Varaha Purana · Chapter 217

atha dharaṇīvarāhasaṃvādaphalaśrutivarṇanam //
sanatkumāra uvāca //
uktaṃ bhagavatā sarvaṃ yathāvatparameṣṭhinā //
pṛṣṭena saṃśayaṃ samyakparaṃ kṛtvārthaniścayam

bhagavadviśvarūpasya sthāṇorapratimaujasaḥ //
krīḍato lokanāthasya kānane mṛgarūpiṇaḥ

yathā śarīraṃ śṛṅgaṃ ca puṇyakṣetre pratiṣṭhitam //
hitāya jagatastatra tīrthāni ca yathābhavan

tanme brūhi mahābhāga yathātattvaṃ jagatpate //
brahmovāca //
pulastyo vakṣyate śeṣaṃ yadato'nyanmahāmune

sarveṣāmeva tīrthānāmeṣāṃ phalaviniścayam //
kuru rājyaṃ puraskṛtya munīnāṃ purato vane

putro me matsamaḥ samyagvedavedāṃgatattvavit //
yacchrutvā puruṣastāta vimuktaḥ sarvakilbiṣaiḥ

yaśasvī kīrttimānbhūtvā vandyate pretya ceha ca //
śrotavyametatsatataṃ cāturvarṇyaiḥ susaṃyutaiḥ

maṃgalyaṃ ca śivaṃ caiva dharmakāmārthasādhakam //
śrībhūtijananaṃ puṇyamāyuṣyaṃ vijayāvaham

dhanyaṃ yaśasyaṃ pāpaghnaṃ svastikṛcchāntikārakam //
śrutvaivaṃ puruṣaḥ samyaṅna durgatimavāpnuyāt

kīrtayitvā vrajetsvargaṃ kalyamutthāya mānavaḥ //
sūta uvāca //
ityuktvā bhagavāndevaḥ parameṣṭhī prajāpatiḥ

sanatkumāraṃ sandiśya virarāma mahāyaśāḥ //
etadvaḥ kathitaṃ sarvaṃ mayā tattvena sattamāḥ

varāhabhūmisaṃvādaṃ sāramuddhṛtya sattamāḥ //
yaścaiva kīrttayennityaṃ śṛṇuyādvāpi bhaktitaḥ

sarvapāpavinirmuktaḥ sa yāti paramāṃ gatim //
prabhāse naimiṣāraṇye gaṃgādvāre'tha puṣkare

prayāge brahmatīrthe ca tīrthe cāmarakaṇṭake //
yatpuṇyaphalamāpnoti tatkoṭiguṇitaṃ bhavet

kapilāṃ dvijamukhyāya samyagdattvā tu yatphalam //
prāpnoti sakalaṃ śrutvā cādhyāyaṃ tu na saṃśayaḥ

śrutvā'syaiva daśādhyāyaṃ śucirbhūtvā samāhitaḥ //
agniṣṭomātirātrābhyāṃ phalaṃ prāpnoti mānavaḥ

yaḥ punaḥ satataṃ śṛṇvannairantaryeṇa buddhimān //
pārayetparayā bhaktyā tasyāpi śṛṇu yatphalam

sarvayajñeṣu yatpuṇyaṃ sarvadāneṣu yatphalam //
sarvatīrthābhiṣekena yatphalaṃ munibhiḥ smṛtam

tatprāpnoti na sandeho varāhavacanaṃ yathā //
yadetatpārayedbhaktyā mama māhātmyamuttamam

aputrasya bhavetputraḥ sapautrasya supautrakaḥ //
yasyedaṃ likhitaṃ gehe tiṣṭhetsaṃpūjyate sadā

tasya nārāyaṇo devaḥ santuṣṭaḥ syāddhi sarvadā //
yaścaitacchṛṇuyādbhaktyā nairantaryeṇa mānavaḥ

śrutvā tu pūjayecchāstraṃ yathā viṣṇuṃ sanātanam //
gandhapuṣpaistathā vastrairbrāhmaṇānāṃ ca tarpaṇaiḥ

yathāśakti nṛpo grāmaiḥ pūjayecca vasundhare//
śrutvā tu pūjayedyaḥ paurāṇikaṃ niyataḥ śuciḥ

sarvapāpavinirmukto viṣṇusāyujyamāpnuyāt २४//ॐ//
iti śrīvarāhapurāṇe bhagavacchāstre dharaṇīvarāhasaṃvāde phalaśrutirnāma saptadaśādhikadviśatatamo'dhyāyaḥ