Varaha Purana · Chapter 175

śrīvarāha uvāca //
śṛṇu cānyadvarārohe kṛṣṇagaṅgāsamudbhavam //
yamunāsrotasi snātvā kṛṣṇadvaipāyano muniḥ

dhyātvā manasi gaṅgāṃ tāṃ kālindīṃ pāpahāriṇīm //
nityaṃ ca karma kurute tatra tīrthajalāplutim

somavaikuṇṭhayormadhye kṛṣṇaṅgeti kathyate //
yatrātapyata sa vyāso mathurāyāṃ sthito'malaḥ

tatrāśramapadaṃ divyaṃ munipravarasevitam //
āgacchanti sadā tatra cāturmāsyamupāsitum

munayo vedatattvajñā jñāninaḥ saṃśitavratāḥ //
śrautasmārttapurāṇeṣu sandeho yasya kasyacit

vyāso'panodayāmāsa nānāvākyaiḥ satāṅgatiḥ

kālañjare mahādevaṃ tatra tīrthapatiṃ śivam//
yasya sandarśanādeva kṛṣṇagaṃgāphalaṃ bhavet

tatra sthito dvādaśābdavratī saṃgavivarjitaḥ//
pakṣāhārī ca phalabhugdarśe vai paurṇamāsike

gatvā himālayaṃ cāsau badarīmabhito gataḥ//
vyāsaścaryāparastatra dhyānayogaparāyaṇaḥ

trikāladarśī śuddhātmā siddhatvaṃ prāpnuyātprabhuḥ//
tasyāśramapadasthasya yaddṛṣṭaṃ jñānacakṣuṣā//175.१० /
pratyakṣaṃ kṛṣṇatīrthe tu pāṃcālyakulatantunā/
pāṃcālyo'tha dvijaḥ kaścinnāmnā vasuriti śrutaḥ

durbhikṣapīḍito'tyantaṃ sabhāryo dakṣiṇāṃ gataḥ//
śivanadyā dakṣiṇe tu kūle sa varapattane

nivāsamakarottatra brāhmaṇīṃ vṛttimāśritaḥ//
tatrasthasya tadā paṃca putrāḥ kanyābhavaṃstadā

brāhmaṇāya ca dattā sā dhanadhānyasamanvitā //
sa dvijaḥ kālasampannaḥ sabhāryastatra saṃsthitaḥ

kanyā'sthīni tu saṃgṛhya mathurāmājagāma ha //
śrutvā purāṇe patitamarddhacandre'sthipātanam

nityaṃ svarge vasati sa yasyāsthi hyarddhacandrake//
tīrthayātrāprasaṃgena lokaiḥ pracalitā bahiḥ

tena sārthena sā kanyā mathurāyāṃ jagāma ca //
kaniṣṭhā bhaginī teṣāṃ bālaraṇḍā babhūva ha

surūpā sukumārāṅgī nīlakuṃcitamūrddhajā //
kadalīkāṇḍasaṃkāśe tasyā ūrū sumāṃsale

suśliṣṭāṅgulipādā tu nakhāstāmrojjvalāḥ śubhāḥ //
gambhīrā dakṣiṇāvarttā nābhistrivali .śobhitā

kṣāmodarī samakukṣiḥ pīnonnatapayodharā //
kambugrīvā saṃvṛtāsyā sudatī svadharāhanuḥ

sunakhī svakṣiṇī subhrūḥ supramāṇā subhāṣiṇī //
tena tenaiva sampūrṇarūpeṇa ca tilottamā

yaṃ yaṃ paśyati cārvaṅgī yastāṃ caiva prapaśyati //
sa sa citra iva nyasto vicetā jāyate naraḥ

evaṃvidhā tatra tatra tīrthasnānaparāyaṇā //
dṛṣṭā veśyāsamūhena prāgalbhyena tadā kvacit

kānyakubjādhipo rājā kṣatradharme vyavasthitaḥ //
tasya satraṃ sarvakālaṃ devagartteśvare śive

pravarttate suvittāḍhya prekṣaṇīyaṃ manoramam //
vāditrāṇi ca gītāni śakrasya bhavane yathā

tasya devasya yā veśyāstābhiḥ sā pratilobhitā

gītanṛtyādiṣu ratā tāsāṃ dharmamupāgatā //
alpaistu divasaiḥ sādhvī asādhvībhiḥ parīvṛtā

evaṃ vasati sā bālā devasyāsya parigrahā //
yathāsukhaṃ sametābhirviharantī dinedine

iti śrīvarāhapurāṇe mathurāmāhātmye kṛṣṇagaṃgākāliñjaraprabhāve paṃcasaptatyadhikaśatatamo'dhyāyaḥ