Varaha Purana · Chapter 206

atha śubhakarmaphalodaya prakaraṇam //
ṛṣiruvāca //
citraguptasya sandeśo vadato yo mayā śrutaḥ //
śrūyatāṃ vai mahābhāgāstapaḥsiddhā dvijottamāḥ

imaṃ sarvātithiṃ dāntaṃ sarvabhūtānukampakam //
samānnadānadātāraṃ śeṣabhojanabhojinam

muñca muñca mahābhṛtya caiṣa dharmasya nirṇayaḥ //
ahaṃ kālena sārddhaṃ hi mṛtyunā prakṛtastathā

mama sthāsyanti pārśveṣu pāpā vai vikṛtāstathā //
enaṃ gāsyanti gandharvā gagane'psarasastathā

dīyatāmāsanaṃ divyaṃ tathānyadyānameva ca /
anyānyānkāmayetkāmānmanasā yāni cecchati

tattu śīghraṃ pradātavyaṃ dharmarājasya śāsanāt //
akriyāṇi tu dānāni pūrvaṃ dattāni dhīmatā

prekṣatāṃ ca mahābhāgo bhoktuṃ caiva sahānugaḥ //
tiṣṭhatyeṣo'tra vai vīro mamādeśānmahāyaśāḥ

/
yāvatsvargādvimānāni samāgacchanti kṛtsnaśaḥ //
tataḥ sa pravarairyānaiḥ sānugaḥ saparicchadaḥ

devānāṃ bhavanaṃ yātu daivatairabhipūjitaḥ //
tatraiva ramatāṃ vīro yāvalloko hi dhāryate

sa kṛtārthaḥ sadā loke yatraiṣo'bhiprayāsyati //
tatra medhyaṃ pavitraṃ ca yatra sthāsyatyayaṃ śuciḥ

naikakanyāpradātāraṃ naikayajñakṛtaṃ tathā //
pūjyatāṃ sarvakāmaistu padaṃ gacchatu vaiṣṇavam

tatraiṣa ramatāṃ dhīraḥ sahasramayutaṃ samāḥ //
tato vai mānuṣe loke ādye vai jāyatāṃ kule

bhūtānukampako hyeṣa kriyatāmasya cārccanam //
varṣāṇāmayutaṃ cāyaṃ tatra tiṣṭhatu devavat

jāyate tu tataḥ paścātsarvamānuṣapūjitaḥ //
upānahau ca chatraṃ ca jalabhājanameva ca

asakṛdyena dattāni tasmai pūjāṃ prayacchatha //
sabhā yatra pravarttante yasmindeśe sahasraśaḥ

hastena saṃspṛśatyeṣa mṛdunā śītalena ca //
vidyādharastathā hyeṣa nityaṃ muditamānasaḥ

mahāpadmāni catvāri tasmiṃstiṣṭhantu nityaśaḥ //
tataścyutaśca kālena mānuṣaṃ lokamāsthitaḥ

bahusundaranārīke kule janma samāpnuyāt //
dadhi kṣīraṃ ghṛtaṃ caiva yena dattaṃ dvijātiṣu

eṣa vā yātu naḥ pārśvamasmai pūjāṃ prayacchatha //
nīyatāṃ nīyatāṃ śīghraṃ yatrayatra na cālayet

gorasasya tu pūrṇāni bhājanāni sahasraśaḥ //
yatra dattvā ca pītvā ca bāndhavebhyo vibhāgaśaḥ

tataḥ paścādayaṃ yātu yatra loko'nasūyakaḥ //
tatraiva ramatāṃ dhīro bahuvarṣaśatānyayam

bahusundaranārībhiḥ sevyamāno mahātapāḥ //
amarākhyo bhavettatra golokeṣu samāhitaḥ

idamevāparaṃ caiva citraguptasya bhāṣitam //
sarvadevamayā devyaḥ sarvavedamayāstathā

amṛtaṃ dhārayantyaśca pracaranti mahītale //
tīrthānāṃ paramaṃ tīrthamatastīrthaṃ na vidyate

pavitraṃ ca pavitrāṇāṃ puṣṭīnāṃ puṣṭireva ca //
tasmātpurastu dātavyaṃ gavāṃ vai medhyakāraṇāt

daghnā hi tridaśāḥ sarve kṣīreṇa ca maheśvaraḥ //
ghṛtena pāvako nityaṃ pāyasena pitāmahaḥ

sakṛddattena prīyante varṣāṇāṃ hi trayodaśa //
tāṃ dattvā caiva pītvā ca prīto medhyastu jāyate

paṃcagavyena pītena vājimedhaphalaṃ labhet //
gavyaṃ tu paramaṃ medhyaṃ gavyādanyanna vidyate

danteṣu maruto devā jihvāyāṃ tu sarasvatī //
khuramadhye tu gandharvāḥ khurāgreṣu tu pannagāḥ

sarvasandhiṣu sādhyāśca candrādityau tu locane //
kakude sarvakṣatrāṇi lāṃgūle dharma āśritaḥ

apāne sarvatīrthāni prasrāve jāhnavī nadī //
nānādvīpasamākīrṇāścatvāraḥ sāgarāstathā

ṛṣayo romakūpeṣu gomaye padmadhāriṇī //
rome vasanti vidyāśca tvakkeśeṣvayanadvayam

dhairyaṃ dhṛtiśca śāntiśca puṣṭirvṛddhistathaiva ca //
smṛtirmedhā tathā lajjā vapuḥ kīrttistathaiva ca

vidyā śāntirmatiścaiva santatiḥ paramā tathā //
gacchantamanugacchanti hyetā gāvo na saṃśayaḥ

yatra gāvo jagattatra devadevapurogamāḥ //
yatra gāvastatra lakṣmīḥ sāṃkhyadharmaśca śāśvataḥ

sarvarūpeṣu tā gāvastiṣṭhantyabhimatāstathā //
bhavaneṣu viśāleṣu sarvaprāsādapaṅktiṣu

striyaśca puruṣāścaiva rakṣantaśca suyantritāḥ //
śayanāsanapāneṣu hyupaviṣṭāḥ sahasraśaḥ

krīḍanti vividhairbhogairbhogeṣu ca sahasraśaḥ //
tatra pānagṛheṣvanye puṣpamālāvibhūṣitāḥ

bhakṣyāṇāṃ vividhānāṃ ca bhojanānāṃ ca saṃcayāt //
śayanāsanapānāni vājino vāraṇāṃstathā

apaśyanvividhāstatra striyaśca śubhalocanā //
śobhayanti striyaḥ kāścijjalakrīḍā gatāstathā

udyāneṣu tathā cānyā bhavaneṣu ca puṇyataḥ //
anena sadṛśaṃ nāsti hyasmādanyanna vidyate

aho sūtrakṛtaṃ śilpamahoratnairalaṃkṛtam //
evaṃ gṛhādgṛhaṃ gacchannahaṃ tatra tatastamaḥ

tatastu nikhilaṃ samyagdṛṣṭvā karma mahodayam //
punarevāgataḥ pārśvaṃ yamasya dvijasattamāḥ

iti śrīvarāhapurāṇe saṃsāracakre śubhakarmaphalodayo nāma ṣaḍadhikadviśatatamo'dhyāyaḥ