Varaha Purana · Chapter 199

punaḥ saṃsāracakrayātanāsvarūpavarṇanam //
ṛṣiputra uvāca //
tasmin kṣititalaṃ sarvamāyasaiḥ kaṇṭakaiścitam //
prabhavanti punaḥ kecidviṣamaṃ tamasāśritam

athānye chinnapādāstu chinnapāṇiśirodharāḥ //
pāpācārāstathā deśādupasarpata mā ciram

ye tu dharmaratā dātā vapuṣmanto yathā gṛhe //
paripānti kṣitiṃ sarve pātyante pāpakāriṇaḥ

yācamānāḥ sthitā nityaṃ suśītaistoyabhojanaiḥ //
striyaḥ śrīrūpasaṃkāśāḥ sukumārāḥ subhojanāḥ

kṛtvā pūjāṃ parāṃ tatra pratīkṣante paraṃ janam//
agnitapte sughore ca nikṣipyante śilātale

āloke ca pradarśyante vṛkṣāśca bhuvanāni ca//
āyānti dahyamāneṣu pṛṣṭhapādodareṣu ca

tatra gatvā tu te dūtāḥ praviśanti sudāruṇāḥ//
kliśyanti bahavastatra trātāraṃ nāpnuvanti te

athānye tu śvabhirghorairāpādatalamastakam //
bhakṣyamāṇā rudantaśca krośantaśca punaḥpunaḥ

athānye tu mahārūpā mahādaṃṣṭrā bhayānakāḥ //
sūcīmukhaṃ kṛtāḥ pāpāḥ kṣudhitāstṛṣitāstathā

annāni dīyamānāni bhakṣyāṇi vividhāni ca//
bhojyāni lehyacoṣyāṇi yairniṣiddhaṃ durātmabhiḥ

ayaḥśaramayī nārī vahnitaptā sudāruṇā //
āliṅgati naraṃ tatra dhāvantaṃ cānudhāvati

dhāvantaṃ cānudhāvaṃtī tvidaṃ vacanamabravīt//
ahaṃ te bhaginī pāpa hyahaṃ bhāryā sutasya te

mātṛṣvasā te durbuddhe mātulānī pitṛṣvasā //
gurubhāryā mitrabhāryā bhrātṛbhāryā nṛpasya ca

śrotriyāṇāṃ dvijātīnāṃ jāyā vai dharṣitāstvayā//
mokṣyase na hi pāpāttvaṃ rasātalagato yathā

kiṃ pradhāvasi nirlajja vyasanaiścopapāditaḥ//
haniṣye'haṃ dhruvaṃ pāpa yathā karma tvayā kṛtam

evaṃ vai bodhayantīha śrāvayanti punaḥpunaḥ//
abhidravanti taṃ pāpaṃ ghorarūpā bhayānakāḥ/

jñānināṃ ca sahasreṣu jātaṃ jātaṃ tathā striyaḥ //
anupīḍya durātmānaṃ dharṣayaṃti sudāruṇam

vṛṣalīrbahulairduḥkhaiḥ kiṃ krandasi punaḥ punaḥ //
kiṃ krandasi sudurbuddhe pariṣvaktaḥ svayaṃ mayā

daśadhā tvaṃ mayā pāpa nīyamānaḥ punaḥpunaḥ //
añjaliṃ vāpi kurvāṇo yācamāno na lajjase

na mokṣyase mayā pāpa kuto gacchasi mūḍha vai //
yatra yatra prayāsi tvamiti gatvā yamālaye

tatra tatraiva pāpa tvāṃ na tyakṣye pāradārikam //
lohayaṣṭiprahāraiśca tāḍayanti punaḥpunaḥ

gopālā iva daṇḍena kālayanto muhurmuhuḥ //
vyāghrasiṃhasṛgālaiśca tathā gardabharākṣasaiḥ

bhakṣyante śvāpadairanyaiḥ śvabhiḥ kākaistathā'pare //
asiṃ tālavanaṃ tatra dhūmajvālāsamākulam

dāvāgnisadṛśākāraṃ pradīptaṃ sarvato'rciṣā //
tatra kṣiptvā tataḥ pāpaṃ yamadūtaiḥ sudāruṇaiḥ

dahyamānānsutaptāṃśca saṃśrayante drumānpunaḥ //
asipatraistato vṛkṣācchindanti bahuśo narān

tatra chinnāśca dagdhāśca hanyamānāśca sarvaśaḥ //
vidhṛṣṭā vikṛtāścaiva dahyamānā nadanti te

asitālavanadvāri ye tiṣṭhanti mahārathāḥ //
pāpakarmasamāyuktāstarjayanti sudāruṇāḥ

bho bho pāpasamācārā dharmasetuvināśakāḥ //
ato nimittaṃ pāpiṣṭhā yātanābhiḥ sahasraśaḥ

anubhūyeha tatsarvaṃ mānuṣyaṃ yadi yāsyatha //
kuleṣu sudaridrāṇāṃ garbhavāsena pīḍitāḥ

bhogaiśca pīḍitā nityaṃ utpatsyatha sudurgatāḥ//
agnijvālānibhāstatra agnisparśā mahāravāḥ

pakṣiṇaścāyasaistuṇḍairvyāghrāścaiva sudāruṇāḥ //
tatra ghorā bahuvidhāḥ kravyādāḥ śvādayastathā

khādaṃti ruṣitāstatra bahavo hiṃsakā narān //
ṛkṣadvīpisamākīrṇe bahukīṭapipīlike

asitālavane viprā bahuduḥkhasamākule //
tatra kṣiptā mayā dṛṣṭā yamadūtairmahābalaiḥ

asipatra subhagnāṅgāḥ śūlalagnāstathā'pare //
tathā'paro mahādeśo nānārūpo bhayānakaḥ

puṣkariṇyaśca vāpyaśca hradā nadyastathaiva ca //
taḍāgāni ca kūpāśca rudhirasya sahasraśaḥ

pūtimāṃsakṛmīṇāṃ ca amedhyasya tathaiva ca//
anyāni ca mayā tatra dṛṣṭāni munisattamāḥ

tatra kliśyanti te pāpāstasminmadhye sahasraśaḥ //
jighrantaśca tathā gandhaṃ majjantaśca sahasraśaḥ

asthipāṣāṇavarṣāṇi rudhirasya balāhakāḥ //
aśmavarṣāṇi te ghorāḥ pātayanti sahasraśaḥ

dhāvatāṃ plavatāṃ caiva hā hato'smīti bhāṣiṇām //
prāhatānāṃ punaḥ śabdo vadhyatāṃ ca sudāruṇaḥ

krandatāṃ karuṇonmiśraṃ diśo'pūryanta sarvaśaḥ//
kvacidbaddhaḥ kvacidruddhaḥ kvacidviddhaḥ sudāruṇaiḥ

kvacitsthūlaistathā baddhaḥ udbaddhaśca kvacittathā //
hāhābhayānakonmiśraḥ śabdo'śrūyata dāruṇaḥ

apaśyaṃ punaranyatra yatsmṛtvā codvijennaraḥ

iti śrīvarāhapurāṇe saṃsāracakre yātanāsvarūpa varṇanaṃ nāma navanavatyadhikaśatatamo'dhyāyaḥ