Varaha Purana · Chapter 205

atha śubhāśubha phalānukīrtanavarṇanam //
ṛṣiputra uvāca //
idamanyatpurā viprāḥ śrūyatāṃ tasya bhāṣitam //
yamasya citraguptasya yacca tatra mayā śrutam

ayaṃ tu bhavatāṃ yātu yātu svargaṃ mahīkṣitām //
ayaṃ vṛkṣastvayaṃ tiryagayaṃ mokṣaṃ vrajennaraḥ

ayaṃ nāgo bhavecchīghramayaṃ tu paramāṃ gatim //
svapūrvakānpaśyate'yamātmanastu pitāmahān

kliśyato rudataścaiva vadataśca punaḥpunaḥ //
svena doṣeṇa sarve vā akṣayaṃ narakaṅgatāḥ

dāratyāgī tvadharmiṣṭhaḥ putrapautravivarjitaḥ //
kṣiptaṃ vai raurave hyenaṃ kṣapayantu mahaujasaḥ

mucyatāṃ ta ime sarve hyatītānāgatāstathā //
mucyantāmāśu mucyantāṃ ta ete pāpavarjitāḥ

āgame ca vipattau ca sarvadharmānupālakāḥ //
te tu kalpānbahūnsvarga uṣitvā hyanasūyakāḥ

bahusundaranāryaṅke hyādye paramadhārmikam //
kalau mānuṣatāṃ yātu dharmasyeha nidarśanam

triviṣṭape parikleśo vāso hyasyākṣayo bhavet //
ayamāyodhane śatruṃ hatvā tu nidhanaṅgataḥ

brāhmaṇārthe gavārthe vā rāṣṭrārthe nidhanaṅgataḥ //
śakrasya hyamarāvatyāṃ nivedayata mā ciram

tatra vaimāniko bhūtvā kalpamekaṃ nivatsyati //
tathaivāyaṃ mahābhāgo dharmātmā dharmavatsalaḥ

bahudānarato nityaṃ sarvabhūtānukampakaḥ //
enaṃ gandhaiśca mālyaiśca śīghrameva prapūjaya

asmai pūjā bhaveddeyā mayādiṣṭā mahātmane //
vījyatāṃ cāmaraireṣa rathamasmai pradīyatām

pretavāsaṃ samutsṛjya hīto yātu triviṣṭapam //
indrasyārddhaṃ bhaveccaiva devadevasya dhīmataḥ

śaṅkhatūryaninādena tatra vai vijayena ca //
tatra vai pūjayitvā ca prāyaśo labhatāṃ sukham

ayaṃ gacchatu bhadraṃ cāpīndradeśaṃ durāsadam //
anena vai kīrtimatā lokaḥ sarvo hyalaṃkṛtaḥ

guṇaiśca śatasaṃkhyākaiḥ śakra enaṃ pratīkṣate //
tāvatsthāsyati dharmātmā yāvacchakrastriviṣṭape

tāvatsa modate svarge yāvaddharmo'numīyate //
tatacyutaśca kālena mānuṣye sukhamaśnute

ratnaveṇupradaścaiva sarvadharmairalaṃkṛtaḥ //
aśvinornaya lokaṃ tu sarvasaukhyasamanvitam

ayaṃ yātu mahābhāgo devadevaṃ sanātanam //
atisṛṣṭaḥ purā yena yathoktāḥ sukhadohanāḥ

sarvaśaktyā sametena dvijebhya upapāditāḥ //
śucīnāṃ brāhmaṇānāmbahvannadānaṃ viśeṣataḥ

tena kalpaṃ vasiṣyanti rudrakalpā manoramāḥ //
tatra kalpaṃ vasedgatvā rudralokaṃ na saṃśayaḥ

tena dattaṃ dvijātibhyo madhukhaṇḍapuraḥsaram //
rasaiśca vividhairyuktaṃ sarvagandhamanoramam

taruṇī kṣīrasampannā gauḥ suvarṇayutā śubhā //
savatsā hemavāsāśca dattā'nena mahātmanā

asya lekhyaṃ mayā dṛṣṭaṃ tisraḥ koṭyastriviṣṭape //
svargātparicyutaścāpi ṛṣīṇāṃ jāyate kule

suvarṇasya pradātā ca tridaśebhyo nivedyatām //
tridaśānabhyanujñāpya yātu devamumāpatim

tatraiṣa vai mahātejā yatheṣṭaṃ kāmamāpnuyāt //
tatraivāyamapi pretagaṇabhakto mahātapāḥ

prayātu pitṛbhiḥ sārddhaṃ tarpitā yena pūrvajāḥ //
dānavratā divaṃ yāntu nānālokanamaskṛtāḥ

ayaṃ bhadro mahākāmaṃ sarvabhūtahite rataḥ //
sarvakāmairayaṃ pūjyaḥ sarvakāmaprado naraḥ

kṣitiprado dvijātibhyo hyayaṃ yātu triviṣṭapam //
tatraiva tiṣṭhatādvīro brahmaloke sahānugaḥ

vividhaiḥ kāmabhogaistu sevyamāno narottamaḥ //
akṣayaṃ cājaraṃ sthānaṃ pūjyamāno maharṣibhiḥ

iti śrīvarāhapurāṇe bhagavacchāstre saṃsāracakre śubhāśubhaphalānukīrttanaṃ nāma pañcādhikadviśatatamo'dhyāyaḥ