વરાહ પુરાણ · અધ્યાય 175

શ્રીવરાહ ઉવાચ ॥
શૃણુ ચાન્યદ્વરારોહે કૃષ્ણગઙ્ગાસમુદ્ભવમ્ ॥
યમુનાસ્રોતસિ સ્નાત્વા કૃષ્ણદ્વૈપાયનો મુનિઃ

ધ્યાત્વા મનસિ ગઙ્ગાં તાં કાલિન્દીં પાપહારિણીમ્ ॥
નિત્યં ચ કર્મ કુરુતે તત્ર તીર્થજલાપ્લુતિમ્

સોમવૈકુણ્ઠયોર્મધ્યે કૃષ્ણઙ્ગેતિ કથ્યતે ॥
યત્રાતપ્યત સ વ્યાસો મથુરાયાં સ્થિતોઽમલઃ

તત્રાશ્રમપદં દિવ્યં મુનિપ્રવરસેવિતમ્ ॥
આગચ્છન્તિ સદા તત્ર ચાતુર્માસ્યમુપાસિતુમ્

મુનયો વેદતત્ત્વજ્ઞા જ્ઞાનિનઃ સંશિતવ્રતાઃ ॥
શ્રૌતસ્માર્ત્તપુરાણેષુ સન્દેહો યસ્ય કસ્યચિત્

વ્યાસોઽપનોદયામાસ નાનાવાક્યૈઃ સતાઙ્ગતિઃ

કાલઞ્જરે મહાદેવં તત્ર તીર્થપતિં શિવમ્॥
યસ્ય સન્દર્શનાદેવ કૃષ્ણગંગાફલં ભવેત્

તત્ર સ્થિતો દ્વાદશાબ્દવ્રતી સંગવિવર્જિતઃ॥
પક્ષાહારી ચ ફલભુગ્દર્શે વૈ પૌર્ણમાસિકે

ગત્વા હિમાલયં ચાસૌ બદરીમભિતો ગતઃ॥
વ્યાસશ્ચર્યાપરસ્તત્ર ધ્યાનયોગપરાયણઃ

ત્રિકાલદર્શી શુદ્ધાત્મા સિદ્ધત્વં પ્રાપ્નુયાત્પ્રભુઃ॥
તસ્યાશ્રમપદસ્થસ્ય યદ્દૃષ્ટં જ્ઞાનચક્ષુષા॥175.૧૦ ।
પ્રત્યક્ષં કૃષ્ણતીર્થે તુ પાંચાલ્યકુલતન્તુના।
પાંચાલ્યોઽથ દ્વિજઃ કશ્ચિન્નામ્ના વસુરિતિ શ્રુતઃ

દુર્ભિક્ષપીડિતોઽત્યન્તં સભાર્યો દક્ષિણાં ગતઃ॥
શિવનદ્યા દક્ષિણે તુ કૂલે સ વરપત્તને

નિવાસમકરોત્તત્ર બ્રાહ્મણીં વૃત્તિમાશ્રિતઃ॥
તત્રસ્થસ્ય તદા પંચ પુત્રાઃ કન્યાભવંસ્તદા

બ્રાહ્મણાય ચ દત્તા સા ધનધાન્યસમન્વિતા ॥
સ દ્વિજઃ કાલસમ્પન્નઃ સભાર્યસ્તત્ર સંસ્થિતઃ

કન્યાઽસ્થીનિ તુ સંગૃહ્ય મથુરામાજગામ હ ॥
શ્રુત્વા પુરાણે પતિતમર્દ્ધચન્દ્રેઽસ્થિપાતનમ્

નિત્યં સ્વર્ગે વસતિ સ યસ્યાસ્થિ હ્યર્દ્ધચન્દ્રકે॥
તીર્થયાત્રાપ્રસંગેન લોકૈઃ પ્રચલિતા બહિઃ

તેન સાર્થેન સા કન્યા મથુરાયાં જગામ ચ ॥
કનિષ્ઠા ભગિની તેષાં બાલરણ્ડા બભૂવ હ

સુરૂપા સુકુમારાઙ્ગી નીલકુંચિતમૂર્દ્ધજા ॥
કદલીકાણ્ડસંકાશે તસ્યા ઊરૂ સુમાંસલે

સુશ્લિષ્ટાઙ્ગુલિપાદા તુ નખાસ્તામ્રોજ્જ્વલાઃ શુભાઃ ॥
ગમ્ભીરા દક્ષિણાવર્ત્તા નાભિસ્ત્રિવલિ .શોભિતા

ક્ષામોદરી સમકુક્ષિઃ પીનોન્નતપયોધરા ॥
કમ્બુગ્રીવા સંવૃતાસ્યા સુદતી સ્વધરાહનુઃ

સુનખી સ્વક્ષિણી સુભ્રૂઃ સુપ્રમાણા સુભાષિણી ॥
તેન તેનૈવ સમ્પૂર્ણરૂપેણ ચ તિલોત્તમા

યં યં પશ્યતિ ચાર્વઙ્ગી યસ્તાં ચૈવ પ્રપશ્યતિ ॥
સ સ ચિત્ર ઇવ ન્યસ્તો વિચેતા જાયતે નરઃ

એવંવિધા તત્ર તત્ર તીર્થસ્નાનપરાયણા ॥
દૃષ્ટા વેશ્યાસમૂહેન પ્રાગલ્ભ્યેન તદા ક્વચિત્

કાન્યકુબ્જાધિપો રાજા ક્ષત્રધર્મે વ્યવસ્થિતઃ ॥
તસ્ય સત્રં સર્વકાલં દેવગર્ત્તેશ્વરે શિવે

પ્રવર્ત્તતે સુવિત્તાઢ્ય પ્રેક્ષણીયં મનોરમમ્ ॥
વાદિત્રાણિ ચ ગીતાનિ શક્રસ્ય ભવને યથા

તસ્ય દેવસ્ય યા વેશ્યાસ્તાભિઃ સા પ્રતિલોભિતા

ગીતનૃત્યાદિષુ રતા તાસાં ધર્મમુપાગતા ॥
અલ્પૈસ્તુ દિવસૈઃ સાધ્વી અસાધ્વીભિઃ પરીવૃતા

એવં વસતિ સા બાલા દેવસ્યાસ્ય પરિગ્રહા ॥
યથાસુખં સમેતાભિર્વિહરન્તી દિનેદિને

ઇતિ શ્રીવરાહપુરાણે મથુરામાહાત્મ્યે કૃષ્ણગંગાકાલિઞ્જરપ્રભાવે પંચસપ્તત્યધિકશતતમોઽધ્યાયઃ