વરાહ પુરાણ · અધ્યાય 206

અથ શુભકર્મફલોદય પ્રકરણમ્ ॥
ઋષિરુવાચ ॥
ચિત્રગુપ્તસ્ય સન્દેશો વદતો યો મયા શ્રુતઃ ॥
શ્રૂયતાં વૈ મહાભાગાસ્તપઃસિદ્ધા દ્વિજોત્તમાઃ

ઇમં સર્વાતિથિં દાન્તં સર્વભૂતાનુકમ્પકમ્ ॥
સમાન્નદાનદાતારં શેષભોજનભોજિનમ્

મુઞ્ચ મુઞ્ચ મહાભૃત્ય ચૈષ ધર્મસ્ય નિર્ણયઃ ॥
અહં કાલેન સાર્દ્ધં હિ મૃત્યુના પ્રકૃતસ્તથા

મમ સ્થાસ્યન્તિ પાર્શ્વેષુ પાપા વૈ વિકૃતાસ્તથા ॥
એનં ગાસ્યન્તિ ગન્ધર્વા ગગનેઽપ્સરસસ્તથા

દીયતામાસનં દિવ્યં તથાન્યદ્યાનમેવ ચ ।
અન્યાન્યાન્કામયેત્કામાન્મનસા યાનિ ચેચ્છતિ

તત્તુ શીઘ્રં પ્રદાતવ્યં ધર્મરાજસ્ય શાસનાત્ ॥
અક્રિયાણિ તુ દાનાનિ પૂર્વં દત્તાનિ ધીમતા

પ્રેક્ષતાં ચ મહાભાગો ભોક્તું ચૈવ સહાનુગઃ ॥
તિષ્ઠત્યેષોઽત્ર વૈ વીરો મમાદેશાન્મહાયશાઃ

।
યાવત્સ્વર્ગાદ્વિમાનાનિ સમાગચ્છન્તિ કૃત્સ્નશઃ ॥
તતઃ સ પ્રવરૈર્યાનૈઃ સાનુગઃ સપરિચ્છદઃ

દેવાનાં ભવનં યાતુ દૈવતૈરભિપૂજિતઃ ॥
તત્રૈવ રમતાં વીરો યાવલ્લોકો હિ ધાર્યતે

સ કૃતાર્થઃ સદા લોકે યત્રૈષોઽભિપ્રયાસ્યતિ ॥
તત્ર મેધ્યં પવિત્રં ચ યત્ર સ્થાસ્યત્યયં શુચિઃ

નૈકકન્યાપ્રદાતારં નૈકયજ્ઞકૃતં તથા ॥
પૂજ્યતાં સર્વકામૈસ્તુ પદં ગચ્છતુ વૈષ્ણવમ્

તત્રૈષ રમતાં ધીરઃ સહસ્રમયુતં સમાઃ ॥
તતો વૈ માનુષે લોકે આદ્યે વૈ જાયતાં કુલે

ભૂતાનુકમ્પકો હ્યેષ ક્રિયતામસ્ય ચાર્ચ્ચનમ્ ॥
વર્ષાણામયુતં ચાયં તત્ર તિષ્ઠતુ દેવવત્

જાયતે તુ તતઃ પશ્ચાત્સર્વમાનુષપૂજિતઃ ॥
ઉપાનહૌ ચ છત્રં ચ જલભાજનમેવ ચ

અસકૃદ્યેન દત્તાનિ તસ્મૈ પૂજાં પ્રયચ્છથ ॥
સભા યત્ર પ્રવર્ત્તન્તે યસ્મિન્દેશે સહસ્રશઃ

હસ્તેન સંસ્પૃશત્યેષ મૃદુના શીતલેન ચ ॥
વિદ્યાધરસ્તથા હ્યેષ નિત્યં મુદિતમાનસઃ

મહાપદ્માનિ ચત્વારિ તસ્મિંસ્તિષ્ઠન્તુ નિત્યશઃ ॥
તતશ્ચ્યુતશ્ચ કાલેન માનુષં લોકમાસ્થિતઃ

બહુસુન્દરનારીકે કુલે જન્મ સમાપ્નુયાત્ ॥
દધિ ક્ષીરં ઘૃતં ચૈવ યેન દત્તં દ્વિજાતિષુ

એષ વા યાતુ નઃ પાર્શ્વમસ્મૈ પૂજાં પ્રયચ્છથ ॥
નીયતાં નીયતાં શીઘ્રં યત્રયત્ર ન ચાલયેત્

ગોરસસ્ય તુ પૂર્ણાનિ ભાજનાનિ સહસ્રશઃ ॥
યત્ર દત્ત્વા ચ પીત્વા ચ બાન્ધવેભ્યો વિભાગશઃ

તતઃ પશ્ચાદયં યાતુ યત્ર લોકોઽનસૂયકઃ ॥
તત્રૈવ રમતાં ધીરો બહુવર્ષશતાન્યયમ્

બહુસુન્દરનારીભિઃ સેવ્યમાનો મહાતપાઃ ॥
અમરાખ્યો ભવેત્તત્ર ગોલોકેષુ સમાહિતઃ

ઇદમેવાપરં ચૈવ ચિત્રગુપ્તસ્ય ભાષિતમ્ ॥
સર્વદેવમયા દેવ્યઃ સર્વવેદમયાસ્તથા

અમૃતં ધારયન્ત્યશ્ચ પ્રચરન્તિ મહીતલે ॥
તીર્થાનાં પરમં તીર્થમતસ્તીર્થં ન વિદ્યતે

પવિત્રં ચ પવિત્રાણાં પુષ્ટીનાં પુષ્ટિરેવ ચ ॥
તસ્માત્પુરસ્તુ દાતવ્યં ગવાં વૈ મેધ્યકારણાત્

દઘ્ના હિ ત્રિદશાઃ સર્વે ક્ષીરેણ ચ મહેશ્વરઃ ॥
ઘૃતેન પાવકો નિત્યં પાયસેન પિતામહઃ

સકૃદ્દત્તેન પ્રીયન્તે વર્ષાણાં હિ ત્રયોદશ ॥
તાં દત્ત્વા ચૈવ પીત્વા ચ પ્રીતો મેધ્યસ્તુ જાયતે

પંચગવ્યેન પીતેન વાજિમેધફલં લભેત્ ॥
ગવ્યં તુ પરમં મેધ્યં ગવ્યાદન્યન્ન વિદ્યતે

દન્તેષુ મરુતો દેવા જિહ્વાયાં તુ સરસ્વતી ॥
ખુરમધ્યે તુ ગન્ધર્વાઃ ખુરાગ્રેષુ તુ પન્નગાઃ

સર્વસન્ધિષુ સાધ્યાશ્ચ ચન્દ્રાદિત્યૌ તુ લોચને ॥
કકુદે સર્વક્ષત્રાણિ લાંગૂલે ધર્મ આશ્રિતઃ

અપાને સર્વતીર્થાનિ પ્રસ્રાવે જાહ્નવી નદી ॥
નાનાદ્વીપસમાકીર્ણાશ્ચત્વારઃ સાગરાસ્તથા

ઋષયો રોમકૂપેષુ ગોમયે પદ્મધારિણી ॥
રોમે વસન્તિ વિદ્યાશ્ચ ત્વક્કેશેષ્વયનદ્વયમ્

ધૈર્યં ધૃતિશ્ચ શાન્તિશ્ચ પુષ્ટિર્વૃદ્ધિસ્તથૈવ ચ ॥
સ્મૃતિર્મેધા તથા લજ્જા વપુઃ કીર્ત્તિસ્તથૈવ ચ

વિદ્યા શાન્તિર્મતિશ્ચૈવ સન્તતિઃ પરમા તથા ॥
ગચ્છન્તમનુગચ્છન્તિ હ્યેતા ગાવો ન સંશયઃ

યત્ર ગાવો જગત્તત્ર દેવદેવપુરોગમાઃ ॥
યત્ર ગાવસ્તત્ર લક્ષ્મીઃ સાંખ્યધર્મશ્ચ શાશ્વતઃ

સર્વરૂપેષુ તા ગાવસ્તિષ્ઠન્ત્યભિમતાસ્તથા ॥
ભવનેષુ વિશાલેષુ સર્વપ્રાસાદપઙ્ક્તિષુ

સ્ત્રિયશ્ચ પુરુષાશ્ચૈવ રક્ષન્તશ્ચ સુયન્ત્રિતાઃ ॥
શયનાસનપાનેષુ હ્યુપવિષ્ટાઃ સહસ્રશઃ

ક્રીડન્તિ વિવિધૈર્ભોગૈર્ભોગેષુ ચ સહસ્રશઃ ॥
તત્ર પાનગૃહેષ્વન્યે પુષ્પમાલાવિભૂષિતાઃ

ભક્ષ્યાણાં વિવિધાનાં ચ ભોજનાનાં ચ સંચયાત્ ॥
શયનાસનપાનાનિ વાજિનો વારણાંસ્તથા

અપશ્યન્વિવિધાસ્તત્ર સ્ત્રિયશ્ચ શુભલોચના ॥
શોભયન્તિ સ્ત્રિયઃ કાશ્ચિજ્જલક્રીડા ગતાસ્તથા

ઉદ્યાનેષુ તથા ચાન્યા ભવનેષુ ચ પુણ્યતઃ ॥
અનેન સદૃશં નાસ્તિ હ્યસ્માદન્યન્ન વિદ્યતે

અહો સૂત્રકૃતં શિલ્પમહોરત્નૈરલંકૃતમ્ ॥
એવં ગૃહાદ્ગૃહં ગચ્છન્નહં તત્ર તતસ્તમઃ

તતસ્તુ નિખિલં સમ્યગ્દૃષ્ટ્વા કર્મ મહોદયમ્ ॥
પુનરેવાગતઃ પાર્શ્વં યમસ્ય દ્વિજસત્તમાઃ

ઇતિ શ્રીવરાહપુરાણે સંસારચક્રે શુભકર્મફલોદયો નામ ષડધિકદ્વિશતતમોઽધ્યાયઃ