Varaha Purana · Chapter 182

atha śailārccāsthāpanam //
śrīvarāha uvāca //
punaranyatpravakṣyāmi tacchṛṇuṣva vasundhare //
yathā tiṣṭhāmi śaileṣu pratimāyāmitastataḥ

surūpāṃ ca śilāṃ dṛṣṭvā niḥśalyāṃ suparīkṣitām //
tatra dakṣaṃ rūpakāraṃ śīghraṃ ca viniyojayet

śīghramālikhya taṃ tatra śvetavartikayā naraḥ //
pradakṣiṇāṃ tataḥ kṛtvā pūjayedakṣatādibhiḥ

dīpakaṃ ca tato dadyādbaliṃ dadhyodanena ca //
namo nārāyaṇāyeti uktvā mantramudīrayet

mantraḥ-
yo'sau bhavānsarvajanapravīraḥ somāgnitejāḥ sumatipradhānaḥ //
etena mantreṇa tu vāsudeva pratiṣṭhito varddhaya kīrttirāśim

pravara ayutavarāha jaya jaya varddhasva //
anenaiva tu mantreṇa karttavyaṃ yasya yādṛśam //
evaṃrūpaṃ tataḥ kṛtvā devaṃ nārāyaṇaṃ prabhum

tato vai sthāpayettatra pūrvābhimukhameva tu //
ahorātramuṣitvaivaṃ śuklavastreṇa bhūṣitaḥ

śuklayajñopavītī ca kṛtvā vai dantadhāvanam //
sarvagandhodakaṃ gṛhya imaṃ mantramudāharet

mantraḥ –
yo'sau bhavāṃstiṣṭhati sarvarūpaṃ māyābalaṃ sarvajagatsvarūpam //
etena mantreṇa jagatsvarūpa sampūjitastiṣṭhasi lokanātha

karaṇadhāraṇapravadhyamudāharaṇamaparājitamajarāmara //
sampūjya snāpayātmānamanena mantreṇa ॐ namo vāsudevāya //
evaṃ tu sthāpanaṃ kṛtvā śilāyāṃ mama sundari //
tato 'dhivāsanaṃ kāryaṃ pūrvaproṣṭhapadāsu ca

yo māṃ saṃsthāpayedbhūme mama karmaparāyaṇaḥ //
sa yāti vaiṣṇavaṃ lokaṃ nātra kāryā vicāraṇā

yāvakaṃ pāyasaṃ bhuktvā ahorātraṃ samāpayet //
tataḥ paścimasandhyāyāṃ dadyāccatvāri dīpakān

paṃcagavyaṃ ca gandhaṃ ca vāriṇā saha miśrayet //
caturaḥ kalaśāṃścaiva sthāpayetpādamūlataḥ

gītavāditraghoṣeṇa utsavaṃ tatra kārayet //
brāhmaṇaiḥ sāmagaistatra vedaghoṣaṃ tu kārayet

brahmākṣarasahasrāṇi paṭhatāṃ brahmavādinām //
yeṣāṃ paṭhitaśabdena śubhagītasvareṇa ca

āgamiṣyāmyahaṃ devi mantrapāṭho mama priyaḥ //
niḥśabdaṃ ca tataḥ kṛtvā sthāpyo bhāgavataiḥ saha

punarāvāhanaṃ kuryānmantreṇānena suvrataḥ //
āgaccha he deva sumantrayuktaḥ paṃcendriyaiḥ ṣaṭsu tathā pradhānaḥ

eteṣu bhūteṣu ca saṃvidhātā āvāsitastiṣṭhati lokanātha

anenaiva tu mantreṇa samittilaghṛtena ca //
madhunā caiva hotavyamaṣṭottaraśatāhutīḥ

evaṃ kṛte vidhāne bhavāmi sannihitaḥ svayam //
vyatītāyāṃ tu śarvaryāṃ prabhāte vimale tataḥ

paṃcagavyaṃ tata prāśya mantreṇa vidhipūrvakam //
sarvagandhaiśca lājaiśca paṃcagavyajalaṃ tathā

tataḥ prāsāde sthāpyo'haṃ gītavāditramaṅgalaiḥ //
sarvagandhāṃstato gṛhya imaṃ mantramudāharet

mantraśca -
yo'sau bhavām̐llakṣaṇalakṣitaśca lakṣmyā ca yuktaḥ satataṃ purāṇaḥ //
atra prāsāde susamiddhatejāḥ praveśamāyāhi namo namaste

tata etena mantreṇa prāsādaṃ saṃpraveśayet //
pratimā sthāpitavyā me madhye na tu vipārśvataḥ

evaṃ saṃsthāpanaṃ kṛtvā dadyādudvarttanaṃ vibhoḥ //
candanaṃ kuṃkumaṃ caiva miśraṃ kāleyakena ca

evaṃ codvarttanaṃ kṛtvā imaṃ mantramudāharet //
yo'sau bhavānsarvajagatpradhānaḥ sampūjito brahmabṛhaspatibhyām //
pravanditaḥ kāraṇaṃ mantrayuktaḥ susvāgataṃ tiṣṭha sulokanātha

evaṃ saṃsthāpanaṃ kṛtvā gandhamālyaiśca pūjayet //
śuklavastrāṇi me dadyādimaṃ mantramudāharet

mantraḥ-
vastrāṇi deveśa gṛhāṇa tāni mayā subhaktyā racitāni yāni //
imāni sandhāraya viśvamūrtte prasīda mahyaṃ ca namo namaste

evaṃ vastrāṇi me dadyādvidhidṛṣṭena karmaṇā //
dhūpanaṃ me tato dadyātkuṅkumāgurumiśritam //
evaṃ ca dhūpanaṃ dadyādimaṃ mantramudīrayet

mantraḥ –
asāvanādiḥ puruṣaḥ purāṇo nārāyaṇaḥ sarvajagat pradhānaḥ //
gandhaṃ ca mālyāni ca dhūpa dīpau gṛhāṇa deveśa namo namaste

evaṃ pūjāṃ tataḥ kṛtvā prāpaṇaṃ ca nivedayet //
pūrvoktena vidhānena prāpaṇaṃ copakalpya ca

pūrvoktenaiva mantreṇa dadyātprāpaṇakaṃ budhaḥ //
prāpaṇānte cācamanaṃ dadyāddehaviśuddhaye

śāntijāpastataḥ kāryaḥ sarvakāryārthasiddhidaḥ //
mantraḥ-
tvaṃ vai suśāntiṃ kuru lokanātha rājñaḥ sarāṣṭrasya ca brāhmaṇānām //
bāleṣu vṛddheṣu gavāṅgaṇeṣu kanyāsu śāntiṃ ca pativratāsu

rogā vinaśyantu ca sarvataśca kṛṣīvalānāṃ ca kṛṣiḥ sadā syāt//
subhikṣayuktāśca sadā hi lokāḥ kāle suvṛṣṭirbhavitā ca śāntiḥ

evaṃ vidhiṃ tataḥ kṛtvā vidhidṛṣṭena karmaṇā //
saṃpūjya tatra deveśaṃ brāhmaṇānbhojayedvratī

dīnānāthānpratarpyātha yathāvibhavaśaktitaḥ //
ya etena vidhānena kuryātsaṃsthāpanaṃ mama

yāvanto mama gātreṣu jāyante jalabindavaḥ //
tāvadvarṣasahasrāṇi mama lokeṣu tiṣṭhati

yo māṃ saṃsthāpayedbhūme sarvāhaṅkāravarjitaḥ //
tāritaṃ ca kulaṃ tena sapta sapta ca saptatiḥ

etatte kathitaṃ bhadre śailikāsthāpanaṃ mama //
dharmasandhāraṇārthāya mama bhakta sukhāya ca

iti śrīvarāhapurāṇe śailārcāsthāpanaṃ nāma dvyaśītyadhikaśatatamo'dhyāyaḥ