Vigrahavyāvartanī (another edition) · Verses 21-41

hetupratyayasāmagryāṃ pṛthagbhāve 'pi madvaco na yadi /
nanu śūnyatvaṃ siddhaṃ bhāvānāmasvabhāvatvāt

yaśca pratītya bhāvo bhāvānāṃ śūnyateti sā hyuktā /
yaśca pratītya bhāvo bhavati hi tasyāsvabhāvatvam

nirmitako nirmitakaṃ māyāpuruṣaḥ svamāyayā sṛṣṭam /
pratisedhayase yadvat pratiṣedho 'yaṃ tathaiva syāt

na svābhāvikametad vākyaṃ tasmānna vādahānirme /
nāsti ca vaiṣamikatvaṃ viśeṣahetuśca na nigadyaḥ

mā śabdavaditi nāyaṃ dṛṣṭānto yastvayā mamārabdhaḥ /
śabdena hi tacca śabdasya vāraṇaṃ naiva me vacaḥ

naiḥsvābhāvyānāṃ cennaiḥsvābhāvyena vāraṇaṃ yadi hi /
naiḥsvābhāvyanivṛttau svābhāvyaṃ hi prasiddhaṃ syāt

athavā nirmitakāyāṃ yathā striyāṃ striyamityasaṃgrāham /
nirmitakaḥ pratihanyāt kasyacidevaṃ bhavedetat

athavā sādhyasamo 'yaṃ heturna hi vidyate dhvaneḥ sattā /
saṃvyavahāraṃ ca vayaṃ nānabhyupagamya kathayāmaḥ

yadi kācana pratijñā tatra syādeṣa me bhaveddoṣaḥ /
nāsti ca mama pratijñā tasmānnaivāsti me doṣaḥ

yadi kiṃcidupalabheyaṃ pravartayeyaṃ nivartayeyaṃ vā /
pratyakṣādibhirarthaistadabhāvānme 'nupālambhaḥ

yadi ca pramāṇatasteṣāṃ teṣāṃ prasiddhirarthānām /
teṣāṃ punaḥ prasiddhiṃ brūhi kathaṃ te pramāṇānām

anyairyadi pramāṇaiḥ pramāṇasiddhirbhavatyanavasthā /
nādeḥ siddhistatrāsti naiva madhyasya nāntasya

teṣāmatha pramāṇairvinā prasiddhirvihīyate vādaḥ /
vaiṣamikatvaṃ tasmin viśeṣahetuśca vaktavyaḥ

viṣamopanyāso 'yaṃ na hyātmānaṃ prakāśayatyagniḥ /
na hi tasyānupalabdhirdṛṣṭā tamasīva kumbhasya

yadi svātmānamayaṃ tvadvacanena prakāśayatyagniḥ /
paramiva na tvātmānaṃ paridhakṣyatyapi hutāśaḥ

yadi ca svaparātmānau tvadvacanena prakāśayatyagniḥ /
pracchādayiṣyati tamaḥ svaparātmānau hutāśa iva

nāsti tamaśca jvalane yatra ca tiṣṭhati sadātmani jvalanaḥ /
kurute kathaṃ prakāśaṃ sa hi prakāśo 'ndhakāravadhaḥ

utpadyamāna eva prakāśayatyagnirityasadvādaḥ /
utpadyamāna eva prāpnoti tamo na hi hutāśaḥ

aprāpto 'pi jvalano yadi vā punarandhakāramupahanyāt /
sarveṣu lokadhātuṣu tamo 'yamihasaṃsthita upahanyāt

yadi ca svataḥpramāṇasiddhiranapekṣya te prameyāṇi /
bhavati pramāṇasiddhirna parāpekṣā hi siddhiriti