Varaha Purana · Chapter 181

atha madhukāṣṭhāpratimāyāmarcāsthāpanam //
sūta uvāca //
evaṃ śrutvā paraṃ sthānaṃ sā mahī saṃśitavratā//
sarvakṣetravibhāgeṣu yaśca vai paramo vidhiḥ

saṃśrutya vismayāviṣṭā pratyuvāca vasundharā //
dharaṇyuvāca //
aho kṣetraprabhāvo vai yastvayā samudāhṛtaḥ

yaṃ śrutvā devatattvena jātāsmi vigatajvarā //
ekaṃ me paramaṃ guhyaṃ yannityaṃ hṛdi varttate

mama prītyarthamakhilaṃ tadviṣṇo vaktumarhasi //
kathaṃ tiṣṭhasi kāṣṭheṣu śailamṛnmayajeṣu ca

tāmre kāṃsye ca raupye ca tiṣṭhasi sthāpitaḥ katham //
sauvarṇeṣu ca sarveṣu tiṣṭhasi sthāpitaḥ katham

brahmacārī samāsādya kathaṃ tiṣṭhasi mādhava //
dantaratne samāsādya kathaṃ santiṣṭhate bhavān

kathaṃ tiṣṭhasi vā savye bhittisaṃstho janārdanaḥ //
bhūmisaṃstho mahābhāga vidhidṛṣṭena karmaṇā

evaṃ dharāvacaḥ śrutvā pratyuvācādisūkaraḥ //
śrīvarāha uvāca //
pratimā yasya karttavyā tadānīya vasundhare

pratimāṃ kārayeccaiva lakṣaṇoktāṃ vasundhare //
arcāśuddhiṃ tataḥ kṛtvā pratiṣṭhāpya vidhānataḥ

tataḥ sampūjayeddevi saṃsārabhavamuktaye //
tatra kāṣṭheṣu madhukamānīya ca vasundhare

kṛtvā tatpratimāṃ caiva pratiṣṭhāvidhinārccayet //
tāṃstu dadyāttu gandhāṃśca ye mayā samudāhṛtāḥ

karpūraṃ kuṃkumaṃ caiva tvacaṃ cāgurumeva ca //
rasaṃ ca candanaṃ caiva silhakośīrakaṃ tathā

etairvilepanaṃ dadyādarcitastu vicakṣaṇaḥ //
svastikaṃ varddhamānaṃ ca śrīvatsaṃ kaustubhaṃ tathā

vidhānapūrvakaṃ caiva maṃgalyaṃ caiva pāyasam //
varttistilaphalaṃ caiva karmaṇyāni na saṃśayaḥ

evaṃ sarvaṃ tato dadyātpūjāyāṃ vihitaṃ śubham //
karmaṇā vidhidṛṣṭena śuddho bhāgavataḥ śuciḥ

prāṇāyāmaṃ tataḥ kṛtvā imaṃ mantramudīrayet //
yo'sau bhavāṃstiṣṭhate ca sarvayogapradhānataḥ

sasambhramaṃ loke supratītastiṣṭha kāṣṭhe sa tvaṃ bhuvi //
evaṃ saṃsthāpanaṃ kṛtvā kāṣṭhasya pratimāsu ca

punaḥ pradakṣiṇīkṛtya śuddhairbhāgavataiḥ saha //
prajvālya dīpaṃ tatraiva cārccāyāḥ sammukhaṃ sthitaḥ

norddhvaṃ na tiryagīkṣeta kāmakrodhavivarjitaḥ //
namo nārāyaṇāyeti imaṃ mantramudīrayet

kuryātsaṃskaraṇaṃ teṣāṃ vidhidṛṣṭena karmaṇā

mantraḥ –
yo'sau bhavānsarvajanapravīra gatiḥ prabhustvaṃ vasasi hyamogha //
anena mantreṇa ca lokanātha saṃsthāpitastiṣṭha ca vāsudeva

sarvāmevaṃ tataḥ kṛtvā mama saṃsthāpanakriyām //
pūjyā bhāgavatāḥ sarve ye tatra samupāgatāḥ

gandhamālyairarcayitvā upalepaiśca bhojanaiḥ //
kuryātsaṃskaraṇaṃ teṣāṃ vidhidṛṣṭena karmaṇā

etatkarmavidhānena madhukāṣṭhasya sundari //
dharmasaṃsthāpanārthāya etatte kathitaṃ mayā

yastvanena vidhānena arccāṃ kāṣṭhasya sthāpayet //
sa na gacchati saṃsāraṃ mama lokaṃ ca gacchati

iti śrīvarāhapurāṇe bhagavacchāstre madhukāṣṭhāyāṃ pratimārccāsthāpanaṃ nāma ekāśītyadhikaśatatamo'dhyāyaḥ