈત્રેય ઉવાચ
કથિતં મે ત્વાયા સર્વં યત્પૃષ્ટોસિ મયા મુને ।
ભૃગુસર્ગાત્પ્રભૃત્યેષ સર્ગો મે કથ્યતાં પુનઃ

શ્રીપરાશર ઉવાચ
ભૃગોઃ ખ્યાત્યાં સમુત્પન્ના લક્ષ્મીર્વિષ્ણુપરિગ્રહઃ ।
તથા ધાતૃવિધાતારૌ ખ્યાત્યાં જાતૌ સુતૌ ભૃગોઃ

આયતિર્નિયતિશ્ચૈવ મેરોઃ કન્યે મહાત્મનઃ ।
ભાર્યે ધાતૃવિધાત્રોસ્તે તયોર્જાતૌ સુતાવુભૌ

પ્રાણશ્ચૈવ મૃકણ્ડુશ્ ચ માર્કણ્ડેયો મૃકણ્ડુતઃ ।
તતો વેદશિરા જજ્ઞે પ્રાણસ્યાપિ સુતં શૃણુ

પ્રાણસ્ય દ્યુતિમાન્પુત્રો રાજવાંશ્ ચ તતો ઽભવત્ ।
તતો વંશો મહાભાગ વિસ્તરં ભાર્ગવો ગતઃ

પત્ની મરીચેઃ સંભૂતિઃ પૌર્ણમાસમસૂયતા ।
વિરજાઃ પર્વતશ્ચૈવ તસ્ય પુત્રો મહાત્મનઃ

વંશસંકીર્તને પુત્રાન્વદિષ્યેહં તતો દ્વિજ ।
સ્મૃતિશ્ચાઙ્ગીરસઃ પત્ની પ્રસૂતા કન્યકાસ્ તથા ।
સિનીવાલી કુહૂશ્ચૈવ રાકા ચાનુમતી તથા

અનસૂયા તથૈવાત્રેર્જજ્ઞે નિષ્કલ્મષાન્સુતાન્ ।
સોમં દુર્વાસસં ચૈવ દત્તાત્રેયં ચ યોગિનમ્

પ્રીત્યાં પુલસ્ત્યભાર્યાયાં દત્તોલિસ્તત્સુતો ઽભવત્ ।
પૂર્વજન્મનિ યો ઽગસ્ત્યઃ સ્મૃતઃ સ્વાયંભુવેન્તરે

કર્દમશ્ચાર્વરીવાંશ્ ચ સહિષ્ણુશ્ ચ સુતાસ્ત્રયઃ ।
ક્ષમા તુ સુષવે ભાર્યા પુલહસ્ય પ્રજાપતેઃ

ક્રતોશ્ ચ સંતતિર્ભાર્યા વાલખિલ્યાનસૂયત ।
ષષ્ટિપુત્રસહસ્રાણિ મુનીનામૂર્ધ્વરેતસામ્ ।
અઙ્ગુષ્ઠપર્વમાત્રાણાં જ્વલદ્ભાસ્કરતેજસામ્

ઊર્જાયાં તુ વસિષ્ઠસ્ય સપ્તાજાયન્ત વૈ સુતાઃ

રજો ગોત્રોર્ધ્વબાહુશ્ ચ સવનશ્ચાનઘસ્ તથા ।
સુતપાઃ શુક્ર ઇત્યેતે સર્વે સપ્તર્ષયો ઽમલાઃ

યો ઽસાવગ્ન્યભિમાની સ્યાત્ બ્રહ્મણસ્તનયો ઽગ્રજઃ ।
તસ્માત્સ્વાહા સુતાંલ્લેભે ત્રીનુદારૌજસો દ્વિજ

પાવકં પવમાનં તુ શુચિં ચાપિ જલાશિનમ્

તેષાં તુ સન્તતાવન્યે ચત્વારિંશચ્ચ પઞ્ચ ચ ।
કથ્યન્તે વહ્નયશ્ચૈતે પિતાપુત્રત્રયં ચ યત્

એવમેકોનપઞ્ચશદ્વહ્નયઃ પરિકીર્તિતાઃ

પિતરો બ્રહ્મણા સૃષ્ટા વ્યાખ્યાતા યે મયા દ્વિજ ।
આગ્નિષ્વાત્ત બર્હિષદો ઽનગ્નયઃ સાગ્નયશ્ ચ યે

તેભ્યઃ સ્વધા સુતે જજ્ઞે મેનાં વૈ ધારીણીં તથા ।
તે ઉભે બ્રહ્મવાદિન્યૌ યોગિન્યાવપ્યુભે દ્વિજ

ઉત્તમજ્ઞાનસંપન્ને સર્વૈઃ સમુદિર્તૈર્ ગુણૈઃ

ઇત્યેષા દક્ષકન્યાનાં કથિતા સત્યસંતતિઃ ।
શ્રદ્ધાવાન્સંસ્મરન્નેતામનપત્યો ન જાયતે