Varaha Purana · Chapter 216

atha gokarṇaśṛṃgeśvarādimāhātmyam //
brahmovāca //
tasmātsthānādapakrānte tryambake mṛgarūpiṇi //
anyo'nyaṃ mantrayitvā tu mayā saha surottamāḥ

tridhāvibhaktaṃ tacchṛṅgaṃ pṛthakpṛthagavasthitam //
samyaksthāpayituṃ devā vidhidṛṣṭena karmaṇā

sthāpitaṃ devi nītvā vai śṛṃgāgraṃ vajrapāṇinā //
mayā tatraiva tanmadhyaṃ sthāpitaṃ vidhivatprabhoḥ

devairdevarṣibhiścaiva siddhairbrahmarṣibhistathā //
gokarṇa iti vikhyātiḥ kṛtā vaiśeṣikī varā

viṣṇunā devatīrthena tanmūlaṃ sthāpitaṃ tataḥ //
tasya śṛṅgeśvara iti nāma tatrābhavanmahat

tatra tatraiva bhagavāṃstasminśṛṃge tridhā sthite //
sānnidhyaṃ kalpayāmāsa bhāgenaikena conmanā

śataṃ tena tu bhāgānāmātmano nihitaṃ mṛge //
tasmāddvikaṃ tu bhāgānāṃ śṛṃgāṇāṃ tritaye nyadhāt

mārgeṇa taccharīreṇa niryayau bhagavānvibhuḥ //
śaiśirasya gireḥ pādaṃ prapede svayamātmanaḥ

śatasaṃkhyā smṛtā vyuṣṭistasmiñchaileśvare vibhoḥ //
tridhā vibhakte śṛṃge'sminnekāgragatiniprabhoḥ

tataḥ surāsuragururdevaṃ bhūtamaheśvaram //
tapaso'greṇa saṃsevya vavrire vividhānvarān

devadānavagandharvāḥ siddhayakṣamahoragāḥ //
śleṣmātakavanaṃ kṛtsnaṃ sarvataḥ parimaṇḍalam

tīrthayātrāṃ puraskṛtya prādakṣiṇyaṃ ca cakratuḥ //
phalānnirddiśya tīrthānāṃ tathā kṣetraphalaṃ mahat

yathāsthānāni te tasmānnivṛttāśca surādayaḥ //
evaṃ tasmānnivṛtteṣu daivateṣu tadā tataḥ

paulastyo rāvaṇo nāma bhrātṛbhiḥ saha rākṣasaiḥ //
āgamyogreṇa tapasā devamārādhayadvibhum

śuśrūṣayā ca parayā gokarṇeśvaramavyayam //
yadā tu tasya tuṣṭo vai varadaḥ śaṃkaraḥ svayam

tadā trailokyavijayaṃ varaṃ vavre sa rākṣasaḥ //
prasādāttasya tatsarvaṃ vāñchitaṃ manasā hi yat

avāpya ca daśagrīvastadiṣṭaṃ parameśvarāt //
trailokyavijayāyāśu tatkṣaṇādeva niryayau

trailokyaṃ sa vinirjitya śakraṃ ca tridaśādhipam //
tadutpāṭyānayāmāsa putreṇendrajitā saha

śṛṃgāgraṃ yatpurā nītvā sthāpitaṃ vajrapāṇinā //
tadutpāṭyānayāmāsa putreṇendrajitā saha

tadyāvadrāvaṇaḥ sthāpya muhūrttamudadhestaṭe //
sandhyāmupāsate tatra lagnastāvadasau bhuvi

na śaśāka yadā rakṣastadutpāṭayituṃ balāt //
vajrakalpaṃ samutsṛjya tadā laṃkāṃ viniryayau

sa tu dakṣiṇagokarṇo vijñeyaste mahāmate //
svayaṃ pratiṣṭhitastatra svayaṃ bhūtapatiḥ śivaḥ

etatte kathitaṃ sarvaṃ mayā vistarato mune //
yathāvaduttarastasya gokarṇasya mahātmanaḥ

dakṣiṇasya ca viprarṣe tathā śṛṃgeśvarasya ca//
śaileśvarasya ca vibho sthityutpattiryathākramam

vyuṣṭiḥ kṣetrasya mahatī tīrthānāṃ ca samudbhavaḥ //
proktaṃ sarvaṃ mayā vatsa kimanyacchrotumicchasi

iti śrīvarāhapurāṇe gokarṇaśṛṃgeśvarādīnāṃ māhātmyaṃ nāma ṣoḍaśādhikadviśatatamo'dhyāyaḥ