Varaha Purana · Chapter 97.98

atha parvādhyāyaḥ //
dharaṇyuvāca //
yo'sau satyatapā nāma lubdho bhūtvā dvijo babhau //
yenāruṇirvyāghrabhayādrakṣito yaḥ svaśaktitaḥ

durvāsāḥ saṃśrutārthaśca himavantaṃ nagaṃ yayau //
tasyopari mahaccitraṃ bhavatīti tvayeritam

kīdṛśaṃ tanmamācakṣva mahatkautūhalaṃ vibho //
śrīvarāha uvāca //
sa hi satyatapā pūrvaṃ bhṛguvaṃśodbhavo dvijaḥ

dasyusaṃsargasambhūto dasyuvatsamajāyata //
tataḥ kālena mahatā ṛṣisaṅgātpunardvijaḥ

babhau durvāsasā samyagbodhitaśca viśeṣataḥ //
himādreruttare pāde puṣyabhadrā nadī śubhā

tasyāstīre śilā divyā nāmnā citraśilā dhare //
nyagrodhaśca mahāṃstatra nāmnā bhadro mahāvaṭaḥ

tatra satyatapāḥ sthitvā tapaḥ kurvanmahātapāḥ //
sa kadācitkuṭhāreṇa cakartta samidhaḥ kila

ciccheda cāṃgulīmekāṃ vāmatarjanikāṃ muniḥ //
chinnāyāmaṃgulau tasya bhasmacūrṇaṃ bhavatkila

na lohitaṃ na māṃsaṃ tu na majjā tatra dṛśyate //
aṃgulī sandhitā tena pūrvavaccābhavatkṛte

tasmin bhadravaṭe caikaṃ mithunaṃ kinnaraṃ sthitam //
rātrau suptamṛṣestasya dṛṣṭvā tanmahadadbhutam

prabhāte vimale prāptamindralokamiti smṛtiḥ //
athendreṇa surāḥ sarve yakṣagandharvakinnaraiḥ

pṛṣṭāḥ kiṃcidihāścaryamapūrvaṃ kathyatāmiti //
tatra rudrasarastīre yadetanmithunaṃ śubham

sthitaṃ kinnarayostacca vākyaṃ cedamuvāca ha//
dṛṣṭaṃ tu maha dāścaryaṃ puṣyabhadrātaṭe śubhe

yadetatsatyatapasaḥ samavocattataḥ śubhe //
dṛṣṭaṃ kiṃcidihāścaryaṃ dṛṣṭistu himavadgirau

puṣyabhadrānadī tīre mahadāścaryamuttamam //
yadetatsatyatapasaḥ samavocastataḥ śubhe

sravaṇaṃ bhasmanaścaiva śrutaṃ sarvaṃ śaśaṃsa ha //
tacchutvā sahasā śakro vismito viṣṇumabravīt

āgaccha viṣṇo gacchāmo himavatpārśvamuttamam //
tatrāścaryamapūrvaṃ me kathitaṃ kinnareṇa ha

evamuktastato viṣṇurvārāhaṃ rūpamagrahīt //
mṛgayuśca tathaivendro jagmatustamṛṣiṃ prati

viṣṇurvārāharūpeṇa ṛṣidṛṣṭipathe sthitaḥ //
bhūtvā dṛśyo'pyadṛśyo'bhūtpunareva ca dṛśyate

tāvadindro dhanuṣpāṇistīkṣṇasāyakadhṛgvane //
āgatya satyatapatamṛṣimenamuvāca ha

bhagavanniha dṛṣṭaste varāhaḥ pṛthulo mahān //
yena taṃ hanmi bhṛtyānāṃ poṣaṇāya mahāmune

evamukto munistena cintayāmāsa tatkṣaṇāt //
yadi taṃ darśayāmyasmai varāhaṃ hanyate tadā

no cetkuṭuṃbaḥ kṣudhayā sīdatyasya na saṃśayaḥ //
jāyāputrasamāyukto lubdhako'yaṃ kṣudhā nvitaḥ

saśalyaśca varāho'yaṃ mamāśramamupāgataḥ //
evaṃ gate tu kiṃ kāryamathāsau cintayan prabhuḥ

nādhyagacchata buddhiśca kṣaṇāttasya vyajāyata

dṛṣṭaṃ cakṣurnihitaṃ jaṅgameṣu jihvā vaktuṃ mṛgayau tadvisṛṣṭam //
draṣṭuṃ cakṣurnāsti jihveha vaktuṃ jihvāyāḥ syāttattvato'stīha cakṣuḥ

evaṃ śrutvā dvāvapi tasya tuṣṭau indrāviṣṇū darśayantau svamūrtim //
vākyaṃ cedamūcaturbrūhi nau te tuṣṭau dhanyaṃ varamekaṃ vadasva //
tacchrutvā'sau satyatapā uvāca १

na cātirikto'sti varaḥ pṛthivyāṃ yaddṛṣṭo me purato devadevāḥ //
balaṃ vareṇāpi kṛtārthatāsīt tathāpīdaṃ ye sadā parvakāle

viprā viprāścārcayantīha bhaktyā teṣāṃ pāpaṃ naśyatāṃ māsamekam //
yatsañcitaṃ tveṣa eko varo'stu hyabhīṣṭo me sāṃprataṃ dehi mahyam

muktiṃ cāhaṃ vrajāmīti dvitīyo'stu varo mama//
tathetyuktvā tu tau devau dattvā tasya varaṃ śubham

/
adarśanaṃ gatau devo so'pi tatra vyavasthitaḥ //
labdhvā varaṃ satyatapā brahmabhūto'bhavaddhṛdi

yāvadāste śubhe deśe kṛtakṛtyo mahāmuniḥ //
tāvattasya gurustatra tvāruṇiḥ samadṛśyata

pṛthvīṃ pradakṣiṇīkṛtya tīrthahetorvicakṣaṇa //
tena cāsau mahābhaktyā pūjito muni puṅgavaḥ

pādyācamanagodāneḥ kṛtāsanaparigrahaḥ //
jñātvā sa śiṣyaṃ siddhaṃ tu tapasā dagdhakilbiṣam

uvāca vinayāpannaṃ prāñjaliṃ purataḥ sthitam //
āruṇiruvāca //
putra siddho'si tapasā brahmabhūto'si suvrata

idānīmātmanā sārddhaṃ muktikālo mato'sti te //
uttiṣṭha gamyatāṃ putra mayā sārddhaṃ paraṃ padam

yadgatvā na punarjanma bhavatīti na saṃśayaḥ //
evamuktvā tu tau siddhau ubhau satyatapāruṇī

dhyātvā nārāyaṇaṃ devaṃ taddehe tau layaṃ gatau //
yaścāpi śṛṇuyātpādaṃ parvādhyāyaṃ savistaram

śrāvayedvāpi sa naro gatimiṣṭāmavāpnuyāt //
iti śrīvarāhapurāṇe parvādhyāyo nāma aṣṭanavatitamo'dhyāyaḥ